នៅសប្តាហ៍មុន អង្គការសុខភាពពិភពលោក (WHO) បានចេញប្រកាសមួយដាក់ពិភពលោកក្នុងភាពអាសន្ន ទាក់ទិននឹងការគំរាមកំហែងនៃវីរុសឆ្លងកូរ៉ូណាថ្មី ដែលមានប្រភពពីមហាអំណាចចិន។
WHO អះអាងថា ការប្រកាសអាសន្ននេះ ដោយសារតែខ្លួនរកឃើញថា ការរីករាលដាលនៃវីរុសកូរ៉ូណាថ្មីនេះ បានកើនដល់កម្រិតមិនអាចប៉ាន់ប្រមាណបាន បើទោះជារដ្ឋាភិបាលចិនបានចាត់វិធានការមិនធ្លាប់មានក្តី។
អង្គការសុខភាពអន្តរជាតិមួយនេះ បញ្ជាក់ថា ការរកឃើញមួយទៀត គឺវីរុសនេះបានឆ្លងចូលដល់ប្រទេសដទៃទៀតកាន់តែច្រើនឡើង ក្រៅពីប្រទេសចិននោះ។
ការគំរាមកំហែងនៃវីរុសកូរ៉ូណាថ្មីនេះ ប្រទេស២០ហើយ ក្នុងនោះមានទាំងវៀតណាម ជាប្រទេសជិតខាងកម្ពុជាផងដែរ បានជម្លៀសពលរដ្ឋគេចេញពីតំបន់ផ្ទុះជំងឺឆ្លង និងបិទជើងហោះហើរជាបណ្តោះអាសន្នជាមួយប្រទេសចិន។
ដោយឡែកកម្ពុជាវិញ បានសម្រេចចិត្តខុសពីប្រទេសមួយចំនួន ពាក់ព័ន្ធទៅនឹងការគំរាមកំហែងដោយជំងឺរលាកផ្លូវដង្ហើមថ្មី មានប្រភពពីប្រទេសចិននេះ។
១ថ្ងៃមុន WHO ចេញប្រកាសអាសន្ននេះ លោកនាយករដ្ឋមន្ត្រី ហ៊ុន សែន ថ្លែងសារកុំឱ្យពលរដ្ឋកម្ពុជាមានការភ័យខ្លាចនឹងឥទ្ធិពលជំងឺនេះហួសហេតុពេក។
មេដឹកនាំរូបនេះពន្យល់ថា មកដល់ពេលនេះ គ្មានពលរដ្ឋកម្ពុជាណាម្នាក់ស្លាប់ដោយសារការឆ្លងវីរុសនេះនៅឡើយទេ គ្រាន់តែកម្ពុជារកឃើញករណីឆ្លងលើកដំបូងកើតលើបុរសជនជាតិចិនម្នាក់ ដែលបានចូលមកក្រុងព្រះសីហនុរបស់កម្ពុជា។
កម្ពុជាបញ្ជាក់ថា បញ្ហានេះ វានឹងមិនបង្កការភ័យខ្លាចរហូតជំរុញឱ្យកម្ពុជាបិទជើងហោះហើរ និងជម្លៀសនិស្សិតខ្មែរមួយចំនួនចេញពីប្រទេសចិនដូចប្រទេសមួយចំនួននោះទេ ដោយអះអាងថា ជាការសម្រេចមួយដើម្បីផលប្រយោជន៍សេដ្ឋកិច្ច និងទំនាក់ទំនងល្អជាមួយមហាអំណាចចិនដែលកំពុងជួបបញ្ហានេះ។
លោក ហ៊ុន សែន ថ្លែងថា៖ «បិទជើងហោះហើរពីចិនមកកាន់កម្ពុជា វាមិនខុសពីការដែលយើងម្ខាងសម្លាប់ខ្លួនឯង ផ្នែកមួយនៃសេដ្ឋកិច្ចខ្លួនឯង មួយផ្នែកទៀត គឺយើងទម្លាក់ទំនាក់ទំនងរវាងកម្ពុជាជាមួយចិន»។
ជ្រុងមួយនៃការបង្ហាញនេះ សេវាព្យាបាលរបស់កម្ពុជាមិនទាន់អាចប្រកួតប្រជែងជាមួយប្រទេសជិតខាងបាននៅឡើយ ខណៈកម្ពុជានៅតែមិនអាចទប់ស្កាត់លំហូរចេញទៅរកការព្យាបាលនៅក្រៅប្រទេសរបស់ពលរដ្ឋខ្មែរ និងមន្ត្រីជាន់ខ្ពស់រដ្ឋាភិបាលមួយចំនួន។
តើកម្ពុជាគួរបង្ការទប់ស្កាត់មេរោគឆ្លងមានប្រភពពីចិននេះបែបណា ក្រោយ WHO ប្រកាសអាសន្ន?
អ្នកនាំពាក្យក្រសួងសុខាភិបាល លោកស្រី ឱ វណ្ណឌីន លើកឡើងថា ក្រសួងបានត្រៀមវិធានការបង្ការ និងទប់ស្កាត់រួចរាល់ហើយចាប់ពីថ្ងៃទី១០ ខែមករាកន្លងមក ដើម្បីទប់ស្កាត់វីរុសកូរ៉ូណាថ្មីនេះ រហូតរកឃើញមេរោគនេះកើតមាននៅលើជនជាតិចិនម្នាក់នៅខេត្តព្រះសីហនុ។
មន្ត្រីជាន់ខ្ពស់ក្រសួងសុខាភិបាលរូបនេះ អះអាងទៀតថា ក្រសួងបានដាក់ពង្រាយម៉ាស៊ីនស្គេនកម្តៅនៅតាមព្រលានយន្តហោះ និងច្រកទ្វាអន្តរជាតិ ដើម្បីកំណត់រកមុខសញ្ញា និងចាត់វិធានការសង្គ្រោះ។
លោកស្រី ឱ វណ្ណឌីន ប្រាប់ថា៖ «សម្រាប់ច្រកអន្តរជាតិនេះ យើងដាក់ម៉ាស៊ីនស្គេនកម្តៅ ៣ មានភ្នំពេញ ខេត្តព្រះសីហនុ និងសៀមរាប។ ទន្ទឹមនឹងនេះ យើងក៏បានដាក់ម៉ាស៊ីនស្គេននេះនៅច្រកប៉ោយប៉ែត ស្វាយរៀង ហើយនិងច្រកព្រែកចាក»។
លោកស្រី ឱ វណ្ណឌីន អះអាងទៀតថា វិធានការបង្ការ និងទប់ស្កាត់នៅខាងក្នុងប្រទេសវិញ ក្រសួងសហការជាមួយក្រសួងអប់រំ បង្កើនការផ្សព្វផ្សាយឱ្យពលរដ្ឋចេះអនាម័យដោយលាងដៃនឹងសាប៉ូ ឬអាល់កុល និងប្រាប់ទូរសព្ទទាន់ហេតុការណ៍លេខ ១១៥ ដើម្បីសុំអន្តរាគមន៍បន្ទាន់ និងបានដាក់ពង្រាយមន្ត្រីជំនាញតាមច្រកទ្វាអន្តរជាតិ និងនៅតាមមន្ទីរពេទ្យ។
លោកស្រី ឱ វណ្ណឌី បន្ថែមថា៖ «នៅតាមមន្ទីរពេទ្យអី យើងត្រៀមរួចហើយ មានបន្ទប់ដាច់ដោយឡែកតាមបច្ចេកទេសរបស់យើង។ យើងបានត្រៀមរួចរាល់ហើយដែរនូវសម្ភារបរិក្ខាពេទ្យ ក៏ដូចជាឱសថជាការចាំបាច់ដល់ការព្យាបាលជូនដល់បងប្អូនប្រជាពលរដ្ឋរបស់យើង»។
ប្រធានសមាគមគ្រូពេទ្យគុណធម៌ លោកវេជ្ជបណ្ឌិត អ៊ួច វុទ្ធី មានប្រសាសន៍ថា ការដាក់ចេញវិធានការជារឿងល្អមួយ ប៉ុន្តែ លោកថា មន្ត្រីរបស់ក្រសួងខ្វះជំនាញ វានឹងនាំឱ្យវិធានការទប់ស្កាត់បរាជ័យ។
លោក អ៊ួច វុទ្ធី ប្រាប់ថា៖ «កូនខ្មែរយើងបើនិយាយពីដុកទ័រ (វេជ្ជបណ្ឌិត) ពូកែៗណាស់ ប៉ុន្តែ គេអត់ចេះប្រើមនុស្សដែលចេះៗអស់ហ្នឹង។ គេប្រើតែមនុស្សណាដែលចេះរឡេមរឡឺមគេហ្នឹង»។
លោក អ៊ូច វុទ្ធី មានប្រសាសន៍ទៀតថា ប្រសិទ្ធភាពទប់ស្កាត់ទី២ លោកថា បើវីរុសនេះ ជាមេរោគកាចសហាវដូចអង្គការសុខភាពពិភពលោកលើកឡើងមែន ក្រសួងគួរបញ្ជូនអ្នកវេជ្ជសាស្ត្រជំនាញទៅចូលរួមជាមួយអន្តរជាតិ ដើម្បីសែ្វងយល់ឱ្យច្បាស់ពីវិធីសាស្ត្របង្ការ ជាជាងនិយាយតាមគេ។
លោក អ៊ួច វុទ្ធី ប្រាប់បន្តថា៖ «យើងត្រូវឱ្យអ្នកជំនាញផ្នែកគីមីហ្នឹងទៅពិនិត្យជាមួយគេ បានស្តាប់គេ យល់ហើយ ទៅពិនិត្យឱ្យច្បាស់មក ដើម្បីមកផ្សព្វផ្សាយឱ្យប្រជាពលរដ្ឋខ្មែរបានដឹង កុំអាងដេញគេផ្សាយមកច្បោលៗតាមគេ ធ្វើឱ្យឈ្មួញឆ្លៀតឱកាសធ្វើបាបប្រជាពលរដ្ឋខ្មែរក្រហើយក្រទៀត»។
គ្រូពេទ្យរូបនេះ អះអាងទៀតថា ប្រសិទ្ធភាពមួយទៀត ក្រសួងត្រូវបំពាក់ឧបករណ៍ទំនើបដែលអាចដឹងពីរោគសញ្ញាវីរុសនេះផងដែរ ដើម្បីសង្គ្រោះបន្ទាន់។ លោកថា បច្ចុប្បន្ន មន្ទីរពេទ្យបង្អែកស្ទើរទូទាំងប្រទេសសូម្បីតែអេកូក៏គ្មានដែរ។
លោក អ៊ួច វុទ្ធី និយាយថា៖ «លុយជាតិផ្នែកសុខាភិបាល ៣៧៥លានដុល្លារក្នុង១ឆ្នាំៗហ្នឹង យើងសន្សំអាលុយហ្នឹង និងលុយដែលយើងរកបាន យើងដាក់តែអេកូមួយៗតាមស្រុក ឥឡូវហ្នឹងចុះទៅមើលទៅ អេកូស្រុក អេកូឃុំ អីអត់មានទេ គេអត់ឱ្យដាក់ទេ គេថាអត់មានស្តង់ដាឱ្យដាក់ទៀត ខ្ញុំថា ចាំស្តង់ដា ប្រជាជនងាប់អស់ហើយ»។
សេចក្តីថ្លែងការណ៍ WHO ឱ្យដឹងដែរថា ខ្លួនមានក្តីកង្វល់ខ្លាំងបំផុតចំពោះសក្តានុពលភាពនៃការរីករាលដាលរបស់វីរុសនេះទៅប្រទេសដែលមានប្រព័ន្ធសុខាភិបាលខ្សោយ និងមិនបានត្រៀមខ្លួនគ្រប់គ្រាន់ល្អសម្រាប់បង្ការ និងទប់ស្កាត់ការរីករាលដាល។
មួយវិញទៀត រដ្ឋធម្មនុញ្ញកម្ពុជា មាត្រា៥២ ចែងថា«រដ្ឋយកចិត្តទុកដាក់ជាអាទិភាពចំពោះជីវភាពរស់នៅ និងសុខមាលភាពរបស់ប្រជាពលរដ្ឋ»។
នាយកប្រតិបត្តិសម្ព័ន្ធគណនេយ្យភាពសង្គមកម្ពុជា លោក សន ជ័យ នៅតែបង្ហាញការព្រួយបារម្ភពីការប្តេជ្ញាចិត្តរបស់រដ្ឋាភិបាល ដើម្បីឆ្លើយតបទៅនឹងស្មារតីនៃរដ្ឋធម្មនុញ្ញ។
លោក សន ជ័យ លើកឡើងថា មកដល់ពេលនេះ ក្រសួងមិនទាន់ប្រកាសថា ពលរដ្ឋខ្មែរណាម្នាក់ឆ្លងមេរោគដ៏កាចសាហាវនេះទេ ប៉ុន្តែ លោកថា ជនជាតិចិនដែលមានវត្តមាននៅលើទឹកដីកម្ពុជា បែរជាមានការបញ្ជាក់ថា ឆ្លងតាំងពីទីក្រុងអ៊ូហានមក ហើយថ្ងៃនេះ មានការបញ្ជាក់ថា ជនជាតិចិន ៣នាក់ដែលចេញពីកម្ពុជា បានឆ្លងវីរុសនេះដែរ។
លោក សន ជ័យ ប្រាប់ថា៖ «អ៊ីចឹង ព័ត៌មាននេះ ដាក់សំណួរថា តើពួកគេឆ្លងដោយរបៀបណា? ហើយឆ្លងពីចិនគ្នាគេនៅពេលដែលគេស្នាក់នៅជាមួយគ្នានៅខេត្តព្រះសីហនុ ឬមួយពួកគេចេញពីទីណាមួយនៃទឹកដីកម្ពុជា?»។
គិតត្រឹមថ្ងៃចន្ទនេះ យ៉ាងហោចណាស់ប្រទេស ៣៤ហើយ បានសម្រេចជម្លៀសប្រជាពលរដ្ឋរបស់ខ្លួនចេញពីប្រទេសចិនបណ្តោះអាសន្ន ដើម្បីគេចចេញពីមេរោគនេះ៕