លោកនាយករដ្ឋមន្ត្រី ហ៊ុន សែន អំពាវនាវដល់ប្រជាពលរដ្ឋកុំឱ្យមានការភ័យខ្លាចពេកចំពោះមេរោគកូរ៉ូណាដែលកំពុងឆ្លងរាលដាលពីប្រទេសចិនទៅកាន់ប្រទេសផ្សេងៗរួមទាំងកម្ពុជា ដោយបញ្ជក់ថា រហូតដល់ថ្ងៃនេះមិនទាន់មានពលរដ្ឋខ្មែរឆ្លងមេរោគនេះទេ។
កាលពីថ្ងៃទី២៧ខែមករា ឆ្នាំ២០២០ រដ្ឋមន្ត្រីក្រសួងសុខាភិបាល បានប្រកាសថា កម្ពុជារកឃើញវីរុសកូរ៉ូណាថ្មីដំបូងលើជនជាតិចិនម្នាក់ ដែលបានធ្វើដំណើរតាមជើងហោះហើរត្រង់ពីទីក្រុងវ៉ូហានមកកាន់ខេត្តព្រះសីហនុកាលពីថ្ងៃទី២៣ ខែមករា ឆ្នាំ២០២០។
ប៉ុន្តែនៅថ្ងៃនេះ លោកនាយករដ្ឋមន្រ្តី ហ៊ុន សែន បានសរសេរលើទំព័រហ្វេសប៊ុករបស់លោកថា មកទល់ថ្ងៃនេះ គឺពុំមានប្រជាពលរដ្ឋខ្មែរណាម្នាក់ឆ្លងជំងឺផ្លូវដង្ហើមថ្មីកូរ៉ូណា (Coronavirus) នេះទេ។
លោកនាយករដ្ឋមន្រ្តី ហ៊ុន សែន៖«ជម្រាបជូនបងប្អូនជនរួមជាតិទូទាំងប្រទេសអោយបានជ្រាបថាមកទល់ថ្ងៃនេះគឺពុំមានប្រជាពលរដ្ឋខ្មែរណាម្នាក់ឆ្លងជំងឺផ្លូវដង្ហើមថ្មីកូរ៉ូណា (Coronavirus) នេះទេ»។
ជំងឺរលាកសួតធ្ងន់ធ្ងរដែលបណ្ដាលមកពីវីរុសកូរ៉ូណា បានផ្ទុះឡើងដំបូងកាលពីថ្ងៃទី៣១ ធ្នូ ឆ្នាំ២០១៩ នៅទីក្រុងវូហាន ខេត្តហ៊ឺប៉ី ប្រទេសចិន ដែលមកដល់ពេលនេះ វីរុសកូរ៉ូណា បានឆ្លងទៅបណ្ដាលប្រទេសផ្សេងៗទៀតផងដែរ។