ក្រសួងអប់រំប្រាប់ទៅគ្រឹះស្ថានសិក្សាសាធារណៈ និងឯកជន ឱ្យទប់ស្កាត់សកម្មភាពមិនប្រក្រតីក្នុងទិវានៃក្តីស្រលាញ់ ដោយថា ទិវានេះមិនមែនជាប្រពៃណីរបស់កម្ពុជានោះទេ។
ក្នុងសេចក្តីណែនាំរបស់ក្រសួងអប់រំ យុវជន និងកីឡា នាថ្ងៃនេះ ក្រសួងសង្កេតឃើញថា សិស្សានុសិស្សមួយចំនួនតូចយល់ច្រឡំថា នៅថ្ងៃទី១៤ ខែកុម្ភៈ ជាថ្ងៃបុណ្យសង្សារ ឬជាថ្ងៃណាត់ជួបគ្នារវាងគូស្នេហ៍ ភ្លើតភ្លើន ភ្លេចការសិក្សា បាត់បង់សេចក្តីថ្លៃថ្នូរបុគ្គល និងក្រុមគ្រួសារ ប្រាសចាកពីវប្បធម៌ និងប្រពៃណីជាតិរបស់ខ្មែរជាដើម។
ករណីនេះ ក្រសួងអប់រំអំពាវនាវទៅថ្នាក់គ្រប់គ្រងសាលាសិក្សាសាធារណៈ និងឯកជន ត្រូវពង្រឹងការអនុវត្តបទបញ្ជាផ្ទៃក្នុង និងធ្វើការណែនាំពីវិធានការទប់ស្កាត់សកម្មភាពមិនប្រក្រតីក្នុងថ្ងៃ១៤ ខែកុម្ភៈ តាមរយៈការផ្សព្វផ្សាយដល់សិស្សគ្រប់មធ្យោបាយ ប្រាប់ទៅសិស្សនៅកន្លែងប្រជុំ នៅដងទង់ជាតិ ដើម្បីកុំឱ្យយល់ខុសពីអត្ថន័យនៃទិវានៃក្តីស្រលាញ់ ពង្រឹងផ្នែកសីលធម៌សិស្សដោយតាមដានវត្តមានរបស់សិស្សជាប្រចាំ ជំរុញទៅក្រុមប្រឹក្សាដំណើរការ ក្រុមប្រឹក្សាយុវជន កុ្រមប្រឹក្សាកុមារ ដោយអនុវត្តសកម្មភាព «មិត្តអប់រំមិត្ត» និងទំនាក់ទំនងទៅអាណាព្យាបាលសិស្ស ដើម្បីកែលំអសិស្សានុសិស្សឱ្យបានទាន់ពេលវេលវេលា៕
