ក្រសួងរ៉ែ និងថាមពល បានដកហូតអាជ្ញាបណ្ណការដ្ឋានប្រតិបត្តិធនធានរ៉ែចំនួន២១ និងពិន័យជាប្រាក់ជាង៨ម៉ឺនដុល្លារនៅក្នុងឆ្នាំ២០១៩ តាមការសម្រេចរបស់តុលាការ។
ក្នុងសេចក្តីប្រកាសព័ត៌មានរបស់ក្រសួងរ៉ែ និងថាមពល ចេញផ្សាយនៅល្ងាចថ្ងៃពុធ ទី១២ ខែកុម្ភៈ គឺភ្លាមៗក្រោយពីក្រសួងនេះបញ្ចប់សន្និបាតបូកសរុបលទ្ធផលការងារឆ្នាំ២០១៩ និងទិសដៅការងារឆ្នាំ២០២០ បានបង្ហាញថា ការដ្ឋានប្រតិបត្តិការធនធានរ៉ែចំនួន៣១៦ការដ្ឋាន ត្រូវបានក្រសួងត្រួតពិនិត្យ។ របាយការណ៍បញ្ជាក់ថា ក្រសួងបានសម្រេចព្យួរ ដកហូត និងបញ្ចប់សុពលភាពចំនួន២១ការដ្ឋាន ព្រមទាំងពិន័យជាប្រាក់ចំនួន៨៨៤០៤ដុល្លារ ដោយអនុវត្តបណ្តឹងតាមនីតិវិធីរបស់តុលាការ។
សេចក្តីប្រកាសព័ត៌មានដដែលឱ្យដឹងទៀតថា សកម្មភាពអាជីវកម្មរ៉ែអនាធិបតេយ្យតាមដងទន្លេ ត្រូវបានទប់ស្កាត់ និងបង្ក្រាបបានស្ទើរទាំងស្រុង ខណៈសកម្មភាពរ៉ែអនាធិបតេយ្យក្នុងខេត្តមណ្ឌលគិរី បាត់ដំបង កំពង់ធំ ព្រះវិហារ និងខេត្តក្រចេះ ត្រូវបានបង្ក្រាបជាប្រចាំផងដែរ៕