រោងចក្រផលិតកាបូបចុះបញ្ជីដើម្បីនាំចេញក្នុងគម្រោងអនុគ្រោះពន្ធ ឆ្នាំ២០១៩ កើនឡើងរហូតដល់១៧០% បើប្រៀបធៀបនឹងឆ្នាំ២០១៨។ នេះបើតាមរបាយការណ៍បូកសរុបការងារប្រចាំឆ្នាំ២០១៩ របស់ក្រសួងពាណិជ្ជកម្មកម្ពុជា។
របាយការណ៍បង្ហាញថា នៅឆ្នាំ២០១៩ មានរោងចក្រផលិតកាបូបចំនួន២៧ បានចុះបញ្ជីសុំសិទ្ធិផលិតកាបូបសម្រាប់នាំចេញ។ ចំនួននេះកើនឡើង១៧រោងចក្រ បើគិតជាភាគរយស្មើនឹង១៧០% បើធៀបនឹងឆ្នាំ២០១៨ មានរោងចក្រផលិតកាបូបចុះបញ្ជី មានចំនួនត្រឹម១០រោងចក្រ។
របាយការណ៍បន្តថា រោងចក្រ និងក្រុមហ៊ុនផលិតសម្ភារផ្សេងៗទៀតចំនួន១៣៨ ក៏បានចុះបញ្ជីក្នុងគម្រោងអនុគ្រោះពន្ធប្រចាំឆ្នាំ២០១៩ដែរ។ ចំនួននេះកើនឡើង២៤ក្រុមហ៊ុន បើគិតជាភាគរយគឺកើនឡើង២១% ដែលឆ្នាំ២០១៨ មានក្រុមហ៊ុនចុះបញ្ជីត្រឹម១១៤អង្គភាព។
របាយការណ៍បន្ថែមទៀតថា រោងចក្រកាត់ដេរចុះបញ្ជីកាលពីឆ្នាំ២០១៩ មាន ៥១រោងចក្រ កើនឡើងចំនួន២០រោងចក្រ ឬ២៤% បើធៀបនឹងឆ្នាំ២០១៨ មានរោងចក្រកាត់ដេរចុះបញ្ជី ចំនួន៤១រោងចក្រ ។
អ្នកនាំពាក្យក្រសួងពាណិជ្ជកម្ម លោក ស៊ាង ថៃ មានប្រសាសន៍ថា ការអនុគ្រោះពន្ធពីសហរដ្ឋអាមេរិកជាមូលហេតុចម្បងមួយ ដែលនាំឱ្យមានកំណើននៃការចុះបញ្ជីបើករោងចក្រផលិតកាបូប។
លោក ស៊ាង ថៃ មានប្រសាសន៍ថា៖ «ប៉ុន្មានឆ្នាំកន្លងទៅនេះ សហរដ្ឋអាមេរិកគាត់ឱ្យយើងនាំផលិតផលដែលជា Travelling goods (ផលិតផលធ្វើដំណើរ) មានកាបូបអីៗហ្នឹង ដោយឥតយកពន្ធ នេះជាចំណុចមួយបន្ថែមដែលទាក់ទាញវិនិយោគមកប្រទេសយើង»។
បើតាមលោក ស៊ាង ថៃ រោងចក្រផលិតកាបូបសព្វថ្ងៃនេះ មានចំនួន៥១រោងចក្រ កំពុងដំណើរផលិតកម្ម និងអាជីវកម្មរបស់ខ្លួន។ លោកមិនទាន់អាចព្យាករពីស្ថានភាពផលិតកម្មវិស័យកាបូបនេះ បន្ទាប់ពីការសម្រេចរបស់អឺរ៉ុបលើ EBA រួចមកនោះទេ។
គណៈកម្មការអឺរ៉ុបកាលពីថ្ងៃទី១២ ខែកុម្ភៈ បានសម្រេចយកពន្ធលើទំនិញកម្ពុជានាំទៅសហភាពអឺរ៉ុប ចំនួន៤០មុខ ដែលមានទំហំទឹកប្រាក់ជាង១ពាន់លានអឺរ៉ូ។ សេចក្តីសម្រេចនេះ នឹងប៉ះពាល់ដល់ផលិតផលស្បែកជើង និងសម្លៀកបំពាក់ខ្លះ ប៉ះពាល់ទាំងស្រុងលើផលិតផលសម្រាប់ធ្វើដំណើរ (កាបូប) និងស្ករស។
ប្រធានសហភាពការងារកម្ពុជា លោក អាត់ ធន់ មានប្រសាសន៍ថា ដំណើរការរោងចក្រផលិតកាបូបសម្រាប់ផលិតនាំចេញទៅលក់នៅអាមេរិក នឹងនៅតែមានសក្តានុពលព្រោះតែមានអនុគ្រោះពន្ធ។
លោក អាត់ ធន់ លើកឡើងថា៖ «អ៊ីចឹង បានន័យថា ទំហំទឹកប្រាក់នៃការនាំកាបូបចេញហ្នឹងកើនឡើងច្រើន ដោយសារការនាំចេញទៅអាមេរិកហ្នឹង អត់យកពន្ធដូចទៅអឺរ៉ុបដែរ ប៉ុន្តែ ក្រៅពីផលិតផលធ្វើដំណើរគឺយកពន្ធ។ ខ្ញុំយល់ថា វិស័យកាបូបនឹងខិតខំពង្រីកខ្លួនហើយ ដោយសារអាមេរិកអត់ទាន់ដាក់ទណ្ឌកម្មទេ»។
លោក អាត់ ធន់ បញ្ជាក់ថា ការនាំចេញផលិតផលធ្វើដំណើរទៅអាមេរិកកើនឡើងជាបន្តបន្ទាប់។ កាលពីឆ្នាំ២០១៧ កម្ពុជានាំកាបូបចេញទៅអាមេរិក ក្នុងរង្វង់ទឹកប្រាក់ ៣រយលានដុល្លារ នៅឆ្នាំ២០១៩ ការនាំចេញផលិតផលធ្វើដំណើរទៅអាមេរិកចំនួនប្រមាណជាង ១ពាន់លានដុល្លារ។
អ្នកស្រាវជ្រាវនៃរាជបណ្ឌិតសភាកម្ពុជា លោកបណ្ឌិត គី សេរីវឌ្ឍន៍ មានប្រសាសន៍ថា រាជរដ្ឋាភិបាលកម្ពុជា គួរណាស់តែជំរុញអ្នករកស៊ីឱ្យបណ្ដាក់ទុនលើជំនួញណាដែលមានការអនុគ្រោះពន្ធពីសំណាក់ដៃគូអភិវឌ្ឍន៍។ លោកបញ្ជាក់ថា វិស័យផលិតកាបូបល្អទាំងការអនុគ្រោះពន្ធ និងមានប្រភពវត្ថុធាតុដើម។
លោក គី សេរីវឌ្ឍន៍ និយាយថា៖ «រោងចក្រកាត់ដេរអាចផ្អាក ព្រោះខ្វះវត្ថុធាតុដើមដែលនាំចូលពីប្រទេសចិន ស្របពេលចិនមានផ្ទុះជំងឺ។ ចំណែកកាបូបអត់បញ្ហានោះទេ ចាំបាច់ត្រូវគិតគូរពីរឿងនេះ»។
ទីផ្សារធំជាងគេបង្អស់របស់កម្ពុជាគឺសហភាពអឺរ៉ុប។ ក្នុងឆ្នាំ២០១៨ កម្ពុជានាំទំនិញទៅអឺរ៉ុប មានទំហំទឹកប្រាក់ប្រមាណ ៥,៨៨ពាន់លានដុល្លារ ក្នុងនោះធ្វើឡើងក្រោមប្រព័ន្ធអនុគ្រោះពន្ធ មានរហូតដល់ជិត៩៦% ឬក្នុងទំហំទឹកប្រាក់ ៥,៦៦ពាន់លានដុល្លារ។ ទំនិញដែលកម្ពុជានាំចេញទៅទីផ្សារអឺរ៉ុប រួមមាន សម្លៀកបំពាក់ ៧៤,២% ស្បែកជើង ១២,៦% កង់ ៥,៧% និងអង្ករ ៣% ស្ករស និងផលិតផលផ្សេងៗទៀត។
ទីផ្សារធំទី២ របស់កម្ពុជាគឺសហរដ្ឋអាមេរិក។ របាយការណ៍របស់អង្គភាពជំរឿនពាណិជ្ជកម្មអាមេរិក បង្ហាញថា កម្ពុជានាំទំនិញទៅអាមេរិក មានទំហំទឹកប្រាក់ប្រមាណជាង ៣ពាន់ ៨រយលានដុល្លារ ក្នុងឆ្នាំ២០១៨។
បើតាមក្រសួងពាណិជ្ជកម្ម គិតត្រឹមខែឧសភា ឆ្នាំ២០១៩ កម្ពុជាមានរោងចក្រកាត់ដេរ វាយនភ័ណ្ឌស្បែកជើង កាបូប សរុបប្រមាណជាង ១ពាន់ ៥រយរោងចក្រ ដែលមានកម្មករបម្រើការងារប្រមាណជាង ៨០ម៉ឺននាក់ ដែលភាគច្រើនជាស្ត្រី។
អ្នកនាំពាក្យក្រសួងការងារ លោក ហេង សួរ ថ្លែងក្នុងកិច្ចសម្ភាសន៍ជាមួយកាសែតខ្មែរថាមស៍ ថាវិស័យការងាររោងចក្រនៅកម្ពុជា នៅតែមានស្ថិរភាពនៅឡើយក្នុងពេលបច្ចុប្បន្ននេះ។ លោកបញ្ជាក់ថា កាលពីឆ្នាំ២០១៩ នៅកម្ពុជាមានរោងចក្រចំនួន ១៤៦រោងចក្រត្រូវបានបិទ ដែលនាំឱ្យកម្មករ ៥ម៉ឺនាក់បាត់បង់ការងារ។ ប៉ុន្តែ រោងចក្របើកថ្មីមានចំនួន ១៨៩ ដែលត្រូវការកម្មករជាង៨ម៉ឺននាក់។
លោកថា៖ «សព្វថ្ងៃនេះ ក្រសួងការងាររវល់ជាមួយម្ចាស់រោងចក្រ ដើម្បីស្វែងរកកម្មករអោយធ្វើការផង»។
លោក ហេង សួរ បញ្ជាក់ថា ខាងរោងចក្រនៅខេត្តមួយចំនួនខ្វះកម្មករ ដូចជា កំពង់ស្ពឺ ខ្វះ៨ពាន់ ខេត្តព្រះសីហនុ ខ្វះជាង១ម៉ឺន និងភ្នំពេញ ខ្វះ២ម៉ឺនាក់ឯណោះ។
របាយការណ៍របស់ក្រសួងពាណិជ្ជកម្មបង្ហាញថា ក្នុងរយៈពេល១០ខែ ឆ្នាំ២០១៩ កម្ពុជានាំចេញទំនិញទៅគ្រប់ទ្វីបក្រោមប្រព័ន្ធអនុគ្រោះពាណិជ្ជកម្ម និងកិច្ចព្រមព្រៀងពាណិជ្ជកម្មសេរី មានទំហំទឹកប្រាក់ប្រមាណជាង ១ម៉ឺន៨១៣លានដុល្លារសហរដ្ឋអាមេរិក។ ក្នុងនោះ កម្ពុជានាំចេញសម្លៀកបំពាក់ក្នុងទំហំទឹកប្រាក់ ៦ពាន់៤០៦លានដុល្លារ នាំចេញវាយនភ័ណ្ឌទឹកប្រាក់ចំនួនជាង ៤០លានដុល្លារ នាំចេញស្បែកជើងមានទឹកប្រាក់ជាង ៩០៥លានដុល្លារ នាំចេញអង្ករមានទឹកប្រាក់ ២៨៦លានដុល្លារ និងនាំចេញផលិតផលផ្សេងៗទៀតមានទឹកប្រាក់ប្រមាណជាង ៣ពាន់១៧៤លានដុល្លារ៕
