គណបក្សកាន់អំណាច (CPP) បង្ហាញរបាយការណ៍ថា ប្រឆាំងដាច់ខាតមិនឱ្យមានចលនាបដិវត្តន៍ពណ៌ និងជំរុញការអនុវត្តច្បាប់ចំពោះអង្គការចាត់តាំង និងបុគ្គលណាដែលប្រព្រឹត្តបទល្មើស។
លទ្ធផលមហាសន្និបាតនៃគណៈកម្មាធិការកណ្តាលគណបក្សប្រជាជនកម្ពុជាលើកទី៤២ ចាប់ពីថ្ងៃទី១ ខែកុម្ភៈ ដល់ថ្ងៃ២ ខែកុម្ភៈ ឆ្នាំ២០២០នេះ បានឱ្យដឹងថា រដ្ឋាភិបាលនឹងបន្តជំរុញអនុវត្តវិធានការមុតស្រួចនានា ប្រឆាំងដាច់ខាតមិនឱ្យមានចលនាបដិវត្តន៍ពណ៌នៅកម្ពុជា ដើម្បីពង្រឹងសន្តិសុខ សណ្តាប់ធ្នាប់សាធារណៈ និងសុវត្ថិភាពសង្គមឱ្យបានរឹងមាំ ធ្វើឱ្យប្រជាជនទទួលបាននូវសន្តិសុខទាំងផ្លូវកាយ ផ្លូវចិត្ត ព្រមទាំងពង្រឹងជំនឿទុកចិត្តរបស់ធុរជនក្នុងការបណ្តាក់ទុនមកកម្ពុជា និងបន្តថែរក្សាដំណើរការលទ្ធិប្រជាធិបតេយ្យសេរី ពហុបក្ស នៅកម្ពុជា។
លោកនាយករដ្ឋមន្ត្រី ហ៊ុន សែន ធ្លាប់ព្រមានថា លោកនឹងសម្លាប់ទោះរាប់រយនាក់ក៏ដោយ ឱ្យតែអ្នកដែលលោកចាត់ទុកថា ចង់ធ្វើចលនាបះបោរផ្តួលរំលំរដ្ឋាភិបាលរបស់លោក។ លោក ហ៊ុន សែន បញ្ជាក់ថា ព្រមានសម្លាប់អ្នកប្រឆាំងរដ្ឋាភិបាលរបស់លោកនេះ គឺដើម្បីរក្សាសន្តិភាព។
ការរំលាយគណបក្សសង្គ្រោះជាតិ និងចាប់ខ្លួនលោក កឹម សុខា ដាក់ពន្ធនាគារ កាលពីចុងឆ្នាំ២០១៧ ក៏លោក ហ៊ុន សែន ថាក្រុមលោក កឹម សុខា ប៉ុនប៉ងធ្វើរដ្ឋប្រហារផ្តួលរំលំរដ្ឋាភិបាលរបស់លោកដែរ។
