សារ«អរគុណសន្តិភាព» ត្រូវបានចងភ្ជាប់នៅតាមអាគារសាធារណៈរបស់រដ្ឋ និងបង្ហោះលើបណ្ដាញសង្គមយ៉ាងព្រោងព្រាតដោយមន្ត្រី និងអ្នកគាំទ្របក្សកាន់អំណាច។
កាលថ្ងៃទី៣១ ខែធ្នូ ឆ្នាំ២០១៩ លោក ហ៊ុន សែន បានបង្ហោះវីដេឃ្លីបលើទំព័រហ្វេសប៊ុករបស់ខ្លួនដែលបង្ហាញពីសកម្មភាពកូនចៅរបស់លោកចូលទៅជូនពរក្នុងឱកាសបុណ្យចូលឆ្នាំសាកល២០២០។ លោក នាយករដ្ឋមន្ត្រី ហ៊ុន សែន បានបញ្ចប់សំណេររបស់លោកដែលបង្ហោះលើបណ្ដាញសង្គមហ្វេសប៊ុកដោយពាក្យថា«អរគុណសន្តិភាព»។
បន្ទាប់ពីការបង្ហោះរបស់លោក ហ៊ុន សែន មន្ត្រីជាន់ខ្ពស់ និងអ្នកគាំទ្របក្សកាន់អំណាចជាច្រើនទៀតបានបង្ហោះសារនេះលើបណ្ដាញសង្គមហ្វេសប៊ុករបស់ខ្លួន។ រដ្ឋមន្ត្រីក្រសួងរៀបចំដែនដី លោក ជា សុផារ៉ា កាលពីម្សិលមិញ បានបង្ហោះលើទំព័រហ្វេសប៊ុកផ្លូវការរបស់លោកថា«អរគុណសន្តិភាព» ដោយបន្ថែមថា គ្មានម្លប់ណាត្រជាក់ជាងម្លប់សន្តិភាព។ ចំណែករដ្ឋមន្ត្រីក្រសួងការពារជាតិ លោក ទៀ បាញ់ នៅថ្ងៃនេះ សរសេរនៅលើហ្វេសប៊ុករបស់លោកថា«អរគុណសន្តិភាព» ដែលធ្វើឱ្យប្រទេសជាតិរីចចម្រើនរុងរឿង។ ក្នុងសារនោះ លោក ទៀ បាញ់ អំពាវនាវឱ្យពលរដ្ឋត្រូវរួមគ្នាថែរក្សាសន្តិភាពឱ្យបានគង់វង្ស។
លើសពីនេះ ពាក្យ«អគុណសន្តិភាព»នេះ ក៏ត្រូវបានចងភ្ជាប់នឹងរបងសាលារៀន មន្ទីរពេទ្យ និងអាគារសាធារណៈរបស់រដ្ឋជាច្រើនទៀតផងដែរ។
អ្នកនាំពាក្យគណបក្សប្រជាជនកម្ពុជា លោក សុខ ឥសាន បានអះអាងថា សារដែលលោកនាយករដ្ឋមន្ត្រី ហ៊ុន សែន និងមន្ត្រីសំខាន់ៗរបស់បក្សមួយចំនួន បានចែករំលែកព្រមគ្នាតាមបណ្ដាញទំនាក់ទំនងសង្គមហ្វេសប៊ុក (Facebook) នាពេលដើមឆ្នាំនេះ មិនត្រឹមបង្ហាញនូវរបៀបធ្វើការរបស់បក្សដែលគោរពមេជាធំ តែក៏ជាសារជំរុញពលរដ្ឋឱ្យចូលរួមថែរក្សាសន្តិភាពនាឆ្នាំថ្មីនេះផងដែរ។
លោកថា ការលើកយកបញ្ហាសន្តិភាពជាប្រធានបទសំខាន់ ព្រោះចង់បង្ហាញអំពីតម្លៃ និងជំរុញពលរដ្ឋចូលរួមសកម្មភាពបញ្ចៀសសង្គ្រាម។
លោក សុខ ឥសាន បញ្ជាក់ថា៖ «បើសិនជាអត់សន្តិភាពទេ ជីវិតរបស់យើងក៏ពិបាកថែរក្សាដែរ។ តែអត់សន្តិភាពបានន័យថា វាមានសង្គ្រាមហើយ បើមានសង្គ្រាមបានសេចក្ដីថា វាមានការលំបាកដល់ការរក្សាអាយុជីវិតរបស់យើង។ បើអត់អាយុជីវិតរបស់យើង សិទ្ធសេរីភាព ជំនឿសាសនា និងឱកាសកសាងអភិវឌ្ឃន៍ប្រទេសក៏អត់មានដែរ»។
អតីតសមាជិកជាន់ខ្ពស់នៃគណបក្សសង្គ្រោះជាតិ លោក មាជ សុវណ្ណារ៉ា បានបញ្ជាក់ថា សន្តិភាពអាចកើតមានបានលុះត្រាអ្នកនយោបាយខ្មែររក្សានូវសន្តិភាពទាំងកាយ វិចារ និងចិត្តរបស់ខ្លួនបានខ្ជាប់ខ្ជួន។ លោកអះអាងថា កន្លងមក អ្នកនយោបាយខ្មែរតែងប្រជែងគ្នាគ្រប់វិធីដើម្បីឈ្នះ មិនអើពើនឹងការរក្សាសន្តិភាព និងលទ្ធិប្រជាធិបតេយ្យឡើយ។
លោក មាជ សុវណ្ណារ៉ា បានរៀបរាប់ថា៖ «មកដល់ឥលូវនេះ យើងឃើញថា ខ្មែរបែកបាក់គ្នា សន្តិភាពតែខាងគណបក្សប្រជាជន តែអ្នកគាំទ្រគណបក្សសង្គ្រោះជាតិ ជាងពាក់កណ្ដាលនគរហ្នឹងគឺគាត់បាត់សន្តិភាពផ្លូវចិត្ត ផ្លូវកាយ ផ្លូវវិចាររបស់គាត់ ដោយសារសន្តិភាពស្ថិតក្នុងការគំរាមកំហែង បំភិតបំភ័យ និងភាពអយុត្តិធម៌នៅក្នុងសង្គមតាមប្រព័ន្ធតុលាការ។ អាហ្នឹង យើងមើលឃើញថា មិនអាចឱ្យខ្មែរមានសន្តិភាពជាធ្លុងមួយទេ»។
អ្នកឃ្លាំមើលបញ្ហាសង្គម លោក ប៉ា ចន្ទរឿន បានសង្កត់ធ្ងន់ថា សន្តិភាពសម្រាប់ប្រទេសមួយ គឺមិនមែនសំដៅលើស្ថានភាពគ្មានសង្គ្រាមឡើយ តែវាជាសង្គមមួយដែលមានការបង្រួបបង្រួមជាតិ សាមគ្គីភាព យុត្តិធម៌ សមធម៌ ជាធាតុផ្សំសំខាន់។ លោកថា បើរដ្ឋាភិបាលកម្ពុជានៅប្រកាន់របៀបដឹកនាំតាមឆ្នាំចាស់ កម្ពុជានឹងប្រឈមវិបត្តិសេដ្ឋកិច្ចកាន់តែធ្ងន់ធ្ងរបន្ថែមទៀត។
លោក ប៉ា ចន្ទរឿន បានអះអាងថា៖ «បើយើងពិនិត្យមើលនៅក្នុងស្រុកខ្មែរយើង ជាការពិត គឺក្រោយឆ្នាំ១៩៩៨មក យើងអត់មានជម្លោះប្រដាប់អាវុធទេ ប៉ុន្តែ យើងឃើញថា មានការផ្លាស់ប្តូរ ជាពិសេសចុងឆ្នាំ២០១៧មក មានការរំលាយអតីតគណបក្សសង្គ្រោះជាតិមកហ្នឹង គឺស្ថានភាពនយោបាយស្រុកខ្មែរចាប់ផ្តើមរង្គោះរង្គើ។ ប្រជាធិបតេយ្យហាក់បីដូចជារាងធ្លាក់ផ្លូវពីគន្លងប្រជាធិបតេយ្យ ដែលបានកសាងតាំងពីការបោះឆ្នោតតាំងពី១៩៩៣មក»៕
