លោកនាយករដ្ឋមន្ត្រី ហ៊ុន សែន ប្រកាសអនុញ្ញាតឱ្យភ្ញៀវទេសចរចាកចេញពីលើនាវា Westerdam ហើយអាចដើរលេងកម្សាន្តនៅខេត្តព្រះសីហនុ និងខេត្តសៀមរាបបាន ក្រោយពីក្រសួងសុខាភិបាលពិនិត្យសុខភាពអ្នកទាំងអស់នោះហើយរកមិនឃើញមានឆ្លងវីរុសកូរ៉ូណា។
ក្នុងពិធីជួបស្វាគមន៍ដោយផ្ទាល់ជាមួយអ្នកដំណើរនៅលើនាវាទេសចរណ៍ Westerdam នៅកំពង់ផែក្រុងព្រះសីហនុ នាថ្ងៃនេះ លោក ហ៊ុន សែន ថ្លែងថា ភ្ញៀវទេសចរដែលនៅលើនាវា Westerdam អាចដើរលេងកម្សាន្តនៅប្រទេសកម្ពុជាបានដោយសេរី។
លោកនាយករដ្ឋមន្ត្រីថ្លែងថា៖ «អ្នកនៅលើនាវាទាំងអស់ អាចចាកចេញធ្វើដំណើរកម្សាន្តក្នុងខេត្តព្រះសីហនុ ហើយប្រសិនបើមានបំណងទៅទស្សនកិច្ចនៅខេត្តសៀមរាបទីនោះ យើងនឹងបង្កលក្ខណៈងាយស្រួល មានក្រុមហ៊ុនអាកាសចរណ៍កម្ពុជា ៤គ្រឿងដែលបានត្រៀមរៀបចំសម្រាប់ការដឹកជញ្ជូន។អ៊ីចឹងសូមឱ្យឯកឧត្ដម ស៊ុន ចាន់ផុល ឯកឧត្ដម គួច ចំរើន ជួយផ្ដល់ឱកាសអ្នកនៅលើនាវា ដើម្បីចុះទៅងូតទឹក និងទៅមើលកន្លែងកម្សាន្តនានា»។
លោក ហ៊ុន សែន ក៏បានអំពាវនាវទៅប្រជាពលរដ្ឋ អ្នកធ្វើការតាមសណ្ឋាគារ ភោជនីយដ្ឋាន នៅខេត្តព្រះសីហនុកុំឱ្យរើសអើង និងភ័យខ្លាច ឆ្លងវីរុសកូរ៉ូណា ដោយថា ប្រសិនបើអ្នកដំណើរទាំងនោះ មានកូរ៉ូណាមែន អ្នកដែលត្រូវឆ្លងមុនគេ គឺជារូបលោក។
ការអនុញ្ញាតឱ្យអ្នកដំណើរជាង ២០០០នាក់ចេញពីនាវានាថ្ងៃនេះ ធ្វើឡើងបន្ទាប់ពីក្រសួងសុខាភិបាលពិនិត្យសុខភាពអ្នកដំណើរនៅលើកប៉ាល់ទាំងអស់រួច។
ដោយឡែកមនុស្ស ២០នាក់ ដែលមានបញ្ហាសុខភាពលើនាវា ហើយត្រូវបានក្រសួងសុខាភិបាលយកសំណាកមកពិនិត្យនៅមន្ទីរពិសោធន៍វិទ្យាស្ថានប៉ាស្ទ័រ កាលពីម្សិលមិញ ក្រសួងបង្ហាញថា អ្នកទាំងនោះមិនមានឆ្លងវីរុសកូរ៉ូណាទេ។
អ្នកនាំពាក្យខេត្តព្រះសីហនុ លោក ឃាង ភារម្យ មានប្រសាសន៍ថា អ្នកដំណើរតាមនាវាវ៉េសស្ទើដាម (Westerdam) ជាង ៤០០នាក់ នឹងចេញពីប្រទេសកម្ពុជានៅថ្ងៃនេះ។
លោកថា៖ «មនុស្សទាំង១១៩នាក់ចាកចេញតាមជើងហោះហើរ Lanmei Airline នៅម៉ោង៨:០០ នាទី។ ក្រុមទី២ ដែលមានមនុស្ស១៤១ ចាកចេញពីព្រលានយន្តហោះអន្តរជាតិខេត្តព្រះសីហនុ មកកាន់ព្រលានយន្តហោះអន្តរជាតិភ្នំពេញនៅម៉ោង១២ថ្ងៃត្រង់ ហើយក្រុមទី៣ ចេញម៉ោង ៣:៣០រសៀល មានមនុស្សចំនួន ១៤៧នាក់»។
កប៉ាល់ទេសចរណ៍អាមេរិក វ៉េសស្ទើដាម «Westerdam» បានចេញធ្វើដំណើរពីទីក្រុងហុងកុង កាលពីថ្ងៃទី០១ ខែកុម្ភៈ។ មន្រ្តីកម្ពុជាឱ្យដឹងថា កប៉ាល់នេះមានផ្ទុកអ្នកដំណើរប្រមាណ ១៤៥៥នាក់ និងបុគ្គលិកបម្រើការងារក្នុងនោះចំនួន ៨០២នាក់ មកពី ៤១ជាតិសាសន៍។ នាវាវ៉េសស្ទើដាម (Westerdam) ត្រូវបានកោះតៃវ៉ាន់ ហ្វីលីពីន ជប៉ុន កូរ៉េខាងត្បូង កោះហ្គាំ និងប្រទេសថៃ បដិសេធមិនឱ្យចូលចត ដោយពួកគេបារម្ភថា អ្នកនៅលើនាវានោះអាចមានផ្ទុកវីរុសកូរ៉ូណា៕