មន្ទីររៀបចំដែនដី នគរូបនីយកម្ម សំណង់ និងសុរិយោដី ខេត្តបន្ទាយមានជ័យ រកឃើញការដ្ឋានសំណង់ជិត២០០កន្លែងនៅខេត្តបន្ទាយមានជ័យ ចាប់ពីថ្ងៃទី០៦ ខែមករាមក ដោយរកឃើញថាការសាងសង់គ្មានច្បាប់អនុញ្ញាត និងខ្លះទៀតខុសបច្ចេកទេស។
ប្រធានមន្ទីររៀបចំដែនដី នគររូបនីយកម្ម សំណង់ និងសុរិយោដី ខេត្តបន្ទាយមានជ័យ លោក អេង ណារិទ្ធិ មានប្រសាសន៍កាលពីថ្ងៃព្រហស្បតិ៍ម្សិលមិញថា ការផ្អាកការដ្ឋានសំណង់នាក្រុងប៉ោយប៉ែតនេះ គឺអនុវត្តទៅតាមច្បាប់ និងធ្វើឡើងសំដៅការពារអាយុជីវិតប្រជាពលរដ្ឋ។
លោក អេង ណារិទ្ធិ៖ «ជំហានទី១ យើងធ្វើកន្លែងដែលមានហានិភ័យសិន។ យើងឆែកបច្ចេកទេស គុណភាពសំណង់ និងបទបញ្ញត្តិច្បាប់ ទាំងបីហ្នឹងបើខ្វះណាមួយ ទាំងបីហ្នឹង បើខ្វះណាមួយក៏យើងបិទដែរ ឱ្យគាត់បំពេញសិន បើអាណាខូចខាតយើងនឹងឈានដល់ការរុះរើ បើសិនជាមាន។ យើងមិនមែនផ្អាកត្រឹមតែសំណង់អត់ច្បាប់ទេ សំណង់មានច្បាប់ក៏យើងផ្អាកដែរ ឧទាហរណ៍ថា សំណង់នោះមានច្បាប់សុំច្បាប់ធ្វើហើយតែធ្វើលើសជាន់ អាហ្នឹងគាត់មានច្បាប់ហើយតែវាខុស។»
លោកបន្តថា អាជ្ញាធរជំនាញនឹងចាត់វិធានការថែមទៀតចំពោះសំណង់ដែលខុសច្បាប់ទូទាំងខេត្តបន្ទាយមានជ័យ។
មន្ទីរប្រកាសតាមទំព័រហេ្វសប៊ុកខ្លួនថា សំណង់ទាំងនោះត្រូវផ្អាកដោយសារតែអាជ្ញាធរជំនាញរកឃើញបញ្ហាមួយចំនួនរួមមាន សំណង់ពុំមានលិខិតអនុញ្ញាតសាងសង់ និងលិខិតអនុញ្ញាតបើកការដ្ឋាន ការដ្ឋានសាងសង់ ពុំមានគម្រោងប្លង់ (ស្ថាបត្យកម្ម គ្រឿងផ្គុំសំណង់ មេការនិកទឹក និងភ្លើង) ការដ្ឋានសំណង់ពុំមានរបាយការណ៍ពិសោធន៍ដី កង្វះអ្នកជំនាញក្នុងវិស័យសំណង់ ឬអ្នកវិជ្ជាជីវៈក្នុងវិស័យសំណង់ ឬក្រុមហ៊ុនប្រកបដោយវិជ្ជាជីវៈក្នុងវិស័យសំណង់ ហើយសំណង់ខ្លះពុំមានអាជ្ញាបណ្ណត្រឹមត្រូវ និងពុំមានអ្នកគ្រប់គ្រងការដ្ឋានសំណង់ជាដើម។
មន្ទីររៀបចំដែនដី នគរូបនីយកម្ម សំណង់ និងសុរិយោដី រកឃើញថា សំណង់ដែលសង់ឡើងមិនស្របច្បាប់មានចំនួន១៨៦ទីតាំង ដែលទីតាំងភាគច្រើននៅទីក្រុងប៉ោយប៉ែត។ ក្នុងនោះអាជ្ញាធរបានផ្អាកការដ្ឋានសំណង់ជាង៥០កន្លែង ចំណែកទីផ្សេងទៀតនឹងបន្តនីតិវិធីជាបន្តបន្ទាប់។
មេជាងបូកអគារធនាគារវឌ្ឍនៈក្រុងប៉ោយប៉ែតដែលត្រូវបានអាជ្ញាធរផ្អាកការដ្ឋានដែរនោះ លោក កុង សុខុន បានប្រាប់វីអូឌីថា ក្រុមការងាររបស់លោកអនុវត្តតាមការសម្រេចរបស់អាជ្ញាធរជំនាញ និងក្រុមហ៊ុនម្ចាស់សំណង់។ លោកថា ក្រុមកម្មករដឹងតែពីធ្វើការប៉ុណ្ណោះ រឿងច្បាប់អនុញ្ញាត ឬមិនអនុញ្ញាតជាការងាររបស់ម្ចាស់សំណង់។
លោក កុង សុខុន៖ «បងអើយ បើគេផ្អាកការដ្ឋានឬអី មានតែតាមហ្នឹងទៅ។ ដូចខ្ញុំ ខ្ញុំម៉ៅពីក្រុមហ៊ុន ហើយកូនជាងបើកលុយពីខ្ញុំ បើបិទការដ្ឋាន គ្មានការងារធ្វើ ខ្ញុំក៏មិនមានលុយបើកឱ្យជាងទៅតាមនោះដែរ។ តែការងារនៅប៉ោយប៉ែតនេះ ខ្ញុំធ្វើចប់អីហើយអត់មានអីប៉ះពាល់ខ្លាំងក្លាទេ។»
ប្រធានសហជីពកម្មករសំណង់ និងទេសចរណ៍ លោក សុខ គីន មានប្រសាសន៍ថា លោកស្វាគមន៍ចំពោះការគិតគូរពីគុណភាពសំណង់ និងការចាត់វិធានការចំពោះសំណង់ខុសច្បាប់។ ប៉ុន្តែ លោកស្នើឱ្យអាជ្ញាធរអនុវត្តច្បាប់តាំងពីមុនសាងសង់ ដើម្បីបញ្ចៀសបញ្ហាដែលកើតមានឡើងបណ្ដាលមកពីសំណង់ខុសច្បាប់ទាំងអស់ក្នុងប្រទេសកម្ពុជា។
លោក សុខ គីន៖ «វាជាការមួយដែលល្អដែលផ្អាកសំណង់ខុសច្បាប់ហ្នឹង ក៏ប៉ុន្តែវាអាចប៉ះពាល់ដល់របស់ការងារកម្មករនិយោជិត ដែលគ្នាខំស្កាត់ពីនាយដល់អាយដើម្បីធ្វើការ គ្នាធ្វើការក្នុងស្រុក សង្ឃឹមស្នើសុំឱ្យរាជរដ្ឋាភិបាលថ្នាក់ក្រសួងស្ថាប័នមន្ទីរហ្នឹងគួរតែពិនិត្យមុននឹងឱ្យអ្នកវិនិយោគសាងសង់។ បើអនុញ្ញាតឱ្យគួរតែពង្រឹងឱ្យក្រុមហ៊ុនទាំងនោះអនុវត្តតាមផ្លូវច្បាប់។»
ទោះជាបែបណាក្ដី មន្ទីររៀបចំដែនដី នគររូបនីយកម្ម សំណង់ និងសុរិយោដី ខេត្តបន្ទាយមានជ័យ បញ្ជាក់ថា ការដ្ឋានសំណង់ដែលត្រូវបានផ្អាក នឹងត្រូវអនុញ្ញាតឱ្យដំណើរការសាងសង់ឡើងវិញ លុះត្រាណាតែអនុវត្តការណែនាំមួយចំនួនដូចជា ម្ចាស់សំណង់ត្រូវបំពេញនូវចំណុចខ្វះខាត ផ្នែកបច្ចេកទេស និងច្បាប់ ម្ចាស់សំណង់ត្រូវរកអ្នកត្រួតពិនិត្យ និងបញ្ជាក់ ឬក្រុមហ៊ុនត្រួតពិនិត្យ និងបញ្ជាក់ ដែលមានអាជ្ញាបណ្ណ មកពិនិត្យ វិភាគ គណនា ពិសេសដើម្បីធានាសុវត្ថិភាពសំណង់។
បើតាមប្រធានមន្ទីររៀបចំដែនដីខេត្តបន្ទាយមានជ័យ លោក អេង ណារិទ្ធិ បញ្ជាក់ថា ការផ្អាកការដ្ឋានសំណង់នៅប៉ោយប៉ែត គឺធ្វើឡើងតាមច្បាប់សំណង់ និងព្យាយាមការពារកុំឱ្យមានគ្រោះបាក់អគារកើតឡើងនៅខេត្តបន្ទាយមានជ័យ។
ទាក់ទងនឹងគ្រោះបាក់អគារនេះ រយៈពេលមិនដល់៧ខែផង កម្ពុជាមានគ្រោះបាក់សំណង់អគារកំពុងសាងសង់បីលើក បណ្ដាលឱ្យមានកម្មករសំណង់ ៦៥នាក់ស្លាប់ ៦៤នាក់រងរបួស។
កាលពីថ្ងៃទី២២ ខែមិថុនា ឆ្នាំ២០១៩ កម្មករសំណង់ខ្មែរ ២៨នាក់ បានស្លាប់ និង២៦នាក់ទៀតបានរងរបួស ក្រោយពីសំណង់អគារដែករបស់ជនជាតិចិននៅខេត្តព្រះសីហនុ បានបាក់រលំ។
កាលពីថ្ងៃទី២ ខែធ្នូកន្លងមកនេះ អគារសាលាឆាន់ក្នុងវត្តប្រាសាទគោកចក ស្ថិតក្នុងក្រុងសៀមរាប ក៏បានបាក់រលំផងដែរ ដោយបណ្ដាលឱ្យមនុស្ស ៣នាក់ស្លាប់ និង ១៦នាក់ផ្សេងទៀតរងរបួស និងលើកទី៣ បាក់អគារនៅក្រុងកែប បណ្ដាលឱ្យមនុស្សស្លាប់៣៦នាក់ និងរបួស២៣នាក់៕
