ក្រសួងអប់រំ យុវជន និងកីឡា បានប្រកាសយកខែមករាឆ្នាំនេះ ជាវេលាផ្តើមធ្វើយុទ្ធនាការពេញមួយខែ លើកកម្ពស់សុវត្ថិភាពចំណីអាហារក្នុងសាលារៀន ដើម្បីធានាថា ចំណីអាហារគ្មានសារធាតុគីមី និងអនាម័យល្អ។
រដ្ឋមន្ត្រីក្រសួងអប់រំ លោក ហង់ជួន ណារ៉ុន បានថ្លែងបញ្ជាក់ក្នុងពិធីប្រកាសព័ត៌មានស្ដីពី យុទ្ធនាការផ្សព្វផ្សាយសុវត្ថិភាពចំណីអាហារ នៅសាលាបឋមសិក្សាព្រះនរោត្តមកាលពីព្រឹកមិញនេះថា សកម្មភាពនេះនឹងធ្វើឱ្យក្រុមគោលដៅសំខាន់ជាអ្នកលក់ដូរនៅតាមសាលា បានយល់ដឹងកាន់តែច្បាស់អំពីការរក្សាអនាម័យក្នុងអាជីវកម្មរបស់ខ្លួន។
លោករដ្ឋមន្ត្រីបានអះអាងថា ការអនុត្តបម្រាមលក់ដូរអាហារទាំង៦ប្រភេទនៅសាលារៀនបានល្អ នឹងធ្វើឱ្យសុខភាពរបស់សិស្សសាលា ពិសេសកុមារតូចៗបានល្អប្រសើរ។
ប្រភេទអាហារហាមលក់ក្នុងសាលារៀនមានដូចជា ទី១ អាហារហួសកាលកំណត់ប្រើប្រាស់ ទី២ គ្រឿងស្រវឹង និងថ្នាំជក់ ទី៣ អាហារគ្មានប្រភពច្បាស់លាស់ ទី៤ ភេសជ្ជៈប៉ូវកម្លាំង មានរសជាតិផ្អែមខ្លាំង កាហ្វេ ការ៉េម និងទឹកស៊ីរ៉ូគ្រប់ប្រភេទ ទី៥ ស្ករសូកូឡា ស្ករគ្រាប់ និងស្ករកៅស៊ូគ្រប់ប្រភេទ និងទី៦ ចាហួយ នំដូណាត់ និងនំផ្អែមខ្លាំង។
លោក ហង់ជួន ណារ៉ុន បានបន្ថែមថា៖ «ទី១ នាយកត្រូវអនុវត្តវិធានការឱ្យបានតឹងរ៉ឹង ត្រូវមានការត្រួតពិនិត្យ ហើយប្រសិនបើអ្នកលក់នៅតែបន្តទៀត គឺយើងមិនត្រូវឱ្យគាត់លក់ទេ បញ្ឈប់មិនឱ្យគាត់លក់នៅតាមសាលារៀន»។
ប្រធានសមាគមគ្រូបង្រៀនកម្ពុជាឯករាជ្យ អ្នកស្រី អ៊ុក ឆាយ៉ាវី បានថ្លែងបញ្ជាក់ថា បញ្ហាសុវត្ថិភាពចំណីអាហារ គឺរឿងដ៏ស្មុគស្មាញ ពិបាកដោះស្រាយ។ អ្នកស្រីថា ការលើកកម្ពស់សុខភាពសិស្សសាលាត្រូវមានវិធានការជាប្រព័ន្ធ ក្រសួងនានាត្រូវសហការរួមគ្នាត្រួតពិនិត្យគុណភាពអាហារ ដោយផ្តើមដំបូងតាំងពីការនាំចូល នោះទើបប្រសើរ។
អ្នកស្រី អ៊ុក ឆាយ៉ាវី បានរៀបរាប់ថា៖ «ទាក់ទងនឹងបញ្ហាទាំងអស់ហ្នឹង ខ្ញុំគិតថា វាអត់មានអីបានជោគជ័យទេ លុះត្រាតែនំចំណី (ចំណីប៉ះពាល់សុខភាពកុមារ) ទាំងអស់ហ្នឹង ត្រូវគេបិតកុង ត្រូវមិនឱ្យចូលមកក្នុងប្រទេសកម្ពុជា ចាស៎! នេះបានហៅថា ជោគជ័យ។ បើសិនជាបិទតែក្នុងសាលា ប៉ុន្តែ នៅកន្លែងផ្សេងៗ ម៉ាសន្ធឹក សិស្សសាលាគាត់អាចទៅទិញកន្លែងផ្សេងបានតើ»។
តាមសេចក្ដីប្រកាសព័ត៌មានរបស់ក្រសួងអប់រំ យុវជន និងកីឡា យុទ្ធនាការនេះនឹងបន្តធ្វើនៅសាលាតាមបណ្ដាខេត្តមួយចំនួនទៀតមានខេត្តកំពង់ចាម កំពង់ឆ្នាំង និងខេត្តព្រះសីហនុ ជាដើម។
បើតាមសេចក្ដីប្រកាសព័ត៌មានរបស់អគ្គស្នងការនគរបាលជាតិ កាលពីថ្ងៃទី២៦ ខែមេសា ឆ្នាំ២០១៩ មានករណីពុលចំណីអាហារមួយ នៅសាលាបឋមសិក្សាអូរអំបិល សង្កាត់អូរអំបិល ក្រុងសិរីសោភ័ណ ខេត្តបន្ទាយមានជ័យ បណ្ដាលឱ្យកុមារចំនួន៣៣នាក់ពុល។ សិស្សសាលាមានអការៈឈឺក្បាល ក្អួតចង្អោរ និងចុកពោះ ក្រោយផឹកទឹកដោះគោម៉ាក Angkor Milk ខណៈភ្នាក់ងាររបស់ក្រុមហ៊ុនបានចុះមកផ្សព្វផ្សាយផលិតផលខ្លួន។
របាយការណ៍របស់ក្រសួងសុខាភិបាលបានបញ្ជាក់ថា ឆ្នាំ២០១៨ មានករណីពុលចំណីអាហារសរុបចំនួន ១៨លើក មានអ្នកពុលចំនួន ៨៥២នាក់ ចំណោមនោះមានអ្នកស្លាប់ ១៣នាក់។ រយៈពេល ៣ខែដើមឆ្នាំ២០១៩ មានករណីពុលចំណី ៦លើក មានអ្នកពុលចំនួន២៤៦នាក់ ហើយមានជនរងគ្រោះរហូតស្លាប់ចំនួន២នាក់៕