មន្ត្រីជាន់ខ្ពស់ក្រសួងបរិស្ថាន បដិសេធការចុះផ្សាយដែលថា គុណភាពខ្យល់ក្នុងរាជធានីភ្នំពេញ មានកម្រិតពុលខ្ពស់ ដោយថា ព័ត៌មាននេះផ្ទុយគ្នានឹងលទ្ធផលនៃការវាស់វែងកម្រិតគុណភាពខ្យល់របស់មន្ត្រីជំនាញ។
អ្នកនាំពាក្យក្រសួងបរិស្ថាន លោក នេត ភក្ត្រា បានថ្លែងអះអាងថា កម្រិតគុណភាពខ្យល់នៅក្នុងប្រទេសកម្ពុជា ពិសេសនៅរាជធានីភ្នំពេញ មានលក្ខណៈល្អប្រសើរនៅឡើយទេ។ លោកថា របាយការណ៍នៃការវាស់វែងកម្រិតគុណភាពខ្យល់របស់មន្ត្រីជំនាញបង្ហាញថា សន្ទស្សន៍គុណភាពខ្យល់នៅកម្ពុជាថ្ងៃនេះ ស្ថិតនៅចន្លោះពី២០ ទៅជាង៣០មីក្រូម៉ែត ឋិតក្រោមកម្រិតប្រកាសអាសន្នដែលមានកំហាប់រហូតជាង៥០មីក្រូម៉ែតឯណោះ។
លោក នេត ភក្ដ្រា បានបញ្ជាក់បន្ថែមថា៖ «គ្មានបញ្ហាអ្វីទេបាទ! ហើយបើសិនជាមានបញ្ហាអ្វី គឺយើងនឹងជម្រាបជូនដល់សាធារណជនឱ្យបានដឹង ពីព្រោះយើងមិនអាចវាយតម្លៃដោយការមើលនឹងភ្នែកបានទេបាទ»។
អ្នកនាំពាក្យរូបនេះ បានប្រកាសច្រានចោលព័ត៌មានរបស់គេហទំព័រ AirVisual ជាគេហទំព័រដែលតាមដាន និងផ្សព្វផ្សាយព័ត៌មានអំពីគុណភាពខ្យល់ បង្ហាញថា ព្រឹកនេះ នៅភ្នំពេញកំពុងមានវត្តមានខ្យល់ពុលរហូតកម្រិត១៦៦ ថាជាព័ត៌មានមិនពិត។
សន្ទស្សន៍គុណភាពខ្យល់ កំណត់ថា កម្រិតកំហាប់ភាគល្អិតនៃខ្យល់ ដែលមានវិជ្ជមាត្រ០ ដល់៥០មីក្រូម៉ែត គឺល្អ ៥១ ទៅ១០០មីក្រូម៉ែត គឺមធ្យម ១០១ទៅ ២០០មីក្រូម៉ែត គឺប៉ះពាល់សុខភាព ២០១ ដល់៣០០មីក្រូម៉ែត ប៉ះពាល់ខ្លាំងដល់សុខភាព ហើយកម្រិត៣០១មីក្រូម៉ែតឡើងទៅ គឺចាត់ទុកក្នុងកម្រិតគ្រោះថ្នាក់៕
