នាយកប្រតិបត្តិអង្គការតម្លាភាពកម្ពុជា លោក ព្រាប កុល សង្ស័យថា ផ្ទះរបស់លោកឆ្លងចរន្តអគ្គិសនី បណ្តាលឱ្យឆាប់ឆេះជាន់ផ្ទាល់ដី និងជាន់ទី១ ទាំងស្រុង និងធ្វើឱ្យខូចខាតសម្ភារប្រើប្រាស់មួយចំនួន ដោយគិតជាទឹកប្រាក់ប្រហែលជា១ម៉ឺន ៥ពាន់ដុល្លារ។
លោក ព្រាប កុល មានប្រសាសន៍ថា យោងតាមព័ត៌មានបឋម ផ្ទះរបស់លោកស្ថិតនៅបុរីប៉េងហួត (ច្បារអំពៅ) រាជធានីភ្នំពេញ ត្រូវបានបានភ្លើងឆេះផ្ទៃខាងក្នុងនៃជាន់ផ្ទាល់ដី និងជាន់ទី១ទាំងស្រុង រួមទាំងសម្ភារប្រើប្រាស់មួយចំនួនទៀត នៅម៉ោងប្រហែលជា ៨កន្លះព្រឹកថ្ងៃកាលពីម្សិលមិញ ប៉ុន្តែ លោកថា គ្មាននរណាម្នាក់រងរបួសនោះទេ។
លោក ព្រាប កុល បញ្ជាក់ថា អំឡុងពេលឆាប់ឆេះ គឺផ្នែកសន្តិសុខ និងគណ:គ្រប់គ្រងបុរី បានខ្នះខ្នែងជួយពន្លត់ និងបញ្ជូនឡានពន្លត់អគ្គិភ័យ មកពន្លត់ភ្លើងទាន់ពេលវេលា និងទប់ស្កាត់ការរាលដាលទៅផ្ទះដែលនៅជាប់គ្នាផងដែរ។
ក្រោយពីកើតហេតុ លោកបានទៅធ្វើកំណត់ហេតុជាមួយគណៈគ្រប់គ្រងបុរី ដើម្បីឱ្យអ្នកគ្រប់គ្រងនោះបញ្ជូនរបាយការណ៍ទៅសមត្ថកិច្ចស្រាវជ្រាវបន្ត និងរកឲ្យឃើញមូលហេតុច្បាស់លាស់ជុំវិញរឿងដែលផ្ទះរបស់លោកត្រូវបានឆាបឆេះនោះ។
ផ្ទះរបស់លោក មាស នី អ្នកវិភាគនយោយបាយ និងជាអ្នកស្រាវជ្រាវពីការអភិវឌ្ឍន៍សង្គម បានរងការខូចខាតទាំងស្រុង ដោយអគ្គិភ័យឆាបឆេះ នៅល្ងាចថ្ងៃទី១៨ ខែមិថុនា ឆ្នាំមុន។ ផ្ទះរបស់លោក ឆាប់ឆេះ ដោយសារការរាលដាលភ្លើងពីផ្ទះអ្នកជិតខាង ដែលកំពុងឆេះចំនួន ៣ខ្នង៕
