ស្ថានទូតអាមេរិកប្រចាំនៅកម្ពុជា បញ្ជាក់ថា ខាងទូតកំពុងតែសហការជាមួយអាជ្ញាធររាជធានីភ្នំពេញ ដើម្បីស៊ើបអង្កេតរកមូលហេតុពិតជុំវិញករណីបាក់ដងស្ទូចនៅការដ្ឋានសំណង់មួយកន្លែងនៅមជ្ឈមណ្ឌលកោះពេជ្រ បណ្តាលខូចរថយន្ត និងមន្ត្រីទូតម្នាក់រងរបួស។
លោកស្រី Emily Zeeberg អ្នកនាំពាក្យស្ថានទូតអាមេរិកប្រចាំកម្ពុជាថ្លែងថា ករណីបាក់ដងស្ទូចនៅការដ្ឋានសំណង់នៅកោះពេជ្រព្រឹកមិញនេះ បណ្តាលឱ្យខូចរថយន្តស្ថានទូតមួយគ្រឿង និងមន្ត្រីស្ថានទូតជាជនបរទេសម្នាក់រងរបួសស្រាល។ លោកស្រីបញ្ជាក់ថា ស្ថានទូតសហការស៊ើបអង្កេតករណីនេះ។
លោកស្រី Emily Zeeberg៖«ខាងស្ថានទូតកំពុងតែសហការជាមួយអាជ្ញាធររាជធានីភ្នំពេញ ក្នុងការស៊ើបអង្កេតលើករណីនេះ»។
សាលារាជធានីភ្នំពេញ ធ្លាប់បានចេញលិខិតណែនាំដល់ម្ចាស់ការដ្ឋានសំណង់ប្រើប្រាស់ដងស្ទូចកុំឱ្យឆ្លងផ្លូវ ឬ រេលើផ្លូវ ចៀសវាងការធ្លាក់ ឬបាក់ដងស្ទូចបណ្តាល់ឱ្យគ្រោះថ្នាក់លើអ្នកដំណើរ។