លោកនាយករដ្ឋមន្ត្រីកម្ពុជា បានថ្លែងប្រាប់មេដឹកនាំពិភពលោកថា កម្ពុជាធ្លាប់មានបទពិសោធន៍លំបាកវេទនាឆ្លងកាត់សម័យសង្គ្រាម ហើយការអភិវឌ្ឍ និងរីកចម្រើនស្ទើរគ្រប់វិស័យនៅពេលនេះ ដោយសារតែមានសន្តិភាព។
នៅក្នុងកិច្ចប្រជុំកំពូលសហព័ន្ធសន្តិភាពពិភពលោកដែលធ្វើឡើងនៅក្នុងប្រទេសកូរ៉េខាងត្បូងនៅថ្ងៃនេះ លោកនាយករដ្ឋមន្ត្រី ហ៊ុន សែន លើកឡើងថា ពិភពលោកកំពុងតែជួបប្រទះបញ្ហាប្រឈមក្នុងការក្សាសន្តិភាព និងអត្រានៃការរីកចម្រើនសេដ្ឋកិច្ច។
លោក បន្តថា សម្រាប់កម្ពុជាដែលធ្លាប់ឆ្លងកាត់សង្គ្រាម ការក្សាសន្តិភាពដើម្បីឆ្ពោះទៅរកការរីកចម្រើនគឺរឿងសំខាន់បំផុត។
លោក ហ៊ុន សែន៖ «សម្រាប់កម្ពុជា ដែលជាប្រទេសធ្លាប់ឆ្លងកាត់នូវសង្គ្រាម និងវិនាសកម្ម សន្តិភាពពិតជាមានតម្លៃមិនអាចកាត់ថ្លៃបាន។ អ្វីៗគ្រប់យ៉ាងដែលកម្ពុជាសម្រេចបានមកដល់ពេលនេះទាំងការអភិវឌ្ឍ និងទាំងវិបុលភាព គឺជាផ្លែផ្កាសន្តិភាព។ រាជរដ្ឋាភិបាលបន្តរក្សាបាននូវសន្តិភាព គឺមិនអាចកាត់ផ្តាច់បានពីការផ្តល់ឱកាសស្មើគ្នាជូនប្រជាជនគ្រប់រូប។
លោក ហ៊ុន សែន ក៏បានលើកឡើងថា កម្ពុជាទើបទទួលបានសន្តិភាពពេញលេញនៅឆ្នាំ១៩៨៨ ពេលដែលគ្រប់ភាគីបញ្ចប់សង្គ្រាមស៊ីវិល។
អ្នកស្រាវជ្រាវពីការអភិវឌ្ឍសង្គម លោក មាស នី បានពន្យល់ថា ប្រទេសដែលមានសន្តិភាព គឺជាប្រទេសដែលមិនមានការរឹតត្បិតសេរីភាពជួបជុំ ការបញ្ចេញមតិ និងតវ៉ារឿងអយុត្តិធម៌ក្នុងសង្គមស្របតាមច្បាប់រដ្ឋធម្មនុញ្ញជាដើម។
លោក មាស នី អះអាងថា កម្ពុជាបច្ចុប្បន្ននេះ មិនទាន់មានសន្តិភាពពេញលេញនៅឡើយទេ។
លោកមានប្រសាសន៍ថា៖ «ពលរដ្ឋខ្មែរមិនទាន់ទទួលបាននូវសមធម៌គ្រប់គ្រាន់នូវអ្វីដែលជាលទ្ធផលកើតស្តែងចេញពីសន្តិភាពនៅឡើយទេ នៅក្នុងហ្នឹងរួមមាន ទាក់ទងទៅនឹងអ្នកទំនាស់ដីធ្លីផង សកម្មជននយោបាយផង មិនទាន់ទទួលបាននូវយុត្តិធម៌គ្រប់គ្រាន់ បើកាលណាគ្មានយុត្តិធម៌ សន្តិភាពក៏គ្មានន័យធំធេងសំរាប់ពលរដ្ឋនៅក្នុងសង្គមដែរ»។
លោកនាយករដ្ឋមន្ត្រី ហ៊ុន សែន ក៏អំពាវនាវទៅមេដឹកនាំពិភពលោកបន្តលើកកម្ពស់ប្រព័ន្ធពហុភាគីនិយម សណ្តាប់ធ្នាប់អន្តរជាតិ ពង្រឹង និងពង្រីកកិច្ចសហប្រតិបត្តិការ ដើម្បីធានាបាននូវសន្តិភាព សន្តិសុខ សុវត្ថិភាព ស្ថិរភាពពេញលេញ និងជួយដោះស្រាយបញ្ហាតំបន់ដោយសន្តិវិធី ឈរលើគោលការណ៍នៃច្បាប់អន្តរជាតិ ហើយមិនជ្រៀតជ្រែកកិច្ចការផ្ទៃក្នុងនៃប្រទេសដទៃជាដើម៕
