ក្រសួងរ៉ែ និងថាមពលបានឱ្យដឹងថា ស្ថានីយប្រេងឥន្ធនៈ និងឧស្ម័ននៅទូទាំងប្រទេសចំនួន៨២% មិនមានលិខិតបញ្ជាក់ពីបច្ចេកទេសសុវត្ថិភាព និងវិញ្ញាបនបត្រស្របច្បាប់។
ក្នុងសេចក្តីប្រកាសព័ត៌មានរបស់ក្រសួងរ៉ែ និងថាមពល ចេញផ្សាយនៅល្ងាចថ្ងៃពុធ ទី១២ ខែកុម្ភៈ គឺភ្លាមៗក្រោយពីក្រសួងនេះបញ្ចប់សន្និបាតបូកសរុបលទ្ធផលការងារឆ្នាំ២០១៩ និងទិសដៅការងារឆ្នាំ២០២០ បានបង្ហាញថា ស្ថានីយប្រេងឥន្ធនៈ និងឧស្ម័ននៅទូទាំងប្រទេសកម្ពុជា មានចំនួន៤០០០ស្ថានីយ ក្នុងចំណោមនោះមាន៧០០ស្ថាននីយដែលស្មើនឹង១៨% បានទទួលលិខិតបញ្ជាក់ពីបច្ចេកទេសសុវត្ថិភាព និងវិញ្ញាបនបត្រអនុញ្ញាតឱ្យដំណើរការស្របច្បាប់។ តាមក្រសួងរ៉ែ និងថាមពល ស្ថានីយប្រេងចំនួនចំនួន៣៣០០ ដែលស្មើនឹង៨២% មិនមានលិខិតបញ្ជាក់ពីបច្ចេកទេសសុវត្ថិភាព និងវិញ្ញាបនបត្រស្របច្បាប់នោះទេ។
វីអូឌី មិនអាចសុំការបំភ្លឺពីអ្នកនាំពាក្យក្រសួងរ៉ែ និងថាមពល លោក យស មុនីរ៉ាត់ និងលោក ទុន លាន និងអគ្គនាយក នៃអគ្គនាយកដ្ឋានប្រេងកាត លោក ជៀប សួរ បានទេរហូតមកដល់រសៀលថ្ងៃនេះ។
នាយកប្រតិបត្តិអង្គការតម្លាភាពកម្ពុជា លោក ព្រាប កុល មានប្រសាសន៍ថា ក្រសួងរ៉ែបានបណ្តែតបណ្តោយឱ្យក្រុមហ៊ុនមួយចំនួនធ្វើអាជីវកម្មប្រកួតប្រជែងបែបអនាធិបតេយ្យ ដោយប្រកាន់បក្សពួកនិយម។ លោកជំរុញទៅស្ថាប័នរដ្ឋពង្រឹងការអនុវត្តច្បាប់ឱ្យមានតម្លាភាព ទើបទទួលបានផលវិជ្ជមាន។
លោកមានប្រសាសន៍ថា៖ «មកដល់ពេលនេះ គួរតែបោសសំអាត ហើយរៀបចំឱ្យគាត់មកបង់ពន្ធ គោរពច្បាប់ពាណិជ្ជកម្ម ហើយតម្រូវឱ្យគាត់អនុវត្តតាមស្តង់ដារបច្ចេកទេស ច្បាប់ជាតិដែលបានចែងមក»។
អ្នកនាំពាក្យក្រសួងសេដ្ឋកិច្ច និងហិរញ្ញវត្ថុ លោក មាស សុខសេនសាន្ត មានប្រសាសន៍ថា ក្រុមការងារក្រសួងកំពុងធ្វើការស្រាវជ្រាវរកម្ចាស់ស្ថានីយទាំងនោះ ដើម្បីឱ្យពួកគេអនុវត្តតាមច្បាប់។
លោកមានប្រសាសន៍ថា៖ «ប្រាកដហើយ វាមិនទាន់បាន១០០% [បង់ពន្ធបាន១០០%] ទេ ខ្ញុំអាចឆ្លើយជាគោលនយោបាយអញ្ចឹង ហើយសួរថាប៉ុន្មាន ខ្ញុំឆ្លើយអត់ទាន់កើតទេ យើងកំពុងលើកទឹកចិត្តឱ្យគ្រប់អ្នករកស៊ីធន់តូច ធន់មធ្យមទាំងអស់ ឱ្យគាត់មានបញ្ជីស្នាម ជាទូទៅដូចខ្ញុំនិយាយអញ្ចឹង យើងខិតខំធ្វើ ដើម្បីឱ្យគ្រប់គ្នាបង់ពន្ធ ទាំងអស់គ្នាត្រូវមានកាតព្វកិច្ចកាន់បញ្ជីស្នាមបង់ពន្ធ»។
ច្បាប់ស្តីពី «ការគ្រប់គ្រងប្រេងកាត និងផលិតផលប្រេងកាត» បានចូលជាធរមាន និងប្រកាសឱ្យប្រើប្រាស់ជាផ្លូវការ កាលពីថ្ងៃ១២ ខែកក្កដា ឆ្នាំ២០១៩ ដែលច្បាប់នេះមានចំនួន៩ជំពូក និង៧២មាត្រា។
មាត្រា៦៦នៃច្បាប់នេះចែងថា បុគ្គលណាធ្វើសកម្មភាពដោយគ្មានវិញ្ញាបនបត្របញ្ជាក់បច្ចេកទេសសុវត្ថិភាព ពីក្រសួងរ៉ែ និងថាមពល ដូចមានចែងក្នុងមាត្រា៤២នៃច្បាប់នេះ មុននឹងចាប់ផ្តើមសាងសង់ហេដ្ឋារចនាសម្ព័ន្ធ ត្រូវធ្វើការផាកពិន័យតាមទំហំរចនាសម្ព័ន្ធដែលមានតម្លៃក្រោម ៨០០.០០០.០០០ (ប្រាំបីរយលានរៀល) ត្រូវផាកពិន័យជាប្រាក់ដោយក្រសួងរ៉ែ ៤.០០០.០០០ (បួនលាន)រៀល។
ចំពោះរចនាសម្ព័ន្ធដែលមានតម្លៃចាប់ពី៨០០.០០០.០០០ (ប្រាំបីរយលានរៀល) ត្រូវផាកពិន័យជាប្រាក់ដោយក្រសួងរ៉ែ ចំនួន ១០.០០០.០០០ (ដប់លាន)រៀល និងត្រូវផ្អាកសកម្មភាពសាងសង់នានា។ ដោយឡែក បើនៅតែបន្តប្រព្រឹត្តដដែល ត្រូវផាកពិន័យជាប្រាក់ចំនួនទ្វេដងផងដែរ៕
