លោកនាយករដ្ឋមន្ត្រី ហ៊ុន សែន បានប្រកាសថា លោកនឹងមិនដកតំណែងថ្នាក់ដឹកនាំខេត្តកែបនោះឡើយ ហើយផ្ទុយទៅវិញ លោកព្រមានចាត់ការទៅលើមន្ត្រីរបស់លោក ដែលជំរុញឱ្យដកតំណែងថ្នាក់ដឹកនាំខេត្តនេះ។
លោកនាយករដ្ឋមន្ត្រីបានប្រកាសបែបនេះនាថ្ងៃត្រង់ថ្ងៃទី០៥ ខែមករា អំឡុងពេលលោកថ្លែងបិទបញ្ចប់ប្រតិបត្តិការរុករកជនរងគ្រោះកប់ជាប់នៅក្រោមគំនរអគារកម្ពស់ ៧ជាន់ ដែលបានបាក់រលំកាលពីរសៀលថ្ងៃសុក្រកន្លងមកនេះ។
លោក ហ៊ុន សែន ថ្លែងថា៖ «ខ្ញុំអាចបញ្ជាក់បានថា អត់មានការដកចៅហ្វាយខេត្ត ឬអនុខេត្តទេ និយាយគ្នាឱ្យច្បាស់។ ខ្ញុំនឹងអាចពិនិត្យទៅលើមន្ត្រីរបស់ខ្ញុំមួយចំនួនដែលកំពុងនៅក្នុងជួររដ្ឋាភិបាល បង្ហោះហ្វេសប៊ុកចេញ ព្រោះតាំងពីរឿងនេសាទស្អី ប្រមូលផ្ដុំមកទៅលើអគារ សំដៅរុញច្រានឱ្យខ្ញុំដកតំណែងអភិបាលខេត្តកែបតែម្ដង»។
អគារកម្ពស់ ៧ជាន់ ស្ថិតក្នុងក្រុងកែបខេត្តកែប បានបាក់រលំកាលពីរសៀលថ្ងៃទី០៣ ខែមករា ដោយបានសម្លាប់មនុស្សសរុប៣៦នាក់ និងបណ្ដាលឱ្យមនុស្ស ២៣នាក់ទៀតរងរបួស ក្នុងនោះកុមារចំនួន ៦នាក់ផងដែរ។
លោក ហ៊ុន សែន បានលើកឧទារហណ៍ពីគ្រោះបាក់អគារនានានៅបណ្ដាប្រទេសជុំវិញពិភពលោក ដោយបញ្ជាក់ថា មិនមែនមានគ្រោះបាក់អគារតែនៅកម្ពុជាឡើយ។
លោក ហ៊ុន សែន ថែ្លងបន្តថា៖«នៅប្រទេសនានាដែលបានកើតដូចសហរដ្ឋអាម៉េរិក ដួលអគារ តើគេមានដកអភិបាលរដ្ឋគេទេ?»។
លោក ហ៊ុន សែន ពុំបានថ្លែងចំឈ្មោះមន្ត្រីរូបណានោះឡើយ ប៉ុន្តែ លោកបានគ្រាន់តែថ្លែងថា មន្ត្រីរូបនោះជាមេដឹកនាំគណបក្សនយោបាយមួយនៅក្នុងជួររដ្ឋាភិបាលរបស់លោក ហើយលោកក៏បានឆ្លើយតបនៅលើបណ្ដាញសង្គមហ្វេសប៊ុកផងដែរ។
ទោះជាយ៉ាងណា គណនីហ្វេសប៊ុកឈ្មោះ ហ៊ុន សែន (Hun Sen) បានបញ្ចេញមតិកាលពីថ្ងៃម្សិលមិញថា «សង្ឃឹមថា ឯកឧត្ដមមិនប្រើពេលវេលានេះ រុញឱ្យខ្លោច រោជឱ្យឆៅនោះទេ» ដែលជាការឆ្លើយតបទៅនឹងប្រធានគណបក្សយុវជនកម្ពុជា លោក ពេជ្រ ស្រស់ ដែលបានបង្ហោះសារលើគណនីហ្វេសប៊ុកលោកថា «…ហើយខ្ញុំឈឺចាប់ខ្លាំងណាស់ដែលមានមន្ត្រីអសមត្ថភាពមួយចំនួនបណ្ដាលឱ្យបងប្អូនរងគ្រោះដូច្នេះ»។
លោក ពេជ្រ ស្រស់ ថ្លែងប្រាប់វីអូឌីនៅថ្ងៃនេះថា លោកគ្រាន់តែជំរុញឱ្យមានប្រសិទ្ធភាពការងារនៅថ្នាក់ក្រោមជាតិតែប៉ុណ្ណេះ ហើយលោកថា ចំណែកឯការដកហូត ឬតែងតាំងនរណាម្នាក់ គឺជាឆន្ទានុសិទ្ធិរបស់នាយករដ្ឋមន្ត្រី។
លោក ពេជ្រ ស្រស់៖«ខ្ញុំគ្មានលទ្ធភាពឯណាទៅរុញឱ្យនាយករដ្ឋមន្ត្រីទៅដកមន្ត្រីណាមួយទេ។ អ្វីដែលខ្ញុំចង់ផ្តោតជាចម្បង គឺជំរុញប្រសិទ្ធភាពការងារថ្នាក់ក្រោមជាតិ និងស្វែងរកប្រភពបញ្ហាឱ្យបានច្បាស់លាស់ ធានាការអភិវឌ្ឍន៍វិស័យសំណង់នៅកម្ពុជាឱ្យបានប្រសើរ»។
លោក ហ៊ុន សែន បញ្ជាក់ថា សំណង់អគារនោះ បានបាក់រលំបណ្ដាលមកពីដែកសង់សំណង់មិនត្រូវខ្នាត និងបច្ចេកទេសដោះពុម្ពប្លង់សេមុនថ្ងៃកំណត់ ដែលបណ្ដាលឱ្យបាក់រលំសង្កត់លើមនុស្ស។
លោក ហ៊ុន សែន៖ «អ៊ីចឹង មេការរូបនេះ គាត់បានទទួលមរណភាពទាំងខ្លួនទាំងកូនទៅទៀត មិនអាចចាប់គាត់ទៅទទួលទោសទេ មានតែផ្តល់ជំនួយជូនគ្រួសារគាត់»។
ប្រធានសម្ព័ន្ធសហជីពកម្មករសំណង់ និងព្រៃឈើ លោក សុខ គីន បានថ្លែងថា លោកកោតសរសើរចំពោះទឹកចិត្តលោកនាយករដ្ឋមន្ត្រីសម្រាប់ក្នុងហេតុការណ៍នេះ ប៉ុន្តែ លោកថា យុត្តិធម៌សម្រាប់ជនរងគ្រោះ មិនអាចយកទឹកលុយមកដូរបានទេ។
លោកស្នើឱ្យមានការស៊ើបអង្កេតរកឱ្យឃើញអ្នកពាក់ព័ន្ធទាំងអស់មកផ្តន្ទាទោសតាមច្បាប់ និងស្នើឱ្យរៀបចំយន្តការចាំបាច់នានាដើម្បីធានាសុវត្ថិភាពកម្មករសំណង់ទៅថ្ងៃមុខ។
លោក សុខ គីន មានប្រសាសន៍ថា៖ «ទាល់តែអនុវត្តតាមច្បាប់ ស៊ើបអង្កេតអីត្រឹមត្រូវទើបអាចធានាថា សំណង់ទៅថ្ងៃមុខមិនមានបញ្ហាកើតឡើងតទៅទៀត បើសិនជាមិនរកឫសរកគល់ឱ្យឃើញ នោះថ្ងៃមុខទៀតមន្ត្រីអាជ្ញាធរខិលខូច និងឈ្នួញទុច្ចរិត នៅតែឃុបឃិតគ្នាតទៅទៀត ហើយបញ្ហានឹងមានទៀត»។
មួយថ្ងៃក្រោយហេតុការណ៍បាក់រលំអគារនេះ សារព័ត៌មានក្នុងស្រុកដែលមានទំនោរគាំទ្ររដ្ឋាភិបាល បានផ្សព្វផ្សាយពីចំនួនអគារបាក់រលំនៅបណ្ដាប្រទេសនានានៅលើពិភពលោកកាលពីឆ្នាំមុន ដូចជា សហរដ្ឋអាមេរិកជាដើម ប៉ុន្តែ ពុំបានផ្សាយអំពីចំណាត់ការរបស់រដ្ឋាភិបាលប្រទេសទាំងនោះទេ។
លោកបណ្ឌិត ឡៅ ម៉ុងហៃ បានសរសេរលើហ្វេសប៊ុកលោកនៅថ្ងៃនេះថា មន្ត្រីថ្នាក់ខ្ពស់ ត្រូវទទួលខុសត្រូវចំពោះការបាត់បង់ជីវិតប្រជាពលរដ្ឋនៅក្នុងហេតុការណ៍បាក់រលំអគារនេះ និងត្រូវមានការស៊ើបអង្កេតជាសាធារណៈផងដែរ។
លោក ហ៊ុន សែន ក៏ប្រកាសផ្តល់សំណងចំនួន ៥ម៉ឺនដុល្លារទៅដល់គ្រួសារសពនីមួយៗ និងថវិកាយ៉ាងតិច ១ម៉ឺនដុល្លារទៀតទៅដល់អ្នករងរបួសម្នាក់ៗ។
ចំណែកឯម្ចាស់សំណង់វិញ លោក ហ៊ុន សែន អះអាងថា ត្រូវបានឃាត់ខ្លួនក្នុងស្នងការនគរបាលខេត្តកែប និងត្រៀមបញ្ជូនខ្លួនទៅកាន់តុលាការខេត្តកំពត ដើម្បីអនុវត្តនិតិវិធីច្បាប់។
កាលពីថ្ងៃទី២២ ខែមិថុនា ឆ្នាំ២០១៩ កម្មករសំណង់ខ្មែរ ២៨នាក់ បានស្លាប់ និង២៦នាក់ទៀតបានរងរបួស ក្រោយពីសំណង់អគារដែករបស់ជនជាតិចិននៅខេត្តព្រះសីហនុ បានបាក់រលំ។
កាលពីថ្ងៃទី៣ ខែធ្នូកន្លងមកនេះ អគារសាលាឆាន់ក្នុងវត្តប្រាសាទគោកចក ស្ថិតក្នុងក្រុងសៀមរាប ក៏បានបាក់រលំផងដែរ ដោយបណ្ដាលឱ្យមនុស្ស ៣នាក់ស្លាប់ និង ១៦នាក់ផ្សេងទៀតរងរបួស។
សរុបមិនដល់មួយឆ្នាំផង មានកម្មករសំណង់ ៦៥នាក់ស្លាប់ ៦៤នាក់រងរបួស ដោយសារបាក់សំណង់អគារកំពុងសាងសង់៕