សម្ព័ន្ធអ្នកសារព័ត៌មានអន្តរជាតិ ហៅកាត់ IFJ រកឃើញថា ក្នុងឆ្នាំ២០១៩ អ្នកសារព័ត៌មានចំនួន៤៩នាក់នៅជុំវិញពិភពលោក ក្នុងនោះមានស្រ្តី៣នាក់ ត្រូវបានសម្លាប់អំឡុងពេលបំពេញភារកិច្ច។
អង្គការគាំពារសិទ្ធិអ្នកកាសែតអន្តរជាតិមួយនេះ បានរកឃើញបន្ថែមនៅក្នុងរបាយការណ៍អង្គការប្រឆាំឆ្នាំរបស់ខ្លួន ចុះផ្សាយនៅថ្ងៃអង្គារ៍ថា នៅអាមេរិកឡាទីនគឺមានអាត្រាសម្លាប់ខ្ពស់ជាងគេ ដោយរកឃើញមាន១៨នាក់ បន្ទាប់មកនៅប៉ាស៊ីហ្វិក មាន១២នាក់ នៅអាហ្វ្រិក មាន៩នាក់ នៅអាស៊ីបូព៌ា និងសហព័ន្ធអារ៉ាប់ មាន៨នាក់ និងចុងក្រោយនៅអឺរ៉ុប មាន២នាក់។
តួលេខនេះ បានថយចុះជិតពាក់កណ្តាលបើធៀបតួលេខចំនួនអ្នកសារព័ត៌មានដែលត្រូវស្លាប់អំឡុងចុះបំពេញបេសកកម្ម នៅឆ្នាំ២០១៨ ដែលអង្គការដដែលរកឃើញមាន៨៤នាក់ ក្នុងការវាយប្រហារគ្រាប់បែក ការបាញ់តទល់គ្នាដោយប្រដាប់អាវុធ និងអំពើឃាតកម្មផ្សេងៗ។
យ៉ាងណា អង្គការ IFJ ចាត់ទុកតួលេខនេះនៅតែឋិតក្នុងអាត្រាខ្ពស់ដដែល ហើយខ្លួនអំពាវនាវដល់រដ្ឋាភិបាលប្រទេសនានាឱ្យបង្ហាញពីការប្តេជ្ញាចិត្តពិតក្នុងការប្រយុទ្ធប្រឆាំងអំពើឃាតកម្ម បទឧក្រិដ្ឋ និងអំពើនិទណ្ឌភាពលើអ្នកកាសែតគ្រប់រូបភាព។
តាមរបាយការណ៍អង្គការ Reporters Without Borders ឱ្យដឹងបន្ថែមថា ក្នុងឆ្នាំ២០១៩ ក្រៅពីអ្នកកាសែត៤៩នាក់ ត្រូវបានសម្លាប់ គឺមានអ្នកកាសែតចំនួន៣៨៩នាក់ទៀត ត្រូវបានចាប់ឃុំឃាំងពេលថ្មីៗនេះ ហើយ៥៧នាក់ កំពុងត្រូវបានចាប់ឃាត់ខ្លួន៕