ដំណើរការសវនាការលើអតីតមេដឹកនាំបក្សប្រឆាំង លោក កឹម សុខា បានចាប់ផ្ដើមហើយនៅព្រឹកថ្ងៃនេះ ២ឆ្នាំក្រោយពីលោកត្រូវបានចាប់ខ្លួននៅក្នុងសំណុំរឿងដែលរដ្ឋាភិបាលចោទថា «ក្បត់ជាតិ» និងឃុបឃិតជាមួយបរទេស។
អ្នកសារព័ត៌មានវីអូឌីដែលបានចុះទៅតាមដាននៅឯគេហដ្ឋានរបស់លោក កឹម សុខា នៅម្ដុំទួលគោក បានមើលឃើញមេបក្សប្រឆាំងរូបនេះ អង្គុយនៅក្នុងរថយន្តតូយ៉ូតាមួយ ដែលត្រូវបានបើកចេញពីផ្ទះនៅម៉ោងប្រហែល ៧ និង ២០ព្រឹក។
នៅម៉ោងប្រហែល ៧ និង ៣៥នាទី លោក កឹម សុខា បានដើរចូលសាលាដំបូងរាជធានីភ្នំពេញ ខណៈសន្តិសុខជុំវិញបរិវេណតុលាការត្រូវបានរឹតបន្តឹង។
នៅឯខាងមុខសាលាដំបូងរាជធានីភ្នំពេញឯណោះវិញ ក្រុមអតីតថ្នាក់ដឹកនាំបក្សប្រឆាំង ក្រុមសិទ្ធិមនុស្ស សកម្មជន និងអ្នកគាំទ្រ បានប្រមូលផ្ដុំគ្នាតាមដានព្រឹត្តិការណ៍នេះ ប៉ុន្តែ ពួកគេមិនត្រូវបានអនុញ្ញាតឱ្យចូលស្ដាប់សវនាការក្នុងបន្ទប់សវនាការនោះឡើយ។
មេដឹកនាំគណបក្សសង្គ្រោះជាតិ លោក កឹម សុខា ត្រូវបានសមត្ថកិច្ចចាប់ខ្លួនទាំងកណ្ដាលអធ្រាត្រថ្ងៃទី០៣ ខែកញ្ញា ឆ្នាំ២០១៧ នៅឯគេហដ្ឋានរបស់លោកនៅម្ដុំខណ្ឌទួលគោក។
មេដឹកនាំបក្សប្រឆាំងរូបនេះ ត្រូវបានសមត្ថកិច្ចចាប់បញ្ជូនទៅដាក់ឃុំនៅពន្ធនាគារត្រពាំងផ្លុង ស្ថិតនៅឯទឹកដីខេត្តត្បូងឃ្មុំ ជាប់ព្រំដែនប្រទេសវៀតណាម មុននឹងលោកត្រូវបានបញ្ជូនមកដាក់ឃុំនៅក្នុងផ្ទះកាលពីខែកញ្ញា ឆ្នាំ២០១៨កន្លងមក។
លោក កឹម សុខា ត្រូវបានដោះលែងឱ្យនៅក្រៅឃុំបណ្ដោះអាសន្នកាលពីថ្ងៃទី៧ ខែវិច្ឆិកា ឆ្នាំ២០១៩កន្លងមក ប៉ុន្តែ មិនត្រូវបានអនុញ្ញាតឱ្យធ្វើដំណើរទៅក្រៅប្រទេសនោះឡើយ៕