ក្រសួងប្រៃសណីយ៍ និងទូរគមនាគមន៍ ប្រកាសស្វែងរកស្រី្តឆ្នើមក្នុងវិស័យបច្ចេកវិទ្យាចំនួន៥រូប សម្រាប់ព្រឹត្តិការណ៍«ឌីជីថលកម្ពុជា២០២០»ដែលនឹងប្រព្រឹត្តទៅនៅខែមីនាខាងមុខ។
សេចក្តីប្រកាសព័ត៌មានរបស់មូលនិធិនៃការកសាងសមត្ថភាព ការស្រាវជ្រាវ និងការអភិវឌ្ឍនៃក្រសួងប្រៃសណីយ៍ និងទូរគមនាគមន៍ ដែលចេញផ្សាយកាលពីថ្ងៃទី២៩ ខែមករា ឆ្នាំ២០២០ ឱ្យដឹងថា ស្រ្តីឆ្នើមទាំង៥រូបនឹងត្រូវឆ្លងកាត់ការជ្រើសរើសជម្រុះក្នុងចំណោមបេក្ខនារីកម្ពុជាដែលមានសមត្ថភាព ស្នាដៃ បទពិសោធន៍ ជំនាញ និងភាពច្នៃប្រឌិតក្នុងការងារពាក់ព័ន្ធការប្រើប្រាស់ប្រព័ន្ធបច្ចេកវិទ្យា និងឌីជីថល។
ស្រ្តីឆ្នើមទាំងនោះ ក៏ត្រូវមានស្នាដៃបង្កើតក្រុមហ៊ុនបច្ចេកវិទ្យា អភិវឌ្ឍបច្ចេកវិទ្យា ឬបង្កើតបទពិសោធន៍ថ្មីប្រកបដោយភាពច្នៃប្រឌិត ហើយធ្លាប់លះបង់ពេលវេលា និងកម្លាំងកាយចិត្តចូលរួមបម្រើផលប្រយោជន៍សង្គមតាមដំណោះស្រាយបច្ចេកវិទ្យាឌីជីថល។
យោងតាមសេចក្តីប្រកាសដដែល កម្មវិធីនេះរៀបចំឡើងក្រោមប្រធានបទ «ស្ត្រី និងសេដ្ឋកិច្ចឌីជីថល» ដើម្បីជំរុញដល់ការអភិវឌ្ឍធនធានស្រ្តី និងលើកកម្ពស់សមភាពយេនឌ័រក្នុងវិស័យបច្ចេកវិទ្យាឌីជីថលនៅកម្ពុជា។
ក្រសួងប្រៃសណីយ៍ និងទូរគមនាគមន៍ នឹងចាប់ទទួលពាក្យបេក្ខនារីស្រ្តីឆ្នើមចាប់ពីថ្ងៃនេះរហូតដល់ថ្ងៃទី០៥ ខែមីនា រួចនឹងធ្វើការវាយតម្លៃដោយផ្អែកលើលក្ខខណ្ឌវិនិច្ឆ័យ និងគុណសម្បត្តិផ្សេងៗ ហើយលទ្ធផលនឹងប្រកាសនៅអំឡុងព្រឹត្តិការណ៍ដែលនឹងធ្វើឡើងចាប់ពីថ្ងៃទី២០ ដល់២២ ខែមីនា ឆ្នាំ២០២០ នៅសាលពិព័រណ៍កោះពេជ្រ។
ការស្នើសុំបេក្ខភាពអាចធ្វើតាមរយៈគេហទំព័រ http://cbrd.gov.kh/nomination-form-2020 ។
ស្រ្តីឆ្នើមទាំង៥រូបនឹងក្លាយជាម្ចាស់ពានរង្វាន់៥ផ្សេងគ្នា ដែលក្នុងនោះរួមមាន ស្រ្តីឆ្នើមក្នុងវិស័យបច្ចេកវិទ្យា ICT ស្រ្តីឆ្នើមជំនាញវិស្វករបច្ចេកវិទ្យាគមនាគមន៍ និងព័ត៌មានវិទ្យា ស្រ្តីឆ្នើមចូលរួមជំរុញការប្រើប្រាស់បច្ចេកវិទ្យាអភិវឌ្ឍន៍សង្គម ឬសហគមន៍ ស្រ្តីឆ្នើមឆ្នៃប្រឌិតបង្កើតមាតិកាឌីជីថល និងស្រ្តីឆ្នើម(អាយុក្រោម១៨ឆ្នាំ)ច្នៃបង្កើតស្នាដៃបច្ចេកវិទ្យាពិសេស។
ឆ្នាំ២០២០នេះ ជាលើកទី៣ហើយដែលក្រសួងប្រៃសណីយ៍ និងទូរគមនាគមន៍ រៀបចំកម្មវិធីនេះឡើង៕
