ប្រជាពលរដ្ឋជាង១០០នាក់មកពីស្រុកស្រែអំបិល ខេត្តកោះកុង ប្រមូលផ្តុំគ្នាមុខតុលាការកំពូលនៅថ្ងៃនេះ ដើម្បីគាំទ្រតំណាងពួកគេ៥នាក់ចូលសវនាការពាក់ព័ន្ធសំណុំរឿងវិវាទដីធ្លីជាមួយឧកញ៉ា ហេង ហ៊ុយ កាលពីជាង១០ឆ្នាំមុន។
ក្នុងលិខិតមួយចុះថ្ងៃទី២២ ខែមករា ប្រធានក្រុមប្រឹក្សាជំនុំជម្រះនៃតុលាការកំពូល លោក យូរ ឧត្តរា បានបង្គាប់ឱ្យតំណាងពលរដ្ឋ៥នាក់ មានអ្នកស្រី ផាវ ញើង អ្នកស្រី សួង វិន អ្នកស្រី សួស អ៊ុំ និងអ្នកស្រី ឈុន រ៉ាន់ ចូលទៅតុលាការកំពូលនៅថ្ងៃទី១៤ ខែកុម្ភៈនេះ ដើម្បីចូលរួមដំណើរការទាញហេតុផលដោយផ្ទាល់មាត់ទាក់ទងនឹងវិវាទប្តឹងសុំមោឃភាពកិច្ចសន្យាប្រគល់ដីចំនួន៥ច្បាប់កាលឆ្នាំ២០១១។
អ្នកស្រី ដេត ហួរ ដែលអះអាងថា ជាតំណាងពលរដ្ឋ១៩៧គ្រួសារនៅស្រុកស្រែអំបិល ប្រាប់វីអូឌីនៅមុខតុលាការថា អ្នកភូមិនាំគ្នាមកគាំទ្រតំណាងពលរដ្ឋ៥នាក់ គឺចង់បង្ហាញថា តំណាងទាំងនោះត្រូវបានក្រុមហ៊ុន ហេង ហ៊ុយ រំលោភយកដីធ្លីទាំងអយុត្តិធម៌ដូចពួកគាត់ដែរ។
អ្នកស្រីបន្ថែមថា៖ «ឧកញ៉ា ហេង ហ៊ុយ បានរំលោភយកដីធ្លីពលរដ្ឋទាំង១៥គ្រួសារ និង១៩៧គ្រួសារ។ អីចឹង ពួកយើងមកនេះចង់ដឹងថា តុលាការកំពូលលោកកាត់ក្តីបានត្រឹមត្រូវ ឬអត់។ ពួកខ្ញុំឡើងមកគាំទ្រនេះក្នុងនាមរងបណ្តឹង ហេង ហ៊ុយ និងបាត់បង់ដីធ្លីដូចគ្នា»។
តំណាងពលរដ្ឋអ្នកស្រី ផាវ ញើង ប្រាប់វីអូឌីក្រោយចេញពីតុលាការថា កាលឆ្នាំ២០១០ ក្រុមហ៊ុន ហេង ហ៊ុយ បានដាក់គ្រឿងចក្រឈូសឆាយដីធ្លី និងផលដំណាំផ្សេងៗរបស់ពួកគាត់៥គ្រួសារអស់ជាច្រើនហិកតា ហើយបានបង្ខំឱ្យទទួលយកសំណងបន្តិចបន្តួចដែលពួកគាត់មិនពេញចិត្ត។ អ្នកស្រីបន្តថា នៅឆ្នាំ២០១២ ពួកគាត់ទាំង៥គ្រួសារបានដាក់បណ្តឹងទៅតុលាការកំពូល ដើម្បីសុំលុបកិច្ចសន្យានោះចោល។
តំណាងពលរដ្ឋរូបនេះបន្ថែមថា នៅចំពោះមុខប្រធានក្រុមប្រឹក្សាជំនុំជម្រះ នៃតុលាការកំពូល គឺតំណាងពលរដ្ឋទាំង៥នាក់បានបញ្ជាក់ប្រាប់តុលាការថា កិច្ចសន្យានោះធ្វើឡើងដោយការបង្ខិតបង្ខំ ការគំរាមកំហែង និងភូតកុហកប្រជាពលរដ្ឋពីសំណាក់លោកឧកញ៉ា ហេង ហ៊ុយ។
អ្នកស្រីបន្ថែមថា៖ «ពួកយើងសង្ឃឹមថា លោកចៅក្រមជំនុំជម្រះ នឹងលុបកិច្ចសន្យាឆ្នាំ២០១០នោះចោល ហើយជំរុញឱ្យក្រសួងរៀបចំដែនដីដោះស្រាយដីឱ្យពួកខ្ញុំ និងចេញប្លង់កម្មសិទ្ធដល់ពួកខ្ញុំនៅភូមិព្រែកជីក ឃុំជីខក្រោម បើដាក់ភូមិផ្សេងក៏ពួកខ្ញុំមិនទទួលយកដែរ ប្លង់ហ្នឹង»។
អ្នកស្រី ផាវ ញើង អះអាងថា កាលពីក្រុមហ៊ុន ហេង ហ៊ុយ មិនទាន់ឈូសឆាយប៉ះពាល់លើដីអ្នកស្រី គឺគ្រួសារអ្នកស្រីបានកាន់កាប់លើក្បាលដីទទឹង៤០ម៉ែត្រ និងបណ្តោយ៣០០ម៉ែត្រ ប៉ុន្តែ ក្រោយក្រុមហ៊ុនឈូសឆាយ គឺលោក ហេង ហុយ ដោះស្រាយដោយបង្ខំឱ្យអ្នកស្រីធ្វើកិច្ចសន្យាទទួលក្បាលដីទទឹងត្រឹម៣០ម៉ែត្រ និងបណ្តោយ១៥០ម៉ែត្រប៉ុណ្ណោះ ដែលជាហេតុធ្វើឱ្យអ្នកស្រីមិនពេញចិត្ត និងបានប្តឹងទៅតុលាការឱ្យលុបចោលកិច្ចសន្យានោះ។
វីអូឌី មិនសុំការឆ្លើយតបពីមេធាវី និងលោក ហេង ហ៊ុយ ម្ចាស់ក្រុមហ៊ុន ហេង ហ៊ុយ អេគ្រីខាល់ឈ័រគ្រុប បានទេពាក់ព័ន្ធករណីនេះ។
បើតាមអ្នកស្រី ផាវ ញើង តុលាការកំពូលប្រាប់តំណាងពលរដ្ឋថា នឹងប្រកាសសាលដីកានៃសវនាការសុំណុំរឿងនេះនៅថ្ងៃទី២៨ ខែកុម្ភៈ។
មន្ត្រីឃ្លាំមើលការរំលោភសិទ្ធិមនុស្សនៅអង្គការលីកាដូប្រចាំខេត្តកោះកុង លោក ប៉ែន វុទ្ធា មានប្រសាសន៍ថា ប្រសិនបើការធ្វើកិច្ចសន្យានោះមានការបង្ខិតបង្ខំ និងគំរាមកំហែងដូចពលរដ្ឋលើកឡើងមែន តុលាការកំពូលត្រូវពិចារណាលុបចោល ហើយជំរុញឱ្យមានដំណោះស្រាយជូនពលរដ្ឋឱ្យបានឆាប់។
មន្ត្រីឃ្លាំមើលការរំលោភសិទ្ធមនុស្សរូបនេះបន្តថា ករណីវិវាទដីធ្លីរវាងប្រជាពលរដ្ឋ និងក្រុមហ៊ុន ហេង ហ៊ុយ កើតឡើងយូរឆ្នាំហើយ។ លោកថា ការពន្យារពេលមិនដោះស្រាយបញ្ចប់នេះ បានធ្វើឱ្យពលរដ្ឋខាតបង់ពេលវេលាក្នុងការដើរតវ៉ាជាយូរឆ្នាំ។
លោកបន្ថែមថា៖ «ការដោះស្រាយបញ្ហាជូនប្រជាពលរដ្ឋហាក់ដូចជាមានភាពយឺតយ៉ាវ ធ្វើឱ្យពួកគាត់មិនទទួលបានភាពយុត្តិធម៌ ធ្វើឱ្យពួកគាត់រង់ចាំដំណោះស្រាយអស់រយៈពេលជាច្រើនឆ្នាំ។ ហើយរឿងនេះប្រសិនជាមានការបង្ខិតបង្ខំឱ្យធ្វើលិខិតស្នាមពិតមែន តុលាការគួរតែធ្វើការពិចារណាលុបចោលវិញ។ ហើយរុញទៅឱ្យអាជ្ញាធរពាក់ព័ន្ធពន្លឿនការដោះស្រាយជូនពលរដ្ឋ ព្រោះជាឯកសារបង្ខិតបង្ខំ មិនអាចយកជាការបានទេ»។
បើតាមតំណាងពលរដ្ឋ បន្ទាប់ពីអ្នកភូមិធ្វើសកម្មភាពប្រមូលផ្តុំនៅមុខតុលាការកំពូលរួចមក គឺពួកគេទៅប្រមូលផ្តុំមុខក្រសួងមហាផ្ទៃ និងក្រសួងរៀបចំដែនដី នគរូបនីយកម្ម និងសំណង់ទៀត ដើម្បីជំរុញទៅស្ថាប័នទាំងពីរពន្លឿនដោះស្រាយដីធ្លី និងចេញប័ណ្ណកម្មសិទ្ធជូនពួកគេ៕
