សហភាពសហជីពកម្ពុជា និងតំណាងកម្មករប្រមាណ៥០នាក់ រួមគ្នាប្រមូលស្នាមមេដៃកម្មករ-កម្មការិនីតាមរោងចក្រមួយចំនួន បានជាង១ពាន់នាក់ ផ្ញើជូនលោកនាយករដ្ឋមន្ត្រី ហ៊ុន សែន នាថ្ងៃនេះ ដើម្បីជំរុញរដ្ឋាភិបាលគោរពតាមសំណើរបស់សហភាពអឺរ៉ុបដើម្បីរក្សាប្រព័ន្ធអនុគ្រោះពន្ធ EBA។
ប្រធានសហភាពសហជីពកម្ពុជា លោក រ៉ុង ឈុន បានអះអាងថា សកម្មភាពចុះប្រមូលស្នាមមេដៃតាមបណ្ដារោងចក្រប្រមាណជាង១០ជុំវិញរាជធានីភ្នំពេញ ចាប់តាំងពីថ្ងៃទី២២ រហូតដល់ថ្ងៃទី៣១ ខែធ្នូ ឆ្នាំ២០១៩។ លោកថា ក្រុមការងាររបស់ខ្លួនប្រមូលបានស្នាមមេដៃចំនួន១៣៧៩ ដែលនឹងត្រូវផ្ញើជូនលោកនាយករដ្ឋមន្ត្រីនាថ្ងៃនេះ។
បន្ថែមលើនេះ ស្ថាប័នលោកនឹងចម្លងលិខិតស្នើ និងស្នាមមេដៃនេះផ្ញើជូនស្ថានទូតអាមេរិក ការិយាល័យសហភាពអឺរ៉ុប (EU) និងការិយាល័យឧត្តមស្នងការអង្គការសហប្រជាជាតិថែមទៀត។
លោក រ៉ុង ឈុន បានបញ្ជាក់ថា៖ «យើងសង្ឃឹមថា បើអ្នកដឹកនាំគិតអំពីប្រយោជន៍របស់កម្មករ ពេលហ្នឹងគាត់នឹងត្រូវធ្វើការដោះស្រាយជូនកម្មករ ព្រោះកន្លងមក យើងឃើញគាត់ដើរចុះជួបកម្មករច្រើនណាស់ក្នុងអំឡុងពេលពីរ បីឆ្នាំចុងក្រោយ បង្ហាញថា យកចិត្តទុកដាក់ទៅលើកម្មករ។ អ៊ីចឹង បើសិនគាត់មិនយកចិត្តទុកដាក់ បង្ហាញឱ្យកម្មករមើលឃើញថា អ្វីដែលកម្មករព្រួយបារម្ភមិនបានទទួលការឆ្លើយតបវិជ្ជមានអ៊ីចឹង»។
នៅក្នុងលិខិតស្នើរបស់ខ្លួន សហជីពបានសំណូមពរឱ្យរដ្ឋាភិបាលបើកចំហរប្រព័ន្ធនយោបាយឱ្យទូលាយដូចមុនថ្ងៃបោះឆ្នោតជ្រើសរើសក្រុមប្រឹក្សាឃុំ-សង្កាត់ ឆ្នាំ២០១៧ ពង្រឹងលទ្ធិប្រជាធិបតេយ្យ និងគោរពសិទ្ធមនុស្ស ពិសេសលើវិស័យការងារ និងសិទ្ធសេរីភាពសហជីព។
ក្នុងនាមតំណាងរបស់កម្មករ-កម្មការិនី សហភាពសហជីពកម្ពុជា បានសង្កត់ធ្ងន់នៅក្នុងសេចក្ដីអំពាវនាវរបស់ខ្លួនថា ប្រសិនបើកម្មករ-កម្មការិនី បាត់បង់ការងារ ដោយសារការព្យួរប្រព័ន្ធអនុគ្រោះពន្ធ EBA រដ្ឋាភិបាលគឺជាអ្នកទទួលខុសត្រូវ ព្រោះរដ្ឋជាអ្នកនាំការលំបាកដល់កម្មករ និងក្រុមគ្រួសាររបស់ពួកគេ។
VOD មិនអាចទំនាក់ទំនងលោក ផៃ ស៊ីផាន អ្នកនាំពាក្យរាជរដ្ឋាភិបាល ដើម្បីពន្យល់អំពីការបញ្ហានេះបានទេនាថ្ងៃនេះ។
អ្នកនាំពាក្យក្រសួងការបរទេស លោក កុយ គួង បានថ្លែងបញ្ជាក់ថា ការផ្ញើស្នាមមេដៃរបស់កម្មករទៅលោកនាយករដ្ឋមន្ត្រី ហ៊ុន សែន របស់សហភាពសហជីពកម្ពុជា ជារឿងធម្មតានៃការអនុវត្តសិទ្ធបញ្ចេញមតិ។
លោកបានបន្ថែមថា រដ្ឋាភិបាលគ្មានផែនការធ្វើសកម្មភាពអ្វីបន្ថែមទៀតទេ ដើម្បីរក្សាបានប្រព័ន្ធអនុគ្រោះពន្ធEBA ព្រោះសកម្មភាពលម្អិតអំពីការងាររបស់រដ្ឋាភិបាល ត្រូវបានពន្យល់តាមរយៈរបាយការណ៍ការឆ្លើយតបចុងក្រោយ ផ្ញើទៅគណៈកម្មការអឺរ៉ុបរួចរាល់ហើយ កាលពីអំឡុងខែធ្នូកន្លងមក។
លោក កុយ គួង បានបន្តថា៖ «យើងអត់មានធ្វើអីទៀតទេ ក្នុងរបាយការណ៍ យើងបានរ៉ាយរ៉ាប់ច្បាស់អស់ហើយ។ ពន្យល់បីហេតុផល ពីការវិវឌ្ឍសភាពការណ៍ទូទៅនៅក្នុងប្រទេសយើងរួចរាល់អស់ហើយ ដូច្នេះយើងអត់មានត្រូវធ្វើអីទៀតផង បាទ។ អ្វីក៏ដោយឱ្យតែជាប្រយោជន៍សម្រាប់ជាតិយើង ទោះបីតិច រឺច្រើន ក៏យើងចង់រក្សាឱ្យមាន បាទ»។
នាយកអង្គការសម្ព័ន្ធភាពការងារ និងសិទ្ធមនុស្ស លោក មឿន តុលា បានថ្លែងគាំទ្រការធ្វើយុទ្ធនាការដើម្បីរក្សា EBA របស់សហភាពសហជីពកម្ពុជា ថាជាការជ្រើសពេលវេលាធ្វើការតវ៉ាដ៏ត្រឹមត្រូវ និងទាន់ពេលវេលា។ លោកថា ការប្រកាសលទ្ធផលនៃការរក្សាប្រព័ន្ធអនុគ្រោះពន្ធ EBA នឹងត្រូវធ្វើនាខែកុម្ភៈខាងមុខនេះហើយ ដូច្នេះ យុទ្ធនាការនេះអាចផ្នែកមួយ ទាញការចាប់អារម្មណ៍របស់រដ្ឋាភិបាលងាកមកចាប់អារម្មណ៍បំពេញសកម្មភាពខ្វះចន្លោះរបស់ខ្លួន។
លោក មឿន តុលា បានរៀបរាប់ថា៖ «កូនសោរនៅខាងរដ្ឋទេ បើសិនជារដ្ឋ លោករក្សាប្រព័ន្ធអនុគ្រោះពន្ធហ្នឹង គឺគាត់នៅមានពេលគ្រប់គ្រាន់ក្នុងការធ្វើ។ ជាពិសេសចំណុច៤ ដែលគេលើកឡើងកន្លងមកហ្នឹង គឺសិទ្ធកម្មករ ច្បាប់សហជីព សិទ្ធនយោបាយ សិទ្ធពលរដ្ឋ សិទ្ធដីធ្លីអីហ្នឹង។ ចឹងបើគាត់ដោះ ខ្ញុំគិតថា មិនទាន់យឺតពេលនៅឡើយទេ»។
ការឆ្លើយតបចុងក្រោយរបស់រដ្ឋាភិបាល ក្នុងកិច្ចខិតខំប្រឹងប្រែងរបស់កម្ពុជាក្នុងការគោរពលក្ខខណ្ឌប្រព័ន្ធអនុគ្រោះពន្ធ EBA ផ្ញើជូនគណៈកម្មការអឺរ៉ុបកាលពីថ្ងៃទី១២ ខែធ្នូកន្លងមកនេះ ក្រសួងការបរទេសរំពឹងថាអឺរ៉ុបនឹងពិចារណាលើកិច្ចខិតខំប្រឹងប្រែងរបស់កម្ពុជា ដោយថា ប្រសិនបើប្រព័ន្ធអនុគ្រោះពន្ធនេះបាត់បង់ វានឹងធ្វើឱ្យប៉ះពាល់ដល់កម្មករជិត១លាននាក់៕
