មន្ត្រីសុខាភិបាលកម្ពុជា បានឱ្យដឹងថា គ្មានអ្នកដំណើរណាម្នាក់នៃនាវា MS Westerdam និងបុគ្គលិកនៃនាវានេះ ត្រូវបានរកឃើញថាផ្ទុកមេរោគកូរ៉ូណាថ្មីនោះឡើយ បន្ទាប់ពីមានក្ដីបារម្ភអំពីការរីករាលដាលនៃមេរោគនេះកើតមានឡើងនៅក្នុងចំណោមភ្ញៀវទេសចរអន្តរជាតិនៅលើនាវានេះ។
នាវាកម្សាន្ត MS Westerdam បានចូលសំចតនៅកម្ពុជាកាលពីថ្ងៃទី១៣ ខែកុម្ភៈសប្ដាហ៍មុន បន្ទាប់ពីប្រទេស និងដែនដីកោះចំនួន ៥ មិនអនុញ្ញាតឱ្យនាវាមួយនេះចូលចត ព្រោះតែក្ដីបារម្ភអំពីការរីករាលដាលនៃមេរោគកូរ៉ូណាថ្មី។
ក្ដីបារម្ភនៃការឆ្លងមេរោគកូរ៉ូណាថ្មីនេះ បានកើនឡើងថែមទៀត ក្រោយពីស្ត្រីជាអ្នកដំណើរជនជាតិអាមេរិកម្នាក់ ដែលចាកចេញពីនាវានេះ ត្រូវបានអាជ្ញាធរសុខាភិបាលម៉ាឡេស៊ី ធ្វើតេស្តរកឃើញផ្ទុកមេរោគនេះ នៅពេលស្ត្រីវ័យ ៨៣ឆ្នាំរូបនោះ បានធ្វើដំណើរទៅដល់ព្រលានយន្តហោះអន្តរជាតិគួឡាឡំពួរ កាលពីថ្ងៃសៅរ៍សប្ដាហ៍មុន។
អ្នកនាំពាក្យសាលាខេត្តព្រះសីហនុ លោក ឃាង ភារម្យ បានឱ្យដឹងកាលពីថ្ងៃម្សិលមិញថា អ្នកដំណើរអន្តរជាតិ និងបុគ្គលិកបម្រើការលើនាវានោះសរុប ៩៨០នាក់ កំពុងបន្តស្ថិតនៅលើនាវានៅឡើយ ខណៈដែលអ្នកដំណើរអន្តរជាតិប្រហែល ៥០០នាក់ផ្សេងទៀត ដែលបានចាកចេញពីនាវានោះរួចហើយនោះ បានស្នាក់នៅឯសណ្ឋាគារសុខា អូតែល នៅរាជធានីភ្នំពេញ។
មន្ត្រីនាំពាក្យរូបនេះ បានប្រាប់វីអូឌីនៅថ្ងៃនេះទៀថា ការយកសំណាកនៃអ្នកដំណើរលើនាវាសរុប ២៣៣នាក់ ត្រូវបានមន្ត្រីសុខាភិបាលកម្ពុជា ធ្វើរួចរាល់ហើយនៅព្រឹកថ្ងៃនេះ ហើយការយកសំណាកពីបុគ្គលិកបម្រើការលើនាវានោះ កំពុងដំណើរការរហូតដល់រសៀលថ្ងៃនេះ។
លោក ឃាង ភារម្យ ប្រាប់ថា៖ «សម្រាប់ថ្ងៃនេះ យើងកំពុងតែធ្វើការងារយកសំណាកទាំងអ្នកដំណើរ និងបុគ្គលិកដែលបម្រើការងារលើនាវា។ […] ហើយព្រឹកមិញនេះ ចំពោះសំណាករបស់អ្នកដំណើរ ២៣៣នាក់ហ្នឹង ត្រូវបានធ្វើរួចរាល់ ហើយបញ្ជូនទៅប៉ាស្ទ័រ ដើម្បីវិភាគរកលទ្ធផល។ ដោយឡែក ចំពោះបុគ្គលិកបម្រើការងារលើនាវា គឺយើងកំពុងដំណើរការនៃការយកសំណាកបន្តទៀត»។
អ្នកនាំពាក្យក្រសួងសុខាភិបាល លោក លី សូវ៉ាន់ បានប្រាប់ថា ការវិភាគលើសំណាកនៃអ្នកដំណើរ និងបុគ្គលិកបម្រើការលើនាវា Westerdam បានបង្ហាញថា គ្មាននរណាម្នាក់ឆ្លងមេរោគកូរ៉ូណាថ្មីនោះឡើយរហូតដល់រសៀលម៉ោង ៤កន្លះថ្ងៃនេះ។
លោក លី សូវ៉ាន់ ប្រាប់ថា៖ «រហូតម៉ោង ៤កន្លះ ថ្ងៃទី១៨ កុម្ភៈ ឆ្នាំ២០២០នេះ រាល់វត្ថុវិភាគរាប់រយវត្ថុវិភាគ ដែលយើងយកពីភ្នំពេញ ក៏ដូចជាក្រុងព្រះសីហនុ គឺអវិជ្ជមានទាំងអស់»។
នៅក្នុងពិធីចែកសញ្ញាបត្រដល់គរុនិស្សិតនៅព្រឹកថ្ងៃនេះដែរ លោកនាយករដ្ឋមន្ត្រី ហ៊ុន សែន អះអាងជាសាធារណៈថា អាជ្ញាធរកម្ពុជានឹងប្រើយន្តហោះ ៣គ្រឿងសម្រាប់ដឹកអ្នកដំណើរនៃនាវា MS Westerdam ចេញពីកម្ពុជាទៅកាន់ប្រទេសផ្សេងៗនៅថ្ងៃនេះ។
លោក ហ៊ុន សែន បានថ្លែងថា អ្នកដំណើរនៃនាវា MS Westerdam ប្រមាណ ៥០០នាក់ ដែលកំពុងស្នាក់នៅរាជធានីភ្នំពេញ នឹងចាកចេញពីកម្ពុជាតាមជើងយន្តហោះ ៧៧៧មួយគ្រឿង ដែលអាចដឹកមនុស្សបានជាង ៣០០នាក់ ហោះហើរទៅកាន់ទីក្រុងឌូប៉ៃ។
លោក ហ៊ុន សែន ថ្លែងថា៖ «យន្តហោះ ១គ្រឿង ដែលដឹកបានជាង ៣០០នាក់ពីទីក្រុងភ្នំពេញទៅឌូប៉ៃ។ អាហ្នឹងតាមព័ត៌មានពីខាងនាវា។ យន្ត(យន្តហោះ)មួយគ្រឿងទៀត នឹងដឹកពីទីក្រុងភ្នំពេញទៅជប៉ុន ចេញពីហ្នឹង ហើយអាចមានយន្ត(យន្តហោះ)មួយគ្រឿងទៀត ចេញពីក្រុងព្រះសីហនុ ទៅរដ្ឋធានីប្រទេសណាមួយនៅក្នុងតំបន់របស់យើងនេះ»។
នាវា MS Westerdam ត្រូវបានអនុញ្ញាតឱ្យចូលសំចតនៅកំពង់ផែព្រះសីហនុកាលពីថ្ងៃទី១៣ ខែកុម្ភៈសប្ដាហ៍មុន បន្ទាប់ពីនាវាកម្សាន្តមួយនេះចំណាយពេល ២សប្ដាហ៍នៅលើលំហសមុទ្រ ដោយប្រទេស និងដែនដីកោះចំនួន ៥ មិនអនុញ្ញាតឱ្យចូលសំចតនោះឡើយ៕
លោក ហ៊ុន សែន បញ្ជាក់ជាថ្មីថា ប្រសិនបើកម្ពុជាមិនអនុញ្ញាតឱ្យនាវា MS Westerdam ចូលសំចតទេ វានឹងក្លាយទៅជាវិបត្តិមនុស្សធម៌ក្នុងសកលលោក។
លោកនាយករដ្ឋមន្ត្រី ហ៊ុន សែន បានអនុញ្ញាតឱ្យនាវា MS Westerdam បានចូលចតនៅកំពង់ផែស្វយ័តខេត្តព្រះសីហនុ កាលពីថ្ងៃទី១៣ ខែកុម្ភៈ។
នាវាទេសចរណ៍អាមេរិកឈ្មោះ MS Westerdam មានផ្ទុកអ្នកដំណើរ និងបុគ្គលិកបម្រើការលើនាវាចំនួន ២២៥៧នាក់ មកពី ៤១ជាតិសាសន៍ បានចេញដំណើរពីទីក្រុងហុងកុងកាលពីថ្ងៃទី០១ ខែកុម្ភៈ៕
