ប្រជាសហគមន៍ជាង ៧០នាក់ ស្រុកតំបែរ ខេត្តត្បូងឃ្មុំ នៅថ្ងៃនេះ បាននាំគ្នាឈរតវ៉ានៅលើដីមានជម្លោះ ដើម្បីទាមទារឱ្យតុលាការទម្លាក់បទចោទ និងដោះលែងតំណាងសហគមន៍របស់ពួកគេ។
តំណាងសហគមន៍ភូមិស្រែប្រាំង ឃុំត្រពាំងព្រីង ស្រុកតំបែរ លោក សែម សាង ត្រូវបានសមត្ថកិច្ចចាប់ខ្លួនកាលពីថ្ងៃទី១៧ ខែតុលា ឆ្នាំ២០១៩ ពាក់ព័ន្ធនឹងរឿងជម្លោះដីធ្លីជាមួយក្រុមហ៊ុនចម្ការកៅស៊ូ ហាម៉ឹនី វីន អ៊ិនវេសមេន។
ប្រជាពលរដ្ឋម្នាក់នៃសហគមន៍ស្រែប្រាំង លោក សែម ចំណាន ប្រាប់វីអូឌីថា អ្នកភូមិនឹងនាំគ្នាធ្វើការប្រមូលផ្ដុំលើដីមានជម្លោះជារៀងរាល់ខែ រហូតទាល់តែតុលាការទម្លាក់បទចោទប្រកាន់ និងដោះលែងតំណាងពួកគាត់។ លោកចាត់ទុកការចោទប្រកាន់ និងឃុំខ្លួនតំណាងពួកគាត់ ដោយគ្រាន់តែការពារដីសហគមន៍ ដែលត្រូវបានក្រុមហ៊ុនរំលោភយក ថាជារឿងអយុត្តិធម៌។
លោកថា៖ «វាជារឿងអយុត្តិធម៌ វាមិនមានកំហុសអីធ្ងន់ធ្ងរ។ ដូចខ្ញុំតែងតែនិយាយថា គ្រាន់តែយើងការពារដី ខុសមែនក៏អី យើងគ្រាន់តែការពារសោះបែរជាខុស ហើយអ្នកបំផ្លាញមានសេរីភាព រួចខ្លួន មិនជាប់បណ្ដឹងណាមួយទេ។ វាអយុតិ្តធម៌សម្រាប់រូបគាត់ ក៏ដូចពួកខ្ញុំផងដែរ»។
លោកបន្តថា ប្រសិនបើតុលាការមិនព្រមដោះលែងទេ លោកថា ពួកគាត់នឹងនាំគ្នាដាក់ញត្តិរកកិច្ចអន្តរាគមន៍ពីស្ថាប័នផ្សេងៗទៀត។
ព្រះរាជអាជ្ញារងនៃសាលាដំបូងខេត្តត្បូងឃ្មុំ លោក ហាក់ សៀកលឹម សុំមិនធ្វើអត្ថាធិប្បាយ ដោយលោកឱ្យទៅសួរអ្នកនាំពាក្យវិញ។
លោកថា៖ «អធ្យាស្រ័យ សំណុំរឿងនេះបើតាមខ្ញុំចាំ វានៅក្នុងដំណាក់ការរបស់តុលាការ អ៊ីចឹងទេ ទាក់ទងនឹងព័ត៌មាន ទាល់តែទាក់ទងទៅអ្នកនាំពាក្យតុលាការ»។
វីអូឌី មិនអាចទាក់ទងអ្នកនាំពាក្យសាលាដំបូងខេត្តត្បូងឃ្មុំ លោក ថេង ជាង បានទេ ។
មន្ត្រីសម្របសម្រួលសមាគមអាដហុកប្រចាំខេត្តត្បូងឃ្មុំ លោកស្រី ធីម ណារីន មានប្រសាសន៍ថា តុលាការគួរតែដោះលែងតំណាងសហគមន៍របស់ពួកគេវិញ ដោយលោកស្រីថា ការតវ៉ារបស់ពលរដ្ឋកន្លងមក គឺដើម្បីការពារផលប្រយោជន៍រួមតែប៉ុណ្ណោះ។ លោកស្រីបន្តថា ប្រសិនបើតុលាការនៅតែបន្តឃុំខ្លួនពលរដ្ឋតវ៉ារឿងដីធ្លីទៀត លោកស្រីថា ប្រជាពលរដ្ឋដែលរងគ្រោះដោយសារបញ្ហាដីធ្លីកន្លងមក នឹងអស់ជំនឿលើប្រព័ន្ធយុត្តិធម៌។
លោកស្រីថា៖ «តុលាការគួរតែពិចារណាម្ដងទៀតទៅលើបញ្ហាទាំងអស់ហ្នឹង ហើយបើសិនជារកឃើញថា សកម្មភាពដែលពួកគាត់ធ្វើដើម្បីផលប្រយោជន៍សហគមន៍ពួកគាត់ តុលាការគួរតែធ្វើការទម្លាក់បទចោទ ហើយផ្ដល់សេរីភាពឱ្យពួកគាត់វិញ។ ហ្នឹងជាការប្រសើរ ដើម្បីលើកម្កើងភាពយុត្តិធម៌នៅក្នុងសង្គម ហើយដើម្បីឱ្យប្រជាពលរដ្ឋមានជំនឿទៅលើប្រព័ន្ធតុលាការផងដែរ។»
ការចាប់ខ្លួន និងចោទប្រកាន់លើតំណាងសហគមន៍ដីធ្លីនេះ ធ្វើឡើងស្របពេលដែលក្រសួងរៀបចំដែនដី បានប្រកាសកាលពីថ្ងៃទី២២ ខែកក្កដា ឆ្នាំ២០១៩ ដោយឱ្យសមត្ថកិច្ចស្រាវជ្រាវចាប់តំណាងពលរដ្ឋណាដែលក្រសួងចោទថា បានញុះញង់ឱ្យពលរដ្ឋមួយក្រុមនៅស្រុកតំបែរ ឡើងមកតវ៉ាទាមទារដីព្រៃសហគមន៍នៅក្រសួង៕
