កម្ពុជាទទួលរៀបចំព្រឹត្តិការណ៍អន្តរជាតិ តំបន់ឆ្នេរសមុទ្រកម្ពុជាលើកទី១ ចាប់ពីថ្ងៃទី០៤-០៦ ខែមករា ឆ្នាំ២០២០ ដោយឆ្លងកាត់ខេត្តចំនួន៤ ដែលក្នុងនោះរួមមាន ខេត្តកោះកុង ព្រះសីហនុ កំពត និងខេត្តកែប ។
រដ្ឋមន្ត្រីក្រសួងទេសចរណ៍ និងជាប្រធានគណៈកម្មាធិការជាតិអូឡាំពិកកម្ពុជា លោក ថោង ខុន ត្រូវបានទំព័រហ្វេសប៊ុកក្រសួងស្រង់ប្រសាសន៍ផ្សាយថា លោកអំពាវនាវដល់រដ្ឋបាលខេត្ត ស្រុក-ក្រុង ដែលពាក់ព័ន្ធទាំងអស់ ត្រូវចូលរួមសហការជំរុញ និងរៀបចំកិច្ចការងារនេះឱ្យបានល្អ។ តាមលោក ថោង ខុន គោលបំណងនៃការរៀបចំព្រឹត្តិការណ៍នេះគឺដើម្បីបង្ហាញជូនភ្ញៀវទេសចរ ក្រុមកីឡាករជាតិ-អន្តរជាតិ ពីការទទួលបដិសណ្ឋារកិច្ចចំពោះពួកគេ និងផ្សព្វផ្សាយពីមុខមាត់ប្រទេសជាតិទៅកាន់ពិភពលោក។
លោក ថោង ខុន ត្រូវបានដកស្រង់សម្ដីមកចុះផ្សាយថា៖ «ព្រឹត្តិការណ៍ប្រណាំងកង់ តំបន់ឆ្នេរសមុទ្រកម្ពុជាលើកទី១នេះ នឹងចូលរួមផ្សព្វផ្សាយអំពីសក្ដានុពលទេសចរណ៍នៃតំបន់ឆ្នេរកម្ពុជា និងរួមចំណែកផលិតធនធានមនុស្សសម្រាប់ត្រៀមស៊ីហ្គេម ឆ្នាំ២០២៣ នៅកម្ពុជាទៀតផង»។
បើតាមក្រសួងទេសចរណ៍ មកដល់ពេលនេះ មានក្រុមកីឡាករចុះឈ្មោះចូលរួមប្រមាណ ២០ក្រុមហើយ ក្នុងនោះក្រុមកីឡាករកម្ពុជាមានចំនួន ២ក្រុម ហើយមានក្រុមកីឡាករបរទេសមកពី១៦ប្រទេសចូលរួមផងដែរ។
ទាក់ទងនឹងបញ្ហានេះ អភិបាលខេត្តកោះកុង អ្នកស្រី មិថុនា ភូថង ចេញសេចក្ដីប្រកាសព័ត៌មានមួយកាលពីថ្ងៃទី៣១ ខែធ្នូ ឆ្នាំ២០១៩ ដោយបញ្ជាឱ្យឡានដឹកដី និងឡានធំទាំងអស់ផ្អាកអាជីវកម្ម និងធ្វើដំណើរការលើកំណាត់ផ្លូវជាតិលេខ៤៨ នាភូមិសាស្ដ្រខេត្តកោះកុង ដែលជាទីតាំងរៀបចំព្រឹត្តិការណ៍ប្រណាំងកង់នេះ។
អ្នកស្រី មិថុនា ភូថង លើកឡើងថា៖ «រដ្ឋបាលខេត្តកោះកុងសង្ឃឹមថា ផ្នែកពាក់ព័ន្ធទាំងអស់យកចិត្តទុកដាក់អនុវត្តតាមសេចក្ដីប្រកាសនេះ ប្រកបដោយការទទួលខុសត្រូវខ្ពស់»។
ព្រឹត្តិការណ៍ប្រណាំងកង់ តំបន់ឆ្នេរសមុទ្រកម្ពុជាលើកទី១ នឹងបែងចែកជា៣ដំណាក់កាល ទី១ប្រណាំងថ្ងៃទី០៤ ខែមករា ចេញពីតារាសាគរតាមវិថីសាយភូថង ឆ្ពោះទៅទីរួមខេត្តកោះកុងតាមផ្លូវជាតិលេខ៤៨។ ដំណាក់កាលទី២ ប្រណាំងថ្ងៃទី០៥ ខែមករា ចេញពីរង្វង់មូលសាយភូថង ឆ្លងកាត់ផ្លូវបំបែកស្រែអំបិល ដោយឆ្លងកាត់ស្រុកព្រៃនប់ឆ្ពោះទៅភ្នំបូកគោខេត្តកំពត។ ដំណាក់ទី៣ ប្រណាំងថ្ងៃទី០៦ ខែមករា ចេញពីជើងភ្នំបូកគោកឆ្ពោះទៅខេត្តកែប។
រដ្ឋបាលខេត្តកោះកុង លើកឡើងថា ការប្រណាំងកង់នេះមានកីឡាករចូលរួម១២០នាក់ គណៈប្រតិភូអមដំណើរប្រមាណជាង១៨០នាក់ និងស្ថាប័នសារព័ត៌មានជាង២៧ស្ថាប័ន មកពីអាមេរិក អ៊ឺរ៉ុប ចិន អូស្ដ្រាលី ជាដើម៕
