បេក្ខជនប្រឡងចៅក្រម៥រូប បានចេញមុខដាក់ពាក្យបណ្ដឹងទៅលោកនាយករដ្ឋមន្ត្រី ហ៊ុន សែន ស្នើឱ្យអន្តរាគមន៍ដើម្បីផ្ដល់ភាពយុត្តិធម៌ដល់ពួកគេ ដោយលើកឡើងថា ការប្រឡងជ្រើសរើសនោះគ្មានតម្លាភាព។
ក្នុងពាក្យបណ្ដឹងចុះថ្ងៃទី៣១ ខែធ្នូ ឆ្នាំ២០១៩ ដែលដាក់ទៅលោកនាយករដ្ឋមន្ត្រី ហ៊ុន សែន ក្រុមបេក្ខជនទាំង៥រូប បានស្នើឱ្យជួយអន្តរាគមន៍ទៅគណៈកម្មការនាយករៀបចំការប្រឡងប្រជែងជ្រើសរើសសិស្សចៅក្រមជំនាន់ទី១០ ឱ្យបង្ហាញលទ្ធផលនៃការប្រឡងប្រជែងជ្រើសរើសចៅក្រមជំនាន់ទី១០ លើវិញ្ញាសាសរសេរ និងវិញ្ញាសារផ្ទាល់មាត់។
តាមពាក្យបណ្ដឹងដដែល បេក្ខជនស្នើលោក ហ៊ុន សែន ជួយអន្តរាគមន៍ចំនួន៤ចំណុច រួមមាន បង្ហាញអំពីនីតិវិធីនៃការដាក់ពិន្ទុលើវិញ្ញាសាសរសេរ លទ្ធផលពិន្ទុ ប្រៀបធៀប និងផ្ទៀងផ្ទាត់ចម្លើយលើឯកសារសរសេរនៅក្នុងដំណាក់កាលនៃការប្រទ្បងលើវិញ្ញាសាសរសេររបស់បេក្ខជនជាប់ជាស្ថាពរ៥០រូប ជាមួយនឹងលទ្ធផលពិន្ទុ និងចម្លើយឯកសារសរសេរបស់ពួកគាត់ និងនីតិវិធីនៃការដាក់ពិន្ទុលើវិញ្ញាសាផ្ទាល់មាត់ និងលទ្ធផលពិន្ទុ ប្រៀបធៀប និងផ្ទៀងផ្ទាត់សំណួរ និងចម្លើយផ្ទាល់មាត់នៅក្នុងដំណាក់កាលនៃការប្រទ្បងលើវិញ្ញាសាផ្ទាល់មាត់របស់បេក្ខជនជាប់ជាស្ថាពរ៥០រូប ជាមួយនឹងលទ្ធផលពិន្ទុ និងចម្លើយផ្ទាល់មាត់របស់ពួកគេទាំងអស់គ្នា។
បេក្ខជនទាំង៥រូបនោះ ក៏បានអះអាងផងដែរថា ការប្រកាសលទ្ធផលវិញ្ញាសាសរសេរនៃការប្រឡងប្រជែងជ្រើសរើសសិស្សចៅក្រមជំនាន់ទី១០ នៃរាជបណ្ឌិតសភាវិជ្ជាជីវៈតុលាការ កាលពីថ្ងៃទី១២ ខែធ្នូ ឆ្នាំ២០១៩ មិនបានបង្ហាញលទ្ធផលដាក់ពិន្ទុតាមមុខវិជ្ជានីមួយៗដូចជំនាន់មុនៗឡើយ។
បេក្ខជនប្រឡងចៅក្រមជំនាន់ទី១០ ដែលជាប់ក្នុងវគ្គសរសេរ លោក គង់ ប៊ុនរិទ្ធ ប្រាប់វីអូឌីនៅថ្ងៃនេះថា ពួកគាត់ស្នើសុំទៅគណៈកម្មការនាយករៀបចំការប្រឡង ឱ្យបង្ហាញលទ្ធផលនៃការដាក់ពិន្ទុសារធាណៈ ប៉ុន្តែលោកថា គណៈកម្មការនេះ មិនបានបង្ហាញឡើយ។
លោកថា៖ «ក្រដាសតារាងពិន្ទុនៅលើដៃគាត់ នៅចំពោះមុខយើង។ ប៉ុន្តែ គាត់មិនឱ្យយើងមើលទេ គាត់សុខចិត្តហៅឱ្យបេក្ខជនដែលបានចូលរួមប្រឡងឈ្មោះអ្វីត្រូវកត់ ពិន្ទុរដ្ឋប្បវេណីប៉ុន្មាន ព្រហ្មទណ្ឌប៉ុន្មាន ហើយពិន្ទុផ្ទាល់មាត់លើវិញ្ញាសានីមួយៗប៉ុន្មាន គាត់ហៅឱ្យ។ អ៊ីចឹង ខ្ញុំឆ្ងល់មែនទែន បើសិនលេចលឺដល់សាធារណជនអ្នកណាក៏ឆ្ងល់ដែរ ពិន្ទុប្រឡងខ្លួនឯងទេ ហេតុអីក៏អាថ៌កំបាំងម៉្លេះ។ ចំណុចនេះហើយដែលខ្ញុំទាមទារឱ្យរាជបណ្ឌិតសភា បង្ហាញតម្លាភាពចំពោះលទ្ធផលឱ្យបាន»។
បេក្ខជន លោក សូ ដាវី ដែលចូលរួមតវ៉ាដែរ អះអាងថា ការដែលពួកគាត់ស្នើសុំនេះ គឺដើម្បីឱ្យសិស្សទាំងអស់បានដឹងពីសមត្ថភាពរបស់ខ្លួន និងបង្ហាញពីតម្លាភាព ប៉ុន្តែ គណៈកម្មការប្រលងមិនបានបង្ហាញឡើយ។
លោកថា៖ «ការស្នើសុំនេះ បើតាមខ្ញុំគិត គ្មានអីដែលលើសលស់ទេ។ ផ្ទុយទៅវិញវា ផ្ដល់ពីភាពយុត្តិធម៌សម្រាប់សិស្សចៅក្រមទាំងអស់ដែលបានចូលរួមប្រឡងប្រជែង ក៏ផ្ដល់ទំនុកចិត្តដល់ពលរដ្ឋទូទៅ គឺរើសបានចំណេះដឹងពិតប្រាកដទៅធ្វើការ»។
បេក្ខជនម្នាក់ទៀតសុំមិនបញ្ចេញឈ្មោះ និងសំឡេង អះអាងថា ការបង្ហាញលទ្ធផលនេះ វាមិនបានប៉ះពាល់ដល់កិត្តិយសសិស្សចូលរួមប្រឡង ហើយក៏មិនប៉ះពាល់ប្រទេសជាតិដែរ ផ្ទុយទៅវិញ លោកថា បង្ហាញសមត្ថភាពរបស់សិស្សនីមួយៗទៅវិញទេ។
លោកបន្តថា ការបង្ហាញលទ្ធផលនេះ វាជាការលើកទឹកចិត្តដល់យុវជនជំនាន់ក្រោយៗទៀត ឱ្យបានឃើញថា អ្នកដែលមានសមត្ថពិតនឹងជាប់។
អ្នកនាំពាក្យក្រសួងយុត្តិធម៌ លោក ជិន ម៉ាលីន បានច្រានចោលការចោទប្រកាន់នេះ ដោយលោកថា ក្រសួងយុត្តិធម៌បានធ្វើការពន្យល់ទៅក្រុមសិស្ស ហើយអង្គភាពប្រឆាំងអំពើពុករលួយ ក៏បានសេចក្ដីប្រកាសព័ត៌មានពីភាពប្រក្រតី និងតម្លាភាពនៃការរៀបចំការប្រឡងរួចអស់ហើយ ករណីនេះ ក្រសួងមិនមានវិធានអ្វីទៀតឡើយ។
លោកថា៖ «អ៊ីចឹង អ្នកពូកែមានច្រើន ក៏ប៉ុន្តែ គេត្រូវយកចំនួនដែលមានកំណត់។ ប្រសិនបើគាត់មានមូលដ្ឋានច្បាស់លាស់ថា ការប្រឡងនេះ មានភាពមិនប្រក្រតីណាមួយដែលនាំឱ្យគាត់ធ្លាក់ ដូចជា អំពើពុករលួយ ការសូកប៉ាន់អី សូមគាត់បង្ហាញភស្ដុតាងឱ្យបានច្បាស់លាស់ ថាតើសំណូកសូកប៉ាន់ អ្នកណាសូក អ្នកណាអ្នកទទួល ក្រោមរូបភាពយ៉ាងម៉េចខ្លះ ឱ្យច្បាស់ទៅ អាចប្ដឹងទៅ AUC បាន។ បើឱ្យសើរើការប្រឡងមិនសមហេតុ មិនសមផង»។
នាយកប្រតិបត្តិនៃសម្ព័ន្ធគណនេយ្យភាពសង្គមកម្ពុជា លោក សន ជ័យ មានប្រសាសន៍ថា ភាពចម្រូងចម្រាសនៃការប្រឡងប្រជែងចៅក្រមនេះ បានកើតឡើងយូរហើយ។ លោកបន្តថា ប្រសិនបើការប្រឡងប្រជែងចៅក្រមមិនមានភាពសុក្រឹតនោះ លោកថា នឹងធ្វើឱ្យការកាត់សេចក្ដីមានភាពអយុត្តិធម៌ក្នុងសង្គម។
លោកថា៖ «ត្រូវតែមានការស៊ើបអង្កេតមួយ ដែលពិនិត្យមើលឱ្យគ្រប់ជ្រុងជ្រោយ ដើម្បីធានាថា ការប្រឡងហ្នឹង បានប្រព្រឹត្តទៅដោយភាពត្រឹមត្រូវ ហើយពិតជាមានការប្រកួតប្រជែងមែន។ បើមិនដូច្នេះទេ ការប្រឡងដែលមានរឿងអាស្រូវ ដែលមានភាពចម្រូងចម្រាសបែបនេះ គឺជាការប្រឡងមួយមិនមានន័យ។ នៅពេលដែលមានរឿងអាស្រូវបែបនេះ ខ្ញុំនៅតែមន្ទិល ខ្ញុំគិតថា នឹងមានរឿងអយុត្តិធម៌បែបនេះបន្តទៀត នឹងធ្វើឱ្យខូចមុខមាត់ក្នុងប្រព័ន្ធយុត្តិធម៌។»
របាយការណ៍របស់អង្គការតម្លាភាពដែលចេញកាលពីខែមករា ឆ្នាំ២០១៩ បង្ហាញថា ប្រទេសកម្ពុជាបានទទួលចំណាត់ថ្នាក់ទី១៦១ ក្នុងចំណោមប្រទេសចំនួន១៨០។ របាយការណ៍ដដែល ឱ្យដឹងថា ក្នុងចំណោមប្រទេសជាសមាជិកអាស៊ានទាំង១០ ប្រទេសសឹង្ហបុរីជាប្រទេសដែលស្អាតស្អំជាងគេ ពោលគឺទទួលបានពិន្ទុរហូតដល់៨៥ ខណៈដែលកម្ពុជាទទួលបានតែ២០ពិន្ទុប៉ុណ្ណោះ។ ប្រភពដដែលថា តាមរយៈពិន្ទុនេះ កម្ពុជា នៅតែជាប្រទេសដែលមានកម្រិតអំពើពុករលួយខ្ពស់។
បើតាមបេក្ខជន លោក គង់ ប៊ុនរិទ្ធ អះអាងថា បេក្ខជនដែលចូលរួមការប្រឡងចំនួន៦៥០នាក់ បានចូលរួមការប្រឡង ប៉ុន្តែ ក្នុងចំណោម ៦៥០នាក់ គឺជ្រើសរើសយកតែ៥០នាក់។ ការប្រឡងនោះ ត្រូវធ្វើឡើងក្នុងរយៈពេល២ថ្ងៃ គឺនៅថ្ងៃទី២៣ និងទី២៤ ខែវិច្ឆិកា ឆ្នាំ២០១៩ លើមុខវិជ្ជាសំខាន់ៗចំនួន៤ គឺក្រមព្រហ្មទណ្ឌ ក្រមនីតិវិធីព្រហ្មទណ្ឌ ក្រមរដ្ឋប្បវេណី និងក្រមនីតិវិធីរដ្ឋប្បវេណី៕