ក្រសួងរៀបចំដែនដី នគរូបនីយកម្ម និងសំណង់ បដិសេធដោះស្រាយសំណងជូនពលរដ្ឋមួយក្រុមដែលអះអាងថា កំពុងមានជម្លោះដីធ្លីជាមួយក្រុមហ៊ុនចិន ញូញៀន ឌីវើលុបមែនគ្រុប (Union Development Group) ក្នុងស្រុកបទុមសាគរ ខេត្តកោះកុង។
កាលពីថ្ងៃម្សិលមិញនេះ តំណាងពលរដ្ឋប្រមាណ៦០នាក់ មកពីស្រុកបទុមសាគរ ខេត្តកោះកុង បានឡើងមកតវ៉ានៅក្រសួងរៀបចំដែនដី ដើម្បីទាមទារទៅក្រសួងជួយដោះស្រាយវិវាទដីធ្លី ដែលពលរដ្ឋទាំងនោះអះអាងថា ត្រូវក្រុមហ៊ុនចិន UDG រំលោភយកអស់រយៈពេលជាង១០ឆ្នាំ។
ក្នុងសេចក្តីប្រកាសព័ត៌មានចុះថ្ងៃទី១១ ខែកុម្ភៈ ក្រសួងរៀបចំដែនដី ឱ្យដឹងថា ពលរដ្ឋ៧៧គ្រួសាររស់នៅភូមិបាក់រនាស់ ភូមិតានូន ភូមិទួលពោធិ៍ ភូមិព្រែកខ្យង ស្ថិតក្នុងឃុំតានូននោះ គឺក្រសួងពុំដោះស្រាយជូនឡើយដោយថា ពលរដ្ឋទាំងនោះទទួលបានការដោះស្រាយពីគណៈកម្មការអន្តរក្រសួងរួចហើយ។
ក្នុងសេចក្តីប្រកាសព័ត៌មានបញ្ជាក់ថា គណៈកម្មការអន្តរក្រសួងបានដោះស្រាយ ដោយ១គ្រួសារទទួលបានដីលំនៅដ្ឋានទំហំ៥០ម៉ែត្រ គុណ១០០ម៉ែត្រ ផ្ទះឈើមួយខ្នង និងថវិកាពី៣៥០ដុល្លារ ទៅ១ម៉ឺនដុល្លារ រួមទាំងដីចំការទំហំចាប់ពី១ហិកតា ទៅ៦ហិកតា ទៅតាមទំហំដីតូច ឬធំដែលពួកគេធ្លាប់កាន់កាប់។
អ្នកស្រី គុណ សៅរ៍ ដែលអះអាងថា ជាតំណាងពលរដ្ឋនៅភូមិតានួនដែលក្រសួងបដិសេធដោះស្រាយ បានប្រាប់វីអូឌីថា គ្រួសារអ្នកស្រី និងអ្នកភូមិមួយចំនួនពិតជាទទួលបានការដោះស្រាយសំណងពីគណៈកម្មការអន្តរក្រសួងពិតមែន ប៉ុន្តែ ក៏មានអ្នកភូមិមួយចំនួនមិនទទួលសំណងដែរ ដោយសារពួកគេចំណាកស្រុកទៅប្រទេសថៃ។
តំណាងពលរដ្ឋរូបនេះបន្តថា អ្នកស្រីក៏ដូចជាអ្នកដែលឡើងមកតវ៉ាថ្មីៗនេះ គឺដើម្បីទាមទារដីស្រែបន្ថែមដែលនៅសេសសល់ប៉ុណ្ណោះ ដោយថា ការដោះស្រាយកន្លងមកនោះ គឺអ្នកស្រីទទួលបានដីចម្ការ២ហិកតា ថវិកា១៧០០ដុល្លារ និងដីលំនៅឋាន៥០ម៉ែត្រ គុណនឹង១០០ម៉ែត្រប៉ុណ្ណោះ។
អ្នកស្រីបន្ថែមថា៖ «ពួកខ្ញុំទាមទារទាល់តែបាន។ បើអត់ឱ្យពួកខ្ញុំ ក៏ពួកខ្ញុំមិនព្រមដែរ។ ពួកខ្ញុំនៅតែតវ៉ាអីចឹង ពីព្រោះខ្ញុំអត់មានដីបង្កបង្កើនផល អត់មានដីធ្វើស្រែចំការផង»។
លោក ម៉ូវ ស៊ីដែន ដែលអះអាងថា ជាតំណាងពលរដ្ឋដែរនោះ និយាយថា ក្រោយក្រសួងចេញសេចក្តីប្រកាសព័ត៌មានបដិសេធដោះស្រាយសំណងជូនពួកគាត់រួចមក។ នៅថ្ងៃនេះ អ្នកភូមិបានត្រឡប់មកជួបជាមួយតំណាងក្រសួងម្តងទៀត ដើម្បីប្រាប់ពីមូលហេតុដែលពួកគាត់ទាមទារបន្ថែម។
តំណាងពលរដ្ឋរូបនេះបន្តថា ក្រោយជួបជាមួយតំណាងគឺក្រសួងឱ្យតំណាងពលរដ្ឋរៀបចំបញ្ជីឈ្មោះពលរដ្ឋដែលតវ៉ានៅតាមភូមិនីមួយៗដាច់ដោយឡែកពីគ្នា ដើម្បីក្រសួងពិនិត្យ និងកុំឱ្យមានការភ័ន្តច្រឡំ។
លោកបន្ថែមថា៖ «អីចឹង ខាងក្រសួងគាត់យល់ព្រម។ យល់ព្រមឱ្យយើងដាក់ញត្តិសារថ្មី បែងចែកឱ្យបានច្បាស់លាស់ ចំពោះពលរដ្ឋក្រៅឃុំ ក្នុងឃុំ កុំឱ្យដាក់សរុបចូលគ្នា ព្រោះរឿងនេះមានពលរដ្ឋរងផលប៉ះពាល់នៅក្រៅឃុំ បានមកចូលជាមួយ»។
តំណាងពលរដ្ឋរូបនេះឱ្យដឹងថា ក្រុមរបស់លោកដែលមានជម្លោះដីធ្លីជាមួយក្រុមហ៊ុនចិន ញូញៀន នៅឃុំតានូន មិនមែនមានតែ៧៧គ្រួសារនោះទេ គឺមាន១២៨គ្រួសារ។
វីអូឌីបានព្យាយាមសុំការបញ្ជក់ពីអ្នកនាំពាក្យក្រសួងរៀបចំដែនដី នគរូបនីយកម្ម និងសំណង់ លោក សេង ឡូត ដែរ ប៉ុន្តែ ទូរសព្ទចូលច្រើនដងគ្មានអ្នកទទួល។
ជុំវិញជម្លោះដីធ្លីរវាងពលរដ្ឋ និងក្រុមហ៊ុនចិន ញូញៀន នេះ មន្ត្រីឃ្លាំមើលការរំលោភសិទ្ធិមនុស្សនៅអង្គការលីកាដូប្រចាំខេត្តកោះកុង លោក ប៉ែន វុទ្ធា ស្នើទៅមន្ត្រីក្រសួងចុះស្រាវជ្រាវឱ្យបានច្បាស់លាស់ និងត្រូវមានឆន្ទៈពិតប្រាកដក្នុងការដោះស្រាយផលប៉ះពាល់ជូនពលរដ្ឋ។
លោក ប៉ែន វុទ្ធា បន្តថា បញ្ហាវិវាទនេះ កើតឡើងដោយសារតែរដ្ឋាភិបាលជាអ្នកផ្តល់ដីសម្បទានទៅឱ្យក្រុមហ៊ុនធ្វើការអភិវឌ្ឍ ដែលរដ្ឋាភិបាលត្រូវតែទទួលខុសត្រូវក្នុងការដោះស្រាយសំណងជូនពលរដ្ឋ។
លោកបន្ថែមថា៖ «គម្រោងអភិវឌ្ឍន៍នេះកើតឡើងដោយសារតែរដ្ឋាភិបាលជាអ្នកផ្តល់ដីទៅឱ្យក្រុមហ៊ុនធ្វើការអភិវឌ្ឍ។ អីចឹង រដ្ឋាភិបាលត្រូវទទួលខុសត្រូវក្នុងការដោះស្រាយឱ្យឆាប់ចប់»។
របាយការណ៍ និងការវិភាគផ្លូវច្បាប់របស់មជ្ឈមណ្ឌលអប់រំច្បាប់សម្រាប់សហគមន៍ (CLEC) ឆ្នាំ២០១២ បានរកឃើញថា គម្រោងផ្តល់ដីសម្បទានសេដ្ឋកិច្ចទៅឱ្យក្រុមហ៊ុនចិន ញូញៀន (UDG) បានធ្វើឱ្យប្រជាពលរដ្ឋ ១១៤៣គ្រួសារ ត្រូវបង្ខំឱ្យបោះបង់ចោលដីធ្លីប្រមាណជាង១ម៉ឺនហិកតា និងផ្ទះ១៥០០ខ្នង ត្រូវបង្ខំឱ្យរុះរើ និងឈូសឆាយ៕
