អ្នកនាំពាក្យក្រសួងសាធារណការ និងដឹកជញ្ជូន លើកឡើងថា ករណីក្រសួងរៀបចំស្លាកលេខពិសេសសម្រាប់រថយន្តដែលមានតម្លៃពី៥០០ ទៅ២សែន៥ម៉ឺនដុល្លារនោះ គឺផ្តល់ជម្រើសល្អ មានតម្លាភាព និងបង្ខិតសេវាឱ្យបានជិតប្រជាពលរដ្ឋ។
លោក ហ៊ាង សុទ្ធាយុត្តិ បានអះអាងថា តាំងពីថ្ងៃចាប់ផ្តើមរហូតដល់ថ្ងៃម្សិលមិញ ការលក់លេខចុះបញ្ជីពិសេសផ្ទាល់ខ្លួនសម្រាប់រថយន្ត ទទួលបានការចាប់អារម្មណ៍ច្រើនពីសាធារណជន ដោយពលរដ្ឋរាប់ម៉ឺននាក់បានចូលស្វែងរកលេខនៅក្នុងគេហទំព័ររបស់ក្រសួង។
លោកថា ស្លាកលេខពិសេសដែលមានតម្លៃពី២លានរៀន(ប្រមាណ៥០០ដុល្លារ) ដល់មួយពាន់លានរៀល(ប្រមាណ២៥ម៉ឺនដុល្លារ) បានផ្តល់នូវជម្រើសយ៉ាងទូលាយសម្រាប់ពលរដ្ឋ ដែលចង់បានលេខសម្គាល់លក្ខណៈពិសេសប្រចាំខ្លួន អាចផ្ទេរជាមរតកដល់ជំនាន់ក្រោយរបស់ខ្លួនបានថែមទៀត។
លោក ហ៊ាង សុទ្ធាយុត្តិ បានបញ្ជាក់ថា៖ «ក្នុងនាមមន្ត្រីរាជការមួយរូប ខ្ញុំយល់ថា វាបានផ្តល់នូវជម្រើសមួយល្អ ទៅប្រជាពលរដ្ឋ។ គឺយើងធ្វើម៉េចផ្តល់សេវាហ្នឹងឱ្យវាមានភាពងាយស្រួល សាមញ្ញ តម្លាភាព បង្ខិតសេវាទៅជិតប្រជាពលរដ្ឋ»។
លោក ទី ឡុង អនុប្រធាននៃនាយកដ្ឋាននគរបាលចរាចរណ៍ និងសណ្ដាប់ធ្នាប់សាធារណៈ បានបញ្ជាក់ថា លោកទទួលស្គាល់ស្លាកលេខពិសេសរបស់រថយន្តថ្មីអាចធ្វើឱ្យពលរដ្ឋពិបាកចងចាំជាងស្លាកលេខចាស់។ ប៉ុន្តែ នីតិវិធីថ្មីរបស់ក្រសួង ផ្ទុកព័ត៌មានលម្អិតរបស់ម្ចាស់រថយន្តអាចទាញយកបានរហ័សតាមរយៈការស្គែនបារកូដស្លាកលេខ នឹងជួយដល់សមត្ថកិច្ចតាមចាប់ជនប្រព្រឹត្តិល្មើសបានរហ័ស។
លោក ទី ឡុង៖ «ទាំងលេខចាស់ និងលេខថ្មី គឺដូចគ្នា គឺ៨ខ្ទង់ដូចគ្នា គាត់[ពលរដ្ឋ]ថា គាត់ពិបាកចាំ តែអាចាស់បើសិនគាត់មិនចាំ ឬគាត់ចាំ គាត់ថតលេខបាន ពេលសមត្ថកិច្ចយើងស្រាវជ្រាវទៅ ជួនកាលមានការឆកល្វែងខ្លះ គឺមិនអាចរកឃើញបាន១០០ភាគរយ។ ដោយឡែកស្លាកលេខថ្មីនេះ បើសិនជាប្រជាពលរដ្ឋពេលមានគ្រោះថ្នាក់អី គាត់ថតបាន យើងធានាថា រកឃើញជូនគាត់បាន១០០ភាគរយតែម្ដង»។
កាលពីថ្ងៃទី០៧ ខែមករាកន្លងមកនេះ ក្រសួងសាធារណការ និងដឹកជញ្ជូន បានប្រកាសជាផ្លូវការបើកឱ្យដំណើរការការលក់លេខចុះបញ្ជីពិសេសផ្ទាល់ខ្លួនសម្រាប់រថយន្ត។ សកម្មភាពនេះត្រូវបានលោករដ្ឋមន្ត្រី ស៊ុន ចាន់ថុល អះអាថា ជាការផ្តល់ជម្រើស និងបំពេញតម្រូវការប្រជាពលរដ្ឋដែលចង់បានលេខលក្ខណៈពិសេស ហើយអាចប្រមូលចំណូលជួយជាតិ។
ប្រធានសមាគមសម្ព័ន្ធនិស្សិតបញ្ញវន្តខ្មែរ លោក មួង សូនី បានរៀបរាប់ថា ការច្នៃប្រឌិតវិធីសាស្ត្រថ្មីៗដើម្បីប្រមូលចំណូលជួយជាតិជារឿងល្អ តែការលក់លេខពិសេសនេះអាចប្រមូលចំណូលបានតិចតួចប៉ុណ្ណោះ ព្រោះកម្ពុជា មានពលរដ្ឋក្រីក្រច្រើនជាងអ្នកមាន។ លោកថា សកម្មភាពថ្មីនេះបានត្រឹមបង្កើនអំពើពុករលួយ ហើយមិនអាចរក្សាលក្ខណៈពិសេសរបស់ម្ចាស់រថយន្តបានប្រាកដឡើយ ព្រោះអ្នកទទួលផលពីចោរនៅតែអាចលួចធ្វើស្លាកលេខរថយន្តថ្មីបាន។
លោក មួង សូនី ៖ «បើសិនជារដ្ឋធ្វើឡើងក្នុងបំណងដើម្បីឱ្យបានចំណូលពន្ធ វាជារឿងគួរឱ្យអស់សំណើចណាស់ វាអត់សំណំប៉ុន្មានទេ វាបានតិចពេក ហើយមនុស្សគេមិនសូវរវល់អារឿងស្លាកលេខហ្នឹងប៉ុន្មានទេ។ គ្រាន់តែធ្វើឱ្យល្អមើល ឬបញ្ជាក់ថា ប្រទេសហ្នឹងមានសន្តិភាព មានការរីកចម្រើន ឬមានការយកចិត្តទុកដាក់លើប្រជាពលរដ្ឋ អាហ្នឹងខ្ញុំគិតថា វាជារូបភាពនយោបាយច្រើនជាងដែរ»។
ប្រធានអង្គការសម្ព័ន្ធគណនេយ្យភាពសង្គមកម្ពុជា លោក សន ជ័យ បានលើកជាក្ដីបារម្ភរបស់ខ្លួនថា ការបង្កើតប្រព័ន្ធគ្រប់គ្រងទិន្នន័យរបស់ម្ចាស់រថយន្ត តាមរយៈការបំពាក់បារកូដពិសេសលើស្លាករថយន្តថ្មីរបស់ក្រសួង នឹងអាចនាំមកនូវគ្រោះថ្នាក់ដល់ម្ចាស់កម្មសិទ្ធ ប្រសិនបើគ្មានការគ្រប់គ្រងត្រឹមត្រូវ។ លោកថា បើក្រសួងកំណត់លក្ខខណ្ឌលើការពិនិត្យទិន្នន័យទូទៅរបស់ម្ចាស់យានយន្តបានត្រឹមសមត្ថកិច្ច នោះគ្មានបញ្ហាឡើយ តែបើសាធារណជនទូទៅអាចចូលមើលព័ត៌មានលម្អិតបាន នោះវានឹងប៉ះពាល់ដល់សិទ្ធបុគ្គល។
លោក សន ជ័យ ៖ «កុំភ្លេចថា គំនិតច្នៃប្រឌិតមួយចំនួន ក៏វាបានផ្តល់នូវគុណវិបត្តិរបស់វាដែរ ជាពិសេសសិទ្ធទាក់ទងនឹងសិទ្ធឯកជន ឬព័ត៌មានឯកជននៅក្នុងទិន្នន័យទាំងអស់នេះ។ នេះជារឿងបារម្ភមួយ។ ជាយោបល់ គេត្រូវគិតអំពីការគោរពទៅលើសិទ្ធឯកជន ហើយនិងការសហការគ្នាដើម្បីដោះស្រាយបញ្ហាដែលកើតឡើងដោយសារតែការច្នៃប្រឌិត»។
នាយកមជ្ឈមណ្ឌលសិក្សាគោលនយោបាយ លោក ចាន់ សុផល តាមរយៈសំណេរដែលផ្សព្វផ្សាយតាមបណ្ដាញទំនាក់ទំនងសង្គមហ្វេសប៊ុក (Facebook) លោកបានបង្ហាញការយល់ឃើញរបស់ខ្លួនថា សកម្មភាពថ្មីរបស់ក្រសួងនេះ បានត្រឹមផ្តល់ចំណាញដល់អ្នកមានលុយច្រើន បង់លុយឱ្យរដ្ឋប៉ុណ្ណោះ។
ឯផលវិបាកចម្បង វាបានក្លាយជាសកម្មភាពជំរុញនិន្នាការសម្ភារនិយម ឬជំនឿនិយមទៅវិញ។ សម្រាប់ពលរដ្ឋដែលចេះតែអក្សរខ្មែរ នឹងមានការលំបាកមិនអាចចងចាំអត្តសញ្ញាណរបស់រថយន្តបង្កបញ្ហាបានពេលមានគ្រោះថ្នាក់ចរាចរណ៍កើតឡើង ព្រោះស្លាកលេខរថយន្តមានឈ្មោះជាអក្សរឡាតាំងស្រដៀងគ្នាច្រើន។
លោក ចាន់ សុផល បានសង្កត់ធ្ងន់ថា៖ «យកល្អ គួរមានការកំណត់គោលដៅនៃការប្រើប្រាស់ប្រើចំណូលជាក់លាក់នេះ ដូចជាការយកទៅជួយមន្ទីរពេទ្យគន្ធបុប្ផា ឬមូលនិធិសង្គមណាមួយសម្រាប់ជួយជនខ្សត់ខ្សោយ។ សូមកុំមានការច្រឡំថា យើងត្រូវតែ ឬគួរតែដាក់ឈ្មោះយើង នៅលើយានយន្តយើងដូចគេអ្នកមាននោះទេ។ វាជាប្រព័ន្ធសម្រាប់មនុស្សមួយក្រុមតូចប៉ុណ្ណោះ»។
ប្រធាននៃវិទ្យាស្ថានជាតិសុវត្ថិភាពចរាចរណ៍ផ្លូវគោក លោក គង់ រតនៈ បានថ្លែងយល់ស្របនឹងការលើកឡើងរបស់មន្ត្រីប៉ូលីសចរាចរណ៍ ដែលលើកឡើងថា ស្លាកលេខរថយន្តថ្មីបានផ្ទុកព័ត៌មានលម្អិតជួយសម្រួលដល់ការតាមចាប់ជនបង្ករ ពេលមានគ្រោះថ្នាក់ចរាចរណ៍។ ប៉ុន្តែ បញ្ហានោះ គឺពលរដ្ឋពិបាកចង់ចាំស្លាកលេខរថយន្ត មិនអាចកំណត់អត្តសញ្ញាណម្ចាស់យានយន្ត ហើយចុងក្រោយនៅតែមិនអាចដោះស្រាយបញ្ហាប្រកបដោយប្រសិទ្ធភាពដដែល។
លោក គង់ រតនៈ បន្តថា៖ «សម្រាប់ខ្ញុំ យន្តការនៃការកៀរគរចំណូលវាជារឿងល្អ ដែលធ្វើឱ្យសេដ្ឋកិច្ចយើងគ្រាន់បើ។ ក៏ប៉ុន្តែ ទាក់ទងជាមួយនឹងផ្នែកខាងសុវត្ថិភាពវិញ ខ្ញុំគិតថា យើងអត់ទាន់ជួបបញ្ហាអីធ្ងន់ធ្ងរទាក់ទងទៅនឹងរឿងស្លាកលេខហ្នឹងទេ ប៉ុន្តែ ខ្ញុំសំណូមពរថា ឱ្យប្រជាពលរដ្ឋដែលគាត់បើកបរហ្នឹងគាត់ព្យាយាមគោរពច្បាប់ទាំងអស់គ្នាទៅ អាហ្នឹងកាត់បន្ថយបានច្រើនហើយ»។
សេចក្ដីប្រកាសព័ត៌មានរបស់ក្រសួងសាធារណការ និងដឹកជញ្ជូន ស្លាកលេខពិសេសថ្មីទាំងបីប្រភេទ គឺ ទិញ ស្នើទិញ និងការដាក់ដេញថ្លៃ ចំនួនបីម៉ឺនប្រាំពាន់ សម្រាប់សម្គាល់រថយន្ត ត្រូវប្រកាសដាក់លក់ចាប់ពីថ្ងៃទី០៧ ខែមករា ឆ្នាំ២០២០នេះតទៅ។ លេខពិសេសផ្ទាល់ខ្លួន គឺសំដៅលើប្រភេទលេខចុះបញ្ជី ដែលផ្នែកខាងលើសរសេរអក្សរខ្មែរ “កម្ពុជា” ផ្នែកកណ្ដាលជាលេខចុះបញ្ជីមានលេខ ឬ អក្សរឡាតាំងមិនលើសពី ៨(ប្រាំបី)ខ្ទង់ និងផ្នែកខាងក្រោមសរសេរអក្សរឡាតាំង“CAMBODIA” នៅពីក្រោមបន្ទាត់ផ្តេក។ ស្លាកលេខពិសេសផ្ទាល់ខ្លួនអាចដាក់ឈ្មោះ ឬ លេខដែលខ្លួនពេញចិត្តបាន លើកលែងតែឈ្មោះទីកន្លែងប្រវត្តិសាស្ត្រ ឈ្មោះប្រាសាទ ឈ្មោះរាជធានី-ខេត្ត ឈ្មោះក្រសួង-ស្ថាប័ន គណបក្សនយោបាយ ឈ្មោះថ្នាក់ដឹកនាំជាន់ខ្ពស់ និងជនល្បីឈ្មោះ ជាដើម។