លោក ពៅ សារ័ត្ន ដែលរងរបួសដោយគ្រាប់កាំភ្លើងត្រង់ឆ្អឹងខ្នងក្នុងហេតុការណ៍ប៉ះទង្គិចគ្នាមួយរវាងក្រុមពលរដ្ឋ និងសមត្ថកិច្ចចម្រុះខេត្តព្រះសីហនុកាលពីចុងឆ្នាំមុន និយាយថាបំណងប្រាថ្នារបស់លោកក្នុងឆ្នាំថ្មីនេះគឺចង់បានយុត្តិធម៌ពិតប្រាកដ ខណៈធ្លាក់ខ្លួនពិការមិនអាចដើរបាន។
លោក ពៅ សារ័ត្ន ដែលកំពុងដេកលើគ្រែ និងបន្តសម្រាកព្យាបាលជំងឺនៅមជ្ឈមណ្ឌលមួយក្នុងខេត្តបាត់ដំបងបានប្រាប់វីអូឌីនៅថ្ងៃនេះថា លោកបានសម្រាកព្យាបាលជំងឺនៅមជ្ឈមណ្ឌលស្ដារលទ្ធភាពពលកម្មអ្នកជំងឺរបួសខួរឆ្អឹងខ្នងនៅខេត្តបាត់ដំបង រយៈពេល១០ខែហើយ នៅតែមិនអាចដើរបានដដែល។
លោក ពៅ សារ័ត្ន រៀបរាប់ថា ពេលនេះអាការៈរបស់លោកឈឺមុខរបួស និងនៅតែបន្តស្ពឹកមួយកំណាត់ខ្លួនចាប់ពីចុងដង្ហើមចុះក្រោមមិនអាចកម្រើកបាន ហើយជើងទាំងពីររបស់លោកស្វិតអស់នៅសល់ប្រហែល៣០ភាគរយប៉ុណ្ណោះ។
លោក ពៅ សារ័ត្ន អាយុ២៩ឆ្នាំ ជាកូនកំព្រាកំពុងរស់នៅជាមួយម្ដាយវ័យចាស់ បានបង្ហាញការឈឺចាប់ និងមានព្រួយបារម្ភខ្លាចធ្លាក់ខ្លួនពិការអស់មួយជីវិត។ លោកបន្តថា សម្រាប់ឆ្នាំថ្មីនេះ លោកចង់ឱ្យភាគីពាក់ព័ន្ធជួយស្វែងរកយុត្តិធម៌សម្រាប់ខ្លួន។
លោកមានប្រសាសន៍ថា៖ «ខ្ញុំសង្ឃឹមដើររួចតិចតួចណាស់ ព្រោះគ្រូពេទ្យនិយាយថា ត្រូវឆ្អឹងខ្នងចឹងឱកាសដើរវិញតិចណាស់។ ខ្ញុំពិបាកចិត្ត ខ្ញុំចង់បានយុត្តិធម៌សម្រាប់ខ្លួនណាស់ ព្រោះវាអយុត្តិធម៌សម្រាប់ខ្ញុំពេក ប៉ុន្តែ មិនដឹងរកយុត្តិធម៌តាមណាទេ»។
លោក ពៅ សារ័ត្ន បន្តថា ចាប់តាំងពីរូបលោកត្រូវរបួសដោយគ្រប់កាំភ្លើងសមត្ថកិច្ចរួចមក គឺគ្រួសារគាត់បានធ្លាក់ខ្លួនក្រីក្រកាន់តែខ្លាំង ដោយសារពុំមានអ្នកប្រកបរបរចិញ្ចឹមជីវិត ខណៈម្ដាយរបស់លោកក៏មានវ័យកាន់តែចាស់។
កាលពីថ្ងៃទី២៤ ខែមករា សមត្ថកិច្ចចម្រុះខេត្តព្រះសីហនុ ប្រមាណ៣០០នាក់ ដឹកនាំដោយព្រះរាជអាជ្ញារង ហួត វិចិត្រ និងអភិបាលរងខេត្ត លោក ផៃ ប៊ុនវណ្ណៈ បានចុះអនុវត្តសាលដីការបស់តុលាការកំពូល ស្ថិតនៅភូមិគគីរ ឃុំបិតត្រាំង ស្រុកព្រៃនប់ ប៉ុន្តែ ត្រូវបានអ្នកភូមិរាប់រយនាក់តវ៉ាប្រឆាំងដោយនាំគ្នាដុតកង់ឡានបិទផ្លូវរហូតផ្ទុះអំពើហិង្សា។
ក្នុងហេតុការណ៍ប៉ះទង្គិចគ្នានោះ លោក ពៅ សារ័ត្ន ដែលជាកម្មករសំណង់ ត្រូវបានគេបាញ់ចំពីក្រោយត្រូវត្រង់ស្មាខាងឆ្វេង ហើយគ្រាប់បៀមជាប់ឆ្អឹងខ្នង។
ក្រោយហេតុការណ៍នេះ នៅខែមីនា លោក ហ៊ុន សែន បានសម្រេចដកអភិបាលរងខេត្តព្រះសីហនុពីររូបមាន លោក ស្រ៊ុន ស្រ៊ន់ និងលោក ផៃ ប៊ុនវណ្ណៈ ចេញពីតំណែង និងមេបញ្ជាការរងកងរាជអាវុធហត្ថខេត្តព្រះសីហនុម្នាក់ និងមន្ត្រី៣នាក់ទៀតត្រូវបានអង្គភាពដាក់ពិន័យ។
អ្នកនាំពាក្យសាលាខេត្តព្រះសីហនុ លោក ឃាង ភារម្យ មានប្រសាសន៍កាលពីខែមិថុនា ឆ្នាំ២០១៩ ថាសំណុំរឿងនេះ អាជ្ញាធរខេត្ត និងស្ថាប័នពាក់ព័ន្ធបានបង្ហាញការទទួលខុសត្រូវ តាមរយៈការជួយដល់គ្រួសារជនរងគ្រោះ និងបានដោះស្រាយចប់សព្វគ្រប់រួចទៅហើយ៕