ម៉ោង ៤:៤០ នាទីរសៀល ជប៉ុន រកឃើញអ្នកផ្ទុកមេរោគកូរ៉ូណា ២នាក់បន្ថែមទៀត ក្នុងនោះ ម្នាក់ជា អ្នកបើកបរដឹកអ្នកដំណើរមិនដែល ធ្វើដំណើរទៅទីក្រុងវ៉ូហានប្រទេសចិនទេ។ ចំនួន២នាក់បន្ថែមទៀតនេះ ធ្វើឱ្យអ្នកផ្ទុកមេរោគនេះនៅជប៉ុនកើនឡើងដល់៥នាក់។នេះបើតាមក្រសួងសុខាភិបាលជប៉ុន។
ម៉ោង ៤:០០ នាទី រសៀល សិង្ហបុរីរកឃើញអ្នកផ្ទុកមេរោគកូរ៉ូណា ២នាក់ទៀត។ អ្នកទាំងនោះ ជាជនជាតិចិនមកពីទីក្រុងវ៉ូហាន។ នេះបើតាមសេចក្តីប្រកាសព័ត៌មានរបស់ក្រសួងសុខាភិបាលសិង្ហបុរី។ ចំនួន៣នាក់បន្ថែមទៀតនេះ ធ្វើឱ្យអ្នកផ្ទុកមេរោគកូរ៉ូណា នៅក្នុងប្រទេសសិង្ហបុរីកើនឡើងដល់៧នាក់។
ម៉ោង២:៥០ នាទីរសៀល ជនជាតិចិនដែលកើតជំងឺកូរ៉ូណាថ្មី រកឃើញនៅខេត្តព្រះសីហនុនោះ សុខភាពរបស់គាត់ល្អឡើងវិញ ហើយគ្រូពេទ្យកំពុងយកចិត្តទុកដាក់ ព្យាបាលផងដែរ។ នេះបើតាម អ្នកនាំពាក្យក្រសួងសុខាភិបាល លោក លី សូវ៉ាន់។
ម៉ោង ២:៤0 នាទីរ រសៀល ក្រសួងការបរទេសឥណ្ឌូនេស៊ី កំពុងតែព្យាយាមជម្លៀសនិស្សិតរបស់ខ្លួនចំនួន ២៤៣នាក់ ចេញពីខេត្តហូបេ ប្រទេសចិន ជាខេត្តផ្ទុះមេរោគកូរ៉ូណា។ អ្នកនាំពាក្យក្រសួងការបរទេស ឥណ្ឌូនេស៊ី Teuku Faizasyah បញ្ជាក់ថា រងចាំការរៀបចំពីខាងភាគីចិនសិន។ នេះបើតាមការចុះផ្សាយរបស់South China Morning Post។
ម៉ោង១: ៤០នាទី រសៀល ថៃរកឃើញអ្នកផ្ទុកមេរោគ កូរ៉ូណា ៦នាក់បន្ថែមទៀត សរុបគឺថៃរកឃើញអ្នកផ្ទុកមេរោគនេះ១៤នាក់។ នេះ បើតាមសេចក្តីប្រកាសរបស់ក្រសួងសុខាភិបាលថៃ។ ថៃបញ្ជាក់ថា ៥នាក់ក្នុងចំណោម៦នាក់នោះគឺមកពីទីក្រុងវ៉ូហាន ប្រទេសចិនមានអាយុចន្លោះពី៦០ទៅ៧០ឆ្នាំ។
ម៉ោង ១០ៈ៤០នាទី ហ្វីលីពីនផ្អាកទទួលភ្ញៀវទេសចរជាជនជាតិ ចិនដោយ បារម្ភមេរោគកូរ៉ូណា។ លោក Jaime Morente ស្នងការទទួលបន្ទុក ការិយាល័យអន្តោប្រវេសន៍ ហ្វីលីពីនថ្លែងក្នុងសេចក្តីថ្លែងការណ៍ថា ការផ្អាកទទួលភ្ញៀវទេសចរជនជាតិចិនគឺជាវិធីមួយអាចជួយបន្ថយការរាលដាលមេរោគកូរ៉ូណា។
ម៉ោង ៩:២០នាទី ព្រឹក អ្នកនាំពាក្យក្រសួងសុខាភិបាល លោកស្រី ឱ វណ្ណឌីន អះអាងថា រកមិនទាន់មានករណីអ្នកឆ្លងមេរោគ កូរ៉ូណាថ្មីទៀត ក្រៅពីជនជាតិឈ្មោះ Jia Jianhua នោះទេ។
ម៉ោង ៩:២០នាទី ព្រឹក លោក Jia Jianhua ជនជាតិមានអាយុ៦០ឆ្នាំ ដែលរកឃើញផ្ទុកមេរោគ កូរ៉ូណា មានសុខភាពធម្មតា នៅបន្ទប់ដាច់ដោយឡែកមួយក្នុងមន្ទីរពេទ្យខេត្តព្រះសីហនុ។ នេះបើតាម អ្នកនាំពាក្យក្រសួងសុខាភិបាល លោកស្រី ឱ វណ្ណឌីន
នៅម៉ោង៨:៤០ នាទីព្រឹក ចំនួនអ្នកស្លាប់ដោយមេរោគ កូរ៉ូណា កើនដល់១០៦នាក់ និង អ្នកមានផ្ទុកមេរោគនេះ មានជិត១ ៣០០នៅក្នុងប្រទេសចិន និងឆ្លងលើពិភពលោកជាង ២ ៧០០នាក់ ។ តាមការចុះផ្សាយរបស់Channel News Asia.
.