អតីតបុគ្គលិកធ្លាប់បម្រើការងារនៅសណ្ឋាគារ The Great Duke បានបង្ហាញការខកចិត្តករណីតំណាងម្ចាស់សណ្ឋាគារយល់ព្រមផ្ដល់តែប្រាក់បំណាច់ការឈប់សម្រាកប្រចាំឆ្នាំប៉ុន្តែបដិសេធប្រាក់សំណងបីផ្សេងទៀតដែលពួកគេទាមទារ។
លោក ទូច កុសល ប្រធានសហព័ន្ធសហជីពកម្មករ និយោជិកវិស័យទេសចរណ៍កម្ពុជា និងជាអតីតបុគ្គលិក ម្នាក់នៃសណ្ឋាគារ The Great Duke បានអះអាងថា ការជួបចចារគ្នារវាងភាគីតំណាងថៅកែនៅក្រុមប្រឹក្សាអាជ្ញាកណ្តាល ដែលបានធ្វើឡើងកាលពីថ្ងៃទី២៩ ខែមករាកន្លងមកនេះមិនទទួលបានជោគជ័យទាំងស្រុងឡើយ។ លោកថា ចំណោមប្រាក់អត្ថប្រយោជន៍ទាំង៤ចំណុចដែលអតីតបុគ្គលិកសំណូមពរ រួមមានប្រាក់បំណាច់ អតីត ភាពឆ្នាំចាស់ ប្រាក់សំណងជំងឺចិត្ត ប្រាក់ជូនដំណឹង ប្រាក់បំណាច់ការឈប់សម្រាកប្រចាំឆ្នាំ តំណាងថៅកែ យល់ព្រមបើកឲ្យតែប្រាក់បំណាច់ការឈប់សម្រាកប្រចាំឆ្នាំតែប៉ុណ្ណោះ។
លោក ទូច កុសល បន្តថា៖ «គាត់[សហមេធាវីតំណាងថៅកែសណ្ឋាគារThe Great Duke]នៅចចេសថា សំណងជំងឺចិត្តគាត់អត់ឱ្យទេ ដោយសារក្ស័យធុន។ អារឿងអតីតភាពការងារគាត់ឱ្យ តែវាខុសរបៀបគណនា ព្រោះគេយកប្រាក់ឈ្នួលសុទ្ធសាធ តែយើងទាមទារបូកប្រាក់បន្ទាប់បន្សំ។ ចំណុចទី៣ហ្នឹង មិនត្រូវគ្នារឿងប្រាក់ជូនដំណឹង។ កាលនៅនាយកដ្ឋានវិវាទគេថា យើងសម្របសម្រួលគ្នាមិនធ្វើកូដកម្ម ដូច្នេះគេថាឥលូវយើងធ្វើកូដកម្មគេលែងឱ្យអាហ្នឹងហើយ[ប្រាក់ជូនដំណឹង]។ បាត់ជាងពាក់កណ្តាល សល់ជាង៣០%ទេ តាមមើល។ និយាយទៅ គំនិតអាក្រក់ណាស់មិនដែលប្រទះទេ»។
លោក កុសល ហៅការលើកហេតុផលរបស់សហមេធាវីខាងលើថាជាសកម្មភាពបំពាននឹងច្បាប់ការងារ និងគ្មានឯកសារបញ្ជាក់ច្បាស់លាស់។
មាត្រា៣១៨ នៃច្បាប់ស្តីពីការងារ និងបញ្ញត្តិបន្ថែមរបស់សារាចរលេខ០០៥ ស្តីពីសិទ្ធធ្វើកូដកម្ម ការធ្វើកូដកម្មត្រូវផ្អែកលើលក្ខណៈវិនិច្ឆ័យចំនួន៣គឺ ទី១ ជាការឈប់ធ្វើការងារដោយកម្មករនិយោជិតមួយក្រុមដោយមានការព្រមព្រៀងគ្នា ស្ថិតក្នុងបរិវេណរោងចក្រ សហគ្រាសគ្រឹះស្ថាន ទី២ ធ្វើក្នុងគោលបំណងទទួលបានដំណោះស្រាយដ៏យុត្តិធម៌ចំពោះការទាមទាររបស់ខ្លួន និងទី៣ សកម្មភាពនេះ ក៏ជាលក្ខខណ្ឌនៃការត្រលប់ចូលធ្វើការធម្មតាឡើងវិញផងដែរ។
វីអូឌីមិនអាចទំនាក់ទំនងលោកមេធាវី នៅ ពិសិដ្ឋ និងទីប្រឹក្សាច្បាប់ លោក ប៉ាន ពន្លក បកស្រាយអំពីបញ្ហានេះបានទេ ដោយទូរស័ព្ទចូលប៉ុន្តែគ្មានអ្នកទទួល។
នាយកប្រតិបត្តិនៃមូលនិធិក្រុមប្រឹក្សាអាជ្ញាកណ្តាល លោក ម៉ែន និម្មិត បានអះអាងថា បញ្ហាវិវាទរវាងអតីតបុគ្គលិក និងថៅកែសណ្ឋាគារ The Great Duke បានយល់ព្រមគ្នាត្រឹមមួយចំណុចប៉ុណ្ណោះគឺលើប្រាក់បំណាច់ការឈប់សម្រាកប្រចាំឆ្នាំ។ លោកថារាល់ចំណុចផ្សេងទៀតដែលនៅខ្វែងគំនិតគ្នា ភាគីវិវាទទាំងពីរសុទ្ធមានឯកសារភស្តុតាង ហើយសំអាងលើច្បាប់រៀងខ្លួន។
លោក ម៉ែន និម្មិត បានបញ្ជាក់បន្ថែមថា៖ «ភាគីទាំងសងខាងចំពោះរឿងក្តីមួយនេះ គឺគាត់មានមេធាវីទាំងសងខាង។ ចឹងគាត់ធ្វើការផ្អែកលើច្បាប់ហ្មត់ចត់របស់គាត់ ហើយនាំយកមកជាមួយនូវព័ត៌មានភស្តុតាងផ្សេងៗ ដោយគោរពទៅតាម ដំណើរនីតិវិធីរបស់ក្រុមប្រឹក្សាអាជ្ញាកណ្តាល។ ថាតើភាគីគាត់មានភស្តុតាងអីអត់? គឺថាមាន មានច្រើន។ រឿងគុណភាពនៃឯកសារ មានក្រុមការងារជាអ្នកធ្វើ ជំនួយគាំទ្រ ទៅដល់ក្រុមអាជ្ញាកណ្តាលដែលកាត់សេចក្តីហ្នឹង»។
ឆ្លើយតបនឹងសំណួរអំពីបញ្ជូនឯកសារបញ្ជាក់អំពីការក្ស័យធុនរបស់សណ្ឋាគារ The Great Duke អ្នកនាំពាក្យក្រសួងការងារ លោក ហេង សួរ បានឆ្លើយតបតាមរយៈសារTelegramថាបញ្ហាវិវាទការងាររបស់សណ្ឋាគារនេះបានឈានដល់ការផ្សះផ្សារគ្នានៅក្រុមប្រឹក្សាអាជ្ញាកណ្តាលហើយ។ អ្នកនាំពាក្យរូបនេះបន្តថាលោកគ្មានសិទ្ធបញ្ជាក់ និងបញ្ចេញសំណុំឯកសាររបស់ភាគីជម្លោះណាមួយបានទេ។
អ្នកនាំពាក្យក្រសួងពាណិជ្ជកម្ម លោក ស៊ាង ថៃ បានអះអាងថា លោកពុំទាន់អាចបញ្ជាក់ច្បាស់អំពីការបញ្ជូនឯកសារអំពីការក្ស័យធុនរបស់សណ្ឋាគារ The Great Duke មកក្រសួងបាននៅឡើយទេ ព្រោះឯកសារបញ្ជូនមកក្រសួងមានច្រើនប្រភេទត្រូវចំណាយពេលស្រាវជ្រាវយូរ។ លោកបានរុញឱ្យសាកសួរមកអគ្គនាយកដ្ឋានពន្ធដារអំពីការធ្វើសវនកម្មនៃចំណូលចំណាយរបស់ Great Duke ដើម្បីបំពេញនីតិវិធីប្រកាសក្ស័យធុនជំនួសវិញ។
លោក ស៊ាង ថៃ បានបញ្ជាក់ថា៖ «ក្រសួងពាណិជ្ជកម្ម អ្នកទទួលសំណើរក្រោយគេបំផុត។ ដំបូងគេតុលាការ ទាល់តែខាងហ្នឹងគេប្រកាសថាមានក្ស័យធុនហើយ បន្ទាប់មកធ្លាក់មកខាងពន្ធដារ។ គេត្រូវមកមើល ថាតើអ្នកឯងប្រកាសថាឈប់ហ្នឹង តើមានជំពាក់ពន្ធអីអត់? ទាល់តែមានឯកសារទាំងអស់ហ្នឹងមក បានក្រសួងពាណិជ្ជកម្មធ្វើលិខិតបិទឱ្យ»។
ប្រធាននាយកដ្ឋានរដ្ឋបាល និងកិច្ចការទូទៅនៃអគ្គនាយកដ្ឋានពន្ធដារ លោក រៀម រដ្ឋា បានបញ្ជាក់ដោយខ្លីថា រហូតមកដល់ថ្ងៃនេះលោកពុំដែលទទួលបានឯកសារពីសណ្ឋាគារ The Great Duke ស្នើរក្រុមការងារធ្វើសវនកម្មអំពីចំណូលចំណាយរបស់ខ្លួននោះទេ។
លោក រៀម រដ្ឋា បញ្ជាក់ថា៖ « The Great Duke? ដូចអត់ទាន់បានទទួលព័ត៌មានអីផងខាងខ្ញុំ។ នៅទេ[ឯកសារស្នើរចុះធ្វើសវនកម្មអំពីចំណូលចំណាយរបស់សណ្ឋាគារ The Great Duke] អត់បានទទួលទេ»។
ប្រធានសហភាពការងារកម្ពុជា លោក អាត់ ធន់ លើកឡើងថាត្បិតម្ចាស់អាជីវកម្មប្រកាសថាក្ស័យធុន ប៉ុន្តែមិនមែនបានន័យថាពួកអាចគេចវេសពីការផ្តល់សំណងផ្សេងៗដល់អតីតបុគ្គលិករបស់ខ្លួនឡើយ។ លោកថាទោះបីក្ស័យធុនតែម្ចាស់អាជីវកម្មនៅមានប្រាក់តម្កល់នៅរតនាគារតាមច្បាប់ការងារដែលតម្រូវដោយក្រសួងពាណិជ្ជកម្ម និងប្រាក់មួយចំនួនទៀត បានពីការប្រកាសឡៃឡុងលក់សម្ភារៈផ្សេងៗក្នុងសណ្ឋាគារក្រោយប្រកាសក្ស័យធុន។
លោក អាត់ ធន់ ថា៖ «នៅក្នុងករណីក្រុមហ៊ុននេះ[សណ្ឋាគារ The Great Duke]ទោះបីរកស៊ីមិនចំណេញ តែបើយើងមើលពីទំហំទឹកប្រាក់របស់ក្រុមហ្នឹងមិនមែនតូចទេ ហើយយើងមើលចំនួនកម្មករតែ១០០ឬ២០០នាក់ បើប្រៀបធៀបនឹងកម្មករកាត់ដេរខុសគ្នាមេឃនឹងដី។ យោបល់ខ្ញុំ គួរតែក្រុមហ៊ុនផ្តល់ឱ្យទៅ ដើម្បីបញ្ចប់រឿង ព្រោះគ្នាក៏ជាបុគ្គលិកដែលជួយដល់ក្រុមហ៊ុនបានប្រយោជន៍ច្រើនដែរ។ ហើយវាជាមុខមាត់ កេរ្ត៍ឈ្មោះរបស់ក្រុមហ៊ុនផង ហើយវាស្របច្បាប់ផង»។
តាមការបញ្ជាក់របស់នាយកប្រតិបត្តិនៃមូលនិធិក្រុមប្រឹក្សាអាជ្ញាកណ្តាល លទ្ធផលនៃការដោះស្រាយបញ្ហាវិវាទការងាររបស់សណ្ឋាគារ The Great Dukeនឹងត្រូវប្រកាសលទ្ធផលជាផ្លូវការនាថ្ងៃទី២០ខែកុម្ភៈខាងមុខនេះ។
សណ្ឋាគារ The Great Duke ដែលជាអតីតសណ្ឋាគារអាំងទែកុងទីណង់តាល់ (InterContinental) បានប្រកាសបិទប្រតិបត្តិការអាជីវកម្មរបស់ខ្លួនកាលពីថ្ងៃទី៣១ ខែធ្នូកាលពីឆ្នាំមុន បន្ទាប់ពីប្រតិបត្តិការអាជីវកម្មរបស់ខ្លួនអស់រយៈពេល២៣ឆ្នាំ៕
