មន្ត្រីអះអាថា ក្រោយពីពន្ធនាគារព្រៃសចង្អៀតលែងដាក់អ្នកជាប់ឃុំទៀតបាន ក្រសួងសម្រេចយកអ្នកដែលត្រូវជាប់ឃុំក្រោយៗទៀត ទៅឃុំនៅពន្ធនាគារក្រោមការគ្រប់គ្រងរបស់អាជ្ញាធររាជធានីភ្នំពេញ(PJ)វិញ គឺឃុំនៅអគារថ្មីដែលទើបសាងសង់បន្ថែម។
អគ្គនាយករងនៃអគ្គនាយកដ្ឋានពន្ធនាគារក្រសួងមហាផ្ទៃ លោក បេ ទាឡេង ឱ្យVODដឹងនៅថ្ងៃនេះថា ចាប់ពីថ្ងៃទី១ ខែមករាមក ពន្ធនាគារព្រៃស មិនទទួលដាក់អ្នកជាប់ឃុំទៀតទេ។ លោកថា ព្រោះមានស្ថានភាពចង្អៀត មានអ្នកជាប់ឃុំ ជាង១ម៉ឺននាក់។
មន្ត្រីរដ្ឋាភិបាលរូបនេះបន្តថា ក្រសួងសម្រេចយកពន្ធនាគារ PJ ថ្មី របស់សាលារាជធានី ដាក់ជំនួសវិញ។
លោកថា៖ «នៅម១ វា៩ពាន់ជាង នៅម២ ប្រហែលជា២ពាន់ យើងផ្អាកសិន ដើម្បីឱ្យវាទូលាយបន្តិច ណាមួយ PJ យើងវានៅទូលាយ។ អ៊ីចឹងយើងយកមកដាក់នៅ PJ សិន»។
បើតាមលោក បេ ទាឡេង អគារពន្ធនាគារថ្មីរបស់សាលារាជធានីនេះ អាចដាក់ជនជាប់ឃុំបានចន្លោះពី ១០០០ ទៅ១៥០០នាក់ ហើយថា បច្ចុប្បន្នមានអ្នកជាប់ឃុំនៅទីនោះជាង៤០០នាក់ហើយ៕
