ប្រធានក្រុមប្រឹក្សាសាលាដំបូងរាជធានីភ្នំពេញ បានហៅមេធាវីលោក កឹម សុខា ថាជាមេធាវីទំនើង និងព្រមានចាត់វិធានការតឹងរ៉ឹង បន្ទាប់ពីក្រុមមេធាវីចុងចោទដើរចេញពីសវនាការដោយសារមិនពេញចិត្តនឹងការរារាំងរបស់ប្រធានក្រុមប្រឹក្សាមិនឱ្យឆ្លើយតប។
ការព្រមានដោយលោកប្រធានក្រុមប្រឹក្សា កូយ សៅ បានធ្វើឡើង បន្ទាប់ពីមានការពិភាក្សាគ្នាយ៉ាងតឹងតែងរហូតដល់មេធាវីរបស់លោក កឹម សុខា សម្រេចចិត្តដើរចេញពីបន្ទប់សវនាការ។
លោកប្រធានក្រុមប្រឹក្សា កូយ សៅ បានមានប្រសាសន៍ថា៖ «ប្រសិនបើគាត់មិនចូល ហើយសប្តាហ៍ក្រោយមិនចូលទៀត ក្រុមប្រឹក្សានឹងមានវិធានការមិនបណ្តោយឱ្យមានសកម្មភាពមេធាវីទំនើងបែបនេះទេ»។
លោកបន្ថែមថា៖ «នៅពេលគេយកឯកសារមកផ្ទៀងផ្ទាត់ ឯងដើរចេញ ហ្នឹងហើយចរិតទំនើង»។
លោកស្រី ម៉េង សុភារី ជាមេធាវីរបស់លោក កឹម សុខា បានប្រាប់វីអូឌីតាមទូរសព្ទថា មូលហេតុដែលក្រុមមេធាវីដើរចេញ ដោយសារសហមេធាវីចុងចោទ មិនត្រូវបានអនុញ្ញាតឱ្យធ្វើការបំភ្លឺទាក់ទងទៅរឿងឯកសារដែលក្រុមមេធាវីរបស់លោកស្រីមិនមាននៅក្នុងដៃ។
លោកស្រីបានបន្ថែមថា ក្រុមមេធាវីរបស់លោកស្រីមិនមានឯកសារ ទើបតែនៅពេលលោកតំណាងអយ្យការបានលើកយកឯកសារស្តីពីកិច្ចព្រមព្រៀងរវាងគណបក្សសិទ្ធិមនុស្ស និងគណបក្ស សម រង្ស៊ី មកបង្ហាញ ដែលអត់មានចុះលេខច្បាស់លាស់ ហើយនៅពេលសួរដេញដោលរកលេខ ទើបចេញរឿងថា ក្រុមរបស់លោកស្រីអត់មានឯកសារដល់ទៅ១១៩២សន្លឹកឯណោះ។
លោកស្រី ម៉េង សុភារី មានប្រសាសន៍ថា៖ «ថាវាមិនមែនជាកាយវិការទំនើងទេ វាជាការប្រើសិទ្ធិរបស់យើងខ្ញុំនៅពេលយើងខ្ញុំសម្តែងមតិហើយ យើងបាត់បង់សិទ្ធិសម្តែងមតិ ហើយយើងត្រូវហាមឃាត់។ ចឹងយើងអត់អាចនៅតទៅទៀតបានទេ»។
លោកស្រីមានប្រសាសន៍ថា៖ «វាគឺជាសិទ្ធិរបស់យើងខ្ញុំ ហើយវាមិនប៉ះពាល់អីទេ។ ធម្មតាវាជារឿងឧក្រិដ្ឋ បើគ្មានមេធាវី មិនដឹងថា សវនាការដំណើរការយ៉ាងម៉េចទេ។ លុះត្រាតែរកមេធាវីថ្មីមកដាក់ ហើយលុះត្រាតែមានការយល់ព្រមពីឯកឧត្តម កឹម សុខា ដែរ»។
នាព្រឹកថ្ងៃព្រហស្បតិ៍នេះ ក្រុមប្រឹក្សាគ្រោងបន្តកិច្ចពិភាក្សាដេញដោលលើអង្គហេតុពីឆ្នាំ២០១៣ រហូតដល់ពេលមានការចាប់ខ្លួនលោក កឹម សុខា ប៉ុន្តែ ត្រូវបានអាក់ខានដោយសារមេធាវីរបស់លោក កឹម សុខា បានជំទាស់។ ក្រុមមេធាវីអតីតមេដឹកនាំបក្សប្រឆាំង ចង់ឱ្យតុលាការបង្ហាញភាពច្បាស់លាស់ជុំវិញសំណៅឯកសារស្តីពីសេចក្តីថ្លែងការណ៍រួមរវាងគណបក្សសិទ្ធិមនុស្ស និងគណបក្ស សម រង្ស៊ី ដើម្បីបង្កើតគណបក្សសង្គ្រោះជាតិ។ ពួកគាត់ក៏ទាមទារឱ្យមានការផ្ទៀងផ្ទាត់ថា តើពិតជាមាននៅក្នុងសំណុំឯកសារដើមរបស់ចៅក្រមស៊ើបមែនឬយ៉ាងណា ដោយសារតែក្រុមមេធាវីលោក កឹម សុខា អះអាងថា គ្មានឯកសារនេះក្នុងដៃទេ ដែលទើបទទួលបានពីតុលាការពីម្សិលមិញ ហើយឯកសារនេះទៀតសោត ក៏មានភាពមិនក្រក្រតីមួយចំនួន រួមទាំងការចុះលេខជាដើម។
ទោះបីជាយ៉ាងណា ការទាមទារនេះត្រូវបានតំណាងអយ្យការ ផ្លង់ សុផល ក៏ដូចជាមេធាវីតំណាងរដ្ឋាភិបាលអះអាងថា ជាការលើកឡើងដដែលៗ ហើយថា ឯកសារដែលលោកមានក្នុងដៃរបស់ពួកគាត់គឺថតចម្លងចេញពីសំណុំរឿងដើមរបស់ចៅក្រៅក្រមស៊ើបសួរ។ លោកបន្តថា មេធាវីរបស់លោក កឹម សុខា តែងតែលើកឡើងដដែលៗដោយអះអាងថា ខ្វះនេះខ្វះនោះក្នុងចេតនាពន្យារពេលសវនាការតែប៉ុណ្ណោះ ហើយកង្វះឯកសារនេះគឺជាការទទួលខុសត្រូវផ្ទាល់ខ្លួន។
តំណាងអយ្យការ ផ្លង់ សុផល បន្ថែមថា លោកមិនទាន់បានដាក់ឯកសារថ្មីនៅឡើយទេ ហើយលោកគ្រោងដាក់ឯកសារភស្តុតាងច្រើនទៀត រួមទាំងវីដេអូមួយចំនួនផង។ លោកថា បើទោះបីជាទទួលបានសំណៅឯកសារតាំងពីល្ងាចម្សិលមិញក៏ដោយ ក៏ក្រុមមេធាវីរបស់លោក កឹម សុខា នៅតែចង់ឱ្យតុលាការបង្ហាញភាពច្បាស់លាស់ ដោយសារតែឯកសារដែលក្រុមសហមេធាវីលោកទទួលបានមានភាពខុសគ្នាបីចំណុច ដែលធ្វើឱ្យក្រុមលោកមានការសង្ស័យ។
មេធាវីលោក កឹម សុខា ម្នាក់ទៀត គឺលោក ផែង ហេង បានដាក់ជាចម្ងល់ថា៖ «យើងនៅតែឆ្ងល់ថា ហេតុអ្វីក៏កូពីមិនអស់។ យើងឱ្យលោក អាង ឧត្តម កូពី ក៏នៅតែខ្វះ»។
ការបន្តដេញដោលរវាងតំណាងអយ្យការ និងមេធាវីទាំងសងខាង ព្រមទាំងអន្តរាគមន៍ពីលោកចៅក្រមប្រឹក្សាជាច្រើនលើកច្រើនសារផងនោះ បានឈានដល់ចំណុចតឹងតែងកាន់តែខ្លាំងឡើង ហើយលោកចៅក្រម កូយ សៅ នៅតែអះអាងដដែលៗថា លោកគ្មានចេតនាលាក់បាំងភស្តុតាងទាំងនេះទេ ហើយឯកសារទាំងនេះបានមកពីសំណៅសំណុំរឿងដើមទាំងអស់។
ទីបំផុតលោក ចៅក្រមសម្រេចឱ្យក្រឡាបញ្ជីទៅយកឯកសារដើមពីចៅក្រមស៊ើបសួរ ដើម្បីយកមកផ្ទៀងផ្ទាត់ ខណៈលោកបដិសេធមិនស្តាប់ការព្យាយាមពន្យល់របស់លោកស្រីមេធាវី ម៉េង សុភារី មួយលើកជាពីរលើក ដោយមានទាំងការគោះញញួរឈើផងនោះ។ ក្រុមមេធាវីលោក កឹម សុខា បានសម្រេចចិត្តដើរចេញពីសវនាការតែម្តង ដោយសារលោកចៅក្រមមិនព្រមស្តាប់ហេតុផលរបស់ខ្លួន។
ទោះបីជាយ៉ាងណា បើទោះបីជាមានភាពរអាក់រអួលទាំងបច្ចេកទេសផងនោះ តុលាការនៅបន្តនីតិវិធីដោយធ្វើការផ្ទៀងផ្ទាត់ឯកសារទៅនឹងសំណុំរឿងដើមរបស់ចៅក្រម ដោយគ្មានវត្តមានរបស់មេធាវីលោក កឹម សុខា។
មុនបញ្ចប់សវនាការ លោកប្រធានក្រុមប្រឹក្សា កូយ សៅ បានប្រាប់លោក កឹម សុខា ឱ្យពិចារណាថា តើលោកនឹងនៅបន្តពឹងពាក់មេធាវីដដែលឬយ៉ាងណា ហើយលោកក៏ព្រមានចាត់វិធានការតឹងរ៉ឹងផងដែរលើឥរិយាបថមិនសមរម្យណាមួយនៅសវនាការលើកក្រោយ។
នេះជាសប្តាហ៍ទី៥ហើយដែលសាលាដំបូងរាជធានីភ្នំពេញ បើកសវនាការជំនុំជម្រះក្តីលើលោក កឹម សុខា ក្នុងសំណុំរឿង«ឃុបឃិតជាមួយរដ្ឋបរទេស»។ បើតាមប្រភពពីតុលាការសវនាការលើអតីតមេដឹកនាំគណបក្សប្រឆាំងមួយនេះ ត្រូវចំណាយពេលរហូតដល់ទៅ៣ខែ៕