អង្គការតម្លាភាពអន្តរជាតិ បានចាត់ថ្នាក់កម្ពុជាក្នុងស្ថានភាពអាក្រក់ជាងមុននៃអំពើពុករលួយសម្រាប់ឆ្នាំ២០១៩ ហើយបើប្រៀបធៀបជាមួយប្រទេសទាំង១០នៅក្នុងតំបន់អាស៊ាន កម្ពុជាពុករលួយខ្លាំងជាងគេ។
នៅក្នុងរបាយការណ៍អង្គការតម្លាភាពអន្តរជាតិចេញផ្សាយនៅថ្ងៃនេះ បង្ហាញថា កម្ពុជាទទួលបានពិន្ទុ២០ក្នុងចំណោម១០០ពិន្ទុ។ បើនិយាយពីពិន្ទុ គឺកម្ពុជាទទួលបាន២០ ដូចកាលពីឆ្នាំ២០១៨ ប៉ុន្តែ សម្រាប់ចំណាត់ថ្នាក់គឺធ្លាក់ចុះមួយកម្រិត គឺពី១៦១ ទៅ១៦២។
ចំណែកប្រទេសនៅអាស៊ានដែលមានចំណាត់ថ្នាក់មិនល្អដែរតែស្ថិតនៅលើកម្ពុជាមាន ប្រទេសវៀតណាម និងឡាវ គឺពិន្ទុបាន២៩ដូចគ្នា។
នៅក្នុងតំបន់អាស៊ាន ប្រទេសសិង្ហបុរីទទួលបានចំណាត់ថ្នាក់ល្អជាង គឺទទួលបានពិន្ទុ៨៥ ចំណាត់ថ្នាក់ល្អលេខ៤លើពិភពលោក និងលេខ១នៅអាស៊ាន។
អង្គការតម្លាភាពអន្តរជាតិ បានសិក្សាលើ១៨០ប្រទេស និងតំបន់លើពិភពលោក ក្នុងចំណោម១៨០។ ចំណែកពិន្ទុ០ ប្រទេសពុករលួយបំផុត និងពិន្ទុ១០០ជាប្រទេសស្អាតស្អំបំផុត។