ពលរដ្ឋរងគ្រោះដោយភ្លើងឆេះផ្ទះនៅផ្លូវរថភ្លើង ក្នុងសង្កាត់ទួលសង្កែទី១ ខណ្ឌឫស្សីកែវ បានលើកជាសំណូមពរ សូមឱ្យអជ្ញាធរដែនដីចាត់វិធានការណ៍បង្ក្រាបអ្នកជួញដូរ និងប្រើប្រាស់គ្រឿងញៀន បញ្ជៀសបញ្ហាអគ្គីភ័យច្រំដែល កែលម្អស្ថានភាពរស់នៅរបស់ប្រជាពលរដ្ឋក្នុងភូមិសង្កាត់។
កាលពីថ្ងៃទី០៦ ខែមករាកន្លងមកនេះ វេលាម៉ោងប្រមាណ ១:៣០នាទីរំលងអាធ្រាត្រ គ្រោះអគ្គិភ័យមួយបានកើតឡើង ក្នុងភូមិបាក់ទូក បណ្តាលឱ្យផ្ទះ និងបន្ទប់ជួលចំនួន ១៥ល្វែង ឆេះអស់ទាំងស្រុង។
ពលរដ្ឋរងគ្រោះក្នុងហេតុការណ៍អគ្គិភ័យ អ្នកស្រី សុខ យ៉ាលី បានរៀបរាប់ថា អគ្គិភ័យបានបំផ្លាញអស់ទ្រព្យសម្បត្តិ ដែលអ្នកស្រីប្រឹងសន្សំពីមុខរបរជាអ្នកអូសរទេះលក់គ្រឿងម្ជូរប្រមាណជាង ១០ឆ្នាំមកហើយ។ អ្នកស្រីថា មនុស្សក្នុងគ្រួសារចំនួន ៥នាក់ បានរួចជីវិតពិតមែន តែត្រូវបាត់បង់មុខរបរទាំងស្រុង ព្រោះភ្លើងឆេះសម្ភារៈប្រើប្រាស់ទាំងអស់។
អ្នកស្រី សុខ យ៉ាលី ប្រាប់ថា៖ «ខ្ញុំអត់ដឹងដែរ ខ្ញុំកំពុងតែសម្រាន្តលក់អ៊ីចឹងទៅ គេឆេះពីនោះមកគេស្រែក។ ម្ចាស់អ្នកមើលការខុសត្រូវ គាត់ស្រែកថា ភ្លើងឆេះហើយៗ ងើបឡើង ខ្ញុំស្ទុះងើបទៅ ឃើញឆេះខាងនោះមកមុន ប្រហែលជាម៉ោង ១ ស្រវ៉ាបានតែខោអាវចាស់តិចតួច។ អត់ដែលសោះអូនអើយ គ្រាន់តែងើបឡើងព្រលឹងព្រលះអីអស់អាលីង ឈរមើលគេផង ឃើញគេស្រវេស្រវាអី ខ្លួនឯងគ្មានទាញអីមកទេ ភ័យពេកទាញតែដៃម៉ែ និងកូនមក។ ខ្ញុំសំណូមពរឱ្យសប្បុរសជន អជ្ញាធរដែនដីជួយជាសម្ភារៈខ្លះដើម្បីរកស៊ីបន្តទៀត»។
ពលរដ្ឋរងគ្រោះដោយភ្លើងឆេះផ្ទះម្នាក់ទៀត អ្នកស្រី ប៉េង សុខ បានអះអាងថា គ្រោះថ្នាក់នាពេលនេះ គ្រួសារអ្នកស្រីខូចខាតទ្រព្យសម្បត្តិ និងផ្ទះ សរុបជាទឹកប្រាក់ប្រមាណជាង ១០ម៉ឺនដុល្លា។
ពលរដ្ឋរូបនេះបន្តថា ការស់នៅក្នុងសហគមន៍នេះប្រមាណជាង ២០ឆ្នាំមកនេះ អ្នកស្រីបានក្លាយជាជនរងគ្រោះដោយភ្លើងឆេះផ្ទះចំនួន ៣ដងហើយ។ អ្នកស្រីប្រាប់ថា ពុំបានដឹងពីមូលហេតុពិតប្រាកដនៃភ្លើងឆេះនេះទេ ប៉ុន្តែ អ្នកស្រីថា ជម្លោះរបស់អ្នកជិតខាងជាអ្នកប្រើប្រាស់ និងជួញដូរគ្រឿងញៀន ហើយមានរបរជាអ្នករើសអេតចាយ តែងបង្កបញ្ហាដល់អ្នករស់នៅក្នុងភូមិជាញឹកញាប់។
អ្នកស្រី ប៉េង សុខ និយាយថា៖ «ឥឡូវនេះ ខ្ញុំសំណូមពរឱ្យរដ្ឋាភិបាលជួយធ្វើផ្លូវ ហើយអនុញ្ញាតឱ្យពលរដ្ឋបានសង់ផ្ទះឱ្យបានសមរម្យផង កុំឱ្យមានរឿងអនាធិបតេយ្យនៅកន្លែងហ្នឹងទៀត។ អូនឯងគិតមើល ប្លុកនេះ គឺប្លុកអនាធិបតេយ្យតាំងពីអ្នកជក់គ្រឿងញៀន លក់គ្រឿងញៀន ល្បែងអីមានគ្រប់មុខទាំងអស់។ អីរស់នៅរាល់ថ្ងៃនេះ ពិបាកចិត្តណាស់ កង្វល់រឿងកូនចៅហ្នឹងខ្លាចតែអារឿងភ្លើងហ្នឹងមួយមុខទេ តែឥលូវត្រូវដល់ពេលហ្នឹងវាមានរឿងភ្លើងឆេះហ្នឹងមែន»។
ប្រធានភូមិបាក់ទូក លោក ង៉ែត ចាន់ បានបញ្ជាក់ថា រហូតមកដល់ថ្ងៃនេះ អាជ្ញាធរនៅពុំទាន់អាចកំណត់អំពីមូលហេតុពិតប្រាកដបណ្តាលឱ្យមានភ្លើងឆេះផ្ទះទាំង ១៥ល្វែងនោះបាននៅឡើយទេ។
លោកថា ភ្លើងឆេះរាលដាលលឿន ហើយខូចខាតច្រើន ព្រោះជាប្រភេទសំណង់មិនរៀបរយ មានបន្ទប់តូចៗសង់ជាប់គ្នា ហើយតភ្ជាប់ដោយផ្លូវតូចចង្អៀតខ្វាត់ខ្វែង ធ្វើឱ្យរថយន្តពន្លត់អគ្គិភ័យពិបាកចូលពន្លត់ភ្លើង។
លោក ង៉ែត ចាន់ និយាយថា៖«ពិតជាអញ្ចឹងមែន នៅម្តុំហ្នឹងវាមានភាពរញ៉េរញ៉ៃណាស់។ បាទដោះស្រាយបង្ក្រាបគាត់ [អ្នកប្រើប្រាស់ និងជួញដូរគ្រឿងញៀន]ដែរ ព្រោះគាត់ដែរមកហ្នឹង គាត់មិនមែនជាអ្នកស្រុកភូមិហ្នឹងទេ គាត់មិនដឹងមកពីណា មកពីណី គាត់ចេះតែមករស់នៅហ្នឹង ព្រោះ វារញ៉េរញ៉ៃខ្លាំងណាស់ មិនអាចកំណត់ថា គាត់មកពីណាពីណីទេ។ ម្តងឃើញ ម្តងបាត់អ៊ីចឹងទៅណា។ នៅម្តុំហ្នឹងធ្លាប់ឆេះបីបួនដងហើយ ដោយសារភាពរញ៉េរញ៉ៃរបស់គាត់»។
ប្រធានភូមិរូបនេះ បានបញ្ជាក់បន្ថែមថា ក្រៅពីសហការណ៍ជាមួយក្រសួងពាក់ព័ន្ធផ្តល់ជំនួយបឋមជាសម្ភារៈប្រើប្រាស់ខ្លះៗដល់អ្នករងគ្រោះទាំង១៧៥គ្រួសារ អាជ្ញាធរពុំទាន់កំណត់ដំណោះស្រាយចំពោះបញ្ហានេះនាជំហានបន្ទាប់នៅឡើយទេ។ តែការកំណត់របស់សង្កាត់សម្រាប់អ្នកចង់សាងសង់ផ្ទះឡើងវិញ ត្រូវទៅសុំច្បាប់នៅសង្កាត់ ហើយឡើងដល់ខណ្ឌ ទើបអាចធ្វើបាន។
នាយប៉ុស្ត៍រដ្ឋបាលសង្កាត់ទួលសង្កែទី១ លោក នង សាបុង បានបញ្ជាក់ថា ការស្រាវជ្រាវបឋមអំពីមូលហេតុករណីភ្លើងឆេះផ្ទះក្នុងភូមិបាក់ទូក បានរកឃើញបញ្ហាចំនួនពីរ ដែលអាចជាចំណុចផ្តើមនៃបញ្ហា ទី១ គឺការឆ្លងចរន្តអគ្គីសនី និងទី២ ជាការផ្ទុះកំប៉ុងហ្គាស។
លោក នង សាបុង ប្រាប់ថា៖«គេដើរទល់ភ្លឺ ផ្ទះហ្នឹងពួកជួល ពួកអីហ្នឹងសុទ្ធតែអ្នករកស៊ីពេលយប់ហ្នឹងហើយ ពួកវត្តភ្នំអីហ្នឹង។ ប៉ុន្តែ មិនទាន់ ១០០ភាគរយទេ ព្រោះកាលពីម្សិលមិញ យើងសិក្សាជាមួយខាងបច្ចេកទេស ជាមួយខាងការិយាល័យអគ្គិភ័យ ចឹងខ្ញុំដាក់នៅក្នុងរបាយការណ៍កំពុងស្រាវជ្រាវដែរ»។
តាមការបញ្ជាក់របស់នាយប៉ុស្ត៍រូបនេះ ករណីជួយសង្គ្រោះភ្លើងឆេះផ្ទះនៅភូមិបាក់ទូកកាលពីថ្ងៃម្សិលមិញនេះ សមត្ថកិច្ចបានប្រើរថយន្តពន្លត់អគ្គីភ័យសរុបចំនួន ៤១គ្រឿង បាញ់ទឹកអស់ ៨២គ្រឿង រហូតម៉ោង ៣ទៀបភ្លឺទើបរលត់ទាំងស្រុង។ ប៉ុន្តែ លោកថា គ្រោះអគ្គីភ័យនេះ មិនបណ្តាលឱ្យប្រជាពលរដ្ឋរងគ្រោះដល់អាយុជីវិតឡើយ៕
