ប្រទេសអាស៊ាន៤ សម្រេចផ្អាកការផ្តល់ទិដ្ឋការដល់អ្នកដំណើរមកពីតំបន់កំពុងផ្ទុះវីរុសរាតត្បាតនៅប្រទេសចិន ខណៈរដ្ឋសមាជិក៦ផ្សេងទៀត កំពុងចាត់វិធានការបង្ការ និងទប់ស្កាត់តាមព្រលានយន្តហោះ និងច្រកព្រំដែនអន្តរជាតិ។
វិធានការទាំងនេះ ធ្វើឡើងខណៈចំនួនមនុស្សស្លាប់ដោយវីរុសវាយប្រហារផ្លូវដង្ហើមថ្មីនេះ កំពុងបន្តកើនឡើង និងរីករាលដាលដល់ប្រទេសផ្សេងៗទៀតនៅជុំវិញពិភពលោក។
អាជ្ញាធរចិន រកឃើញករណីឆ្លងវីរុសឈ្មោះនូវែលកូរ៉ូណានេះលើកដំបូងបង្អស់លើខ្លួនពលរដ្ឋក្រុងវូហាន នៃខេត្តហ៊ូប៊ី ប្រទេសចិន កាលពីចុងខែធ្នូឆ្នាំ២០១៩។
វីរុសដែលបង្កឱ្យអ្នកជំងឺក្តៅខ្លួនឬផ្តាសាយធម្មតារហូតដល់មានបញ្ហាសួតធ្ងន់ធ្ងរនេះ កំពុងរីករាលដាលយ៉ាងឆាប់រហ័សដល់ខេត្តចំនួន៣០របស់ចិន ហើយពលរដ្ឋនៃប្រទេសនេះជាង៥៦លាននាក់ ក្នុងទីក្រុងជិត២០ ត្រូវបានហាមមិនឱ្យចាកចេញ។ នេះបើយោងតាមប្រភពពីសារព័ត៌មាន Aljazeera។
បើតាមសារព័ត៌មាន CNA គិតត្រឹមព្រឹកថ្ងៃនេះ នៅខេត្តផ្ទុះវីរុស តួលេខអ្នកស្លាប់ឡើងដល់១៣២នាក់ កើនពី១០៦នាក់នៅថ្ងៃម្សិលមិញ ឯអ្នកជំងឺកើនដល់៥ ៩៧៤នាក់ ធៀបនឹងថ្ងៃទី២៨ ដែលមានចំនួន៤ ៣១៤នាក់ និងបានរាលដាល២៨៥ករណីទៅប្រទេសនិងតំបន់១៧ផ្សេងទៀត។
អាជ្ញាធរអាកាសចរស៊ីវិលវៀតណាម កាលពីថ្ងៃព្រហស្បត្តិ៍សប្តាហ៍មុន បានបញ្ជាឱ្យអង្គភាពពាក់ព័ន្ធផ្អាកជើងហោះហើរត្រង់ពីទីក្រុងវូហាន បន្ទាប់ពីអាជ្ញាធរសុខាភិបាលរកឃើញករណីវីរុសនេះលើខ្លួនជនជាតិចិនពីរនាក់ឳពុកកូនធ្វើដំណើរមកពីទីក្រុងនោះនៅថ្ងៃពុធ។
តាមប្រភពពី Vietnam Express ក្រសួងសុខាភិបាលវៀតណាម កំពុងតាមដានទេសចរចិនមកពីតំបន់ផ្ទុះវីរុសអំឡុង១៤ថ្ងៃចុងក្រោយ នៅខេត្ត/ក្រុង១១ នៃផ្ទៃប្រទេស និងបង្កើនការត្រួតពិនិត្យតាមច្រកព្រំដែនជាមួយប្រទេសក្បែរខាងរបស់ខ្លួនមួយនេះ។
សិង្ហបុរី និងម៉ាឡេស៊ី បានហាមអ្នកដំណើរទាំងអស់មិនឱ្យចូលប្រទេសខ្លួនបើគ្មានទិដ្ឋការផ្តល់ឱ្យមុន ឬអ្នកធ្លាប់ទៅខេត្តហ៊ូប៊ីអំឡុង១៤ថ្ងៃចុងក្រោយ ចាប់ពីប្រទេសទាំង២រកឃើញវីរុសលើអ្នកដំណើរលើកដំបូង ឯហ្វីលីពីនក៏បានចាត់វិធានការដូចគ្នានេះ បើទោះមិនទាន់រកឃើញករណីណាមួយក្តី។ នេះយោងលើប្រភពពីគេហទំព័រ ASEAN Briefing។
ដោយឡែក រដ្ឋាភិបាលថៃមិនបានចាត់វិធានការផ្អាកជើងហោះហើរពីខេត្តហ៊ូប៊ីនោះទេ ប៉ុន្តែប្រទេសនេះកំពុងបង្កើនការត្រួតពិនិត្យជើងហោះហើរទាំងអស់មកពីប្រទេសចិន ចាប់ពីខ្លួនរកឃើញវីរុសឆ្លងជាបន្តបន្ទាប់ រហូតដល់១៤ករណី គិតត្រឹមថ្ងៃទី២៩ ខែមករា។
បើតាមកាសែត Bangkok Post នាយករដ្ឋមន្រ្តីថៃបានបង្កើនយន្តការអនាម័យ ដោយប្រើវិធីបាញ់ថ្នាំសម្លាប់មេរោគឆ្លងនៅគ្រប់យន្តហោះដឹកអ្នកដំណើរមកពីប្រទេសចិន និងតំបន់ជួបហានីភ័យផ្សេងទៀត។
កម្ពុជា ក៏មិនបានផ្អាកជើងហោះហើរពីប្រទេសចិនដែរ បន្ទាប់ពីរកឃើញករណីដំបូងលើទេសចរមកពីក្រុងវូហាននៅថ្ងៃច័ន្ទ។ យ៉ាងណាក្រសួងសុខាភិបាលនៃប្រទេសនេះ កំពុងចាត់វិធានការស្វែងរកជនជាតិចិនទាំងអស់ដែលបានចូលមកក្នុងប្រទេសអំឡុង១៤ថ្ងៃចុងក្រោយ។
ប្រធានាធិបតីចិនលើកឡើងថា នូវែលកូរ៉ូណាវីរុស២០១៩ អាចមានលទ្ធភាពឆ្លងពីមនុស្សទៅមនុស្ស។ ការលើកឡើងនេះ គឺបន្ទាប់ពីក្រុមគ្រូពេទ្យប្រទេសអាល្លឺម៉ង់ ជប៉ុន និងវៀតណាម បានរកឃើញករណីអ្នកជំងឺផ្ទុកវីរុសនេះ ដែលមិនធ្លាប់បានទៅទីក្រុងវូហានជាលើកដំបូង។
តាមប្រភព New York Times ក្រៅពីប្រទេស៤ក្នុងតំបន់អាស៊ាន រដ្ឋាភិបាលប្រទេស និងតំបន់ជាច្រើនបានសម្រេចផ្អាក កាត់បន្ថយ និងរឹតបណ្តឹងជើងហោះហើរពីខេត្តហ៊ូប៊ី ដើម្បីបញ្ជៀសហានីភ័យពីវីរុសឆ្លង ក្នុងនោះមានដូចជា រដ្ឋាភិបាលក្រុងហុងកុង រ៉ុស្ស៊ី អង់គ្លេស ជប៉ុន និងអាល្លឺម៉ង់ជាដើម។
នៅក្នុងសេចក្តីប្រកាសព័ត៌មានថ្ងៃម្សិលមិញ ប្រធានអង្គការសុខភាពពិភពលោក និងរដ្ឋាភិបាលក្រុងប៉េកាំង កំពុងសហការគ្នាបង្កើនវិធានការទប់ស្កាត់ការរីករាលដាលរបស់វីរុសដែលស្ថិតក្នុងក្រុមគ្រួសារវីរុសសារ និងមឺស៍ សិក្សាបន្ថែមលើភាពធ្ងន់ធ្ងរ និងការចម្លងនៃវីរុស ព្រមទាំងបន្តចែករំលែកទិន្នន័យពាក់ព័ន្ធ និងការផ្តល់ប្រឹក្សាទៅមក។
តាមប្រភពដដែល ភាគីទាំងពីរបានព្រមព្រៀងបញ្ជូនអ្នកជំនាញអន្តរជាតិទៅកាន់ប្រទេសចិនឱ្យបានឆាប់ ដើម្បីសិក្សាអំពីវីរុសនោះ និងរិះរកវិធីព្យាបាល និងវាក់សាំងការពារ៕
