តំណាងប្រជាពលរដ្ឋ១៩៧គ្រួសារ ដែលអះអាងថា កំពុងមានជម្លោះដីធ្លីជាមួយក្រុមហ៊ុន ហេង ហ៊ុយ នៅស្រុកស្រែអំបិល ខេត្តកោះកុង ព្រមានដើរតវ៉ាដីធ្លីតាមស្ថាប័នរដ្ឋផ្សេងៗនៅរាជធានីភ្នំពេញ ក្រោយក្រសួងរៀបចំដែនដី នគរូបនីយកម្ម និងសំណង់ បដិសេធមិនទទួលដោះស្រាយវិវាទដីធ្លីរបស់ពួកគេ។
កាលពីថ្ងៃទី១៧ ខែកុម្ភៈ ក្រសួងរៀបចំដែនដីបានប្រកាសជាថ្មី មិនទទួលដោះស្រាយវិវាទដីធ្លីជូនក្រុមពលរដ្ឋ១៩៧គ្រួសារនៅភូមិតានី ឃុំជីខលើនោះទេ និងបានស្នើទៅអាជ្ញាធរខេត្តកោះកុងចាត់វិធានការផ្លូវច្បាប់ចំពោះបុគ្គលណា ដែលក្រសួងថាបានបំផុសឱ្យពលរដ្ឋតវ៉ាផងដែរ។ ក្រសួងបញ្ជាក់ថា ការមិនទទួលដោះស្រាយនោះ ដោយសារ ការទាមទាររបស់ពលរដ្ឋទាំងនោះមិនមានមូលដ្ឋានច្បាប់ត្រឹមត្រូវ។
អ្នកស្រី ដេត ហួរ ដែលអះអាងថា ជាតំណាងពលរដ្ឋ១៩៧គ្រួសារ បានបង្ហាញការខកចិត្តចំពោះក្រសួងរៀបចំដែនដីដែលមិនទទួលដោះស្រាយវិវាទដីធ្លីជូនពួកគាត់។
តំណាងពលរដ្ឋរូបនេះព្រមានថា ពួកគាត់នឹងនាំគ្នាឡើងមកតវ៉ាមុខក្រសួងរៀបចំដែនដី និងស្ថាប័នរដ្ឋផ្សេងៗទៀតនៅភ្នំពេញ ដើម្បីជំរុញឱ្យមានដំណោះស្រាយដីធ្លីជូនពួកគាត់។
អ្នកស្រី ដេត ហួរ មានប្រសាសន៍ថា៖ «រយៈពេល១០ជាងឆ្នាំហើយ ពលរដ្ឋគាត់ឈឺចាប់ណាស់។ អីចឹងគាត់លែងខ្លាចងាប់ហើយ ព្រោះឥលូវវាកាន់តែពិបាកៗទៅ ខ្លះទៀតគ្នាបានចំណាកស្រុក ខ្លះទៀតរងទុក្ខវេទនាបែកបាក់ក្រុមគ្រួសារ បែកបាក់ប្តីប្រពន្ធដោយសារតែរឿងអត់ដីហ្នឹង។ អីចឹងពួកគាត់ហើយ។ ហើយពួកយើងនឹងឡើងទៅតវ៉ាដល់ភ្នំពេញរហូតមានដំណោះស្រាយ»។
អ្នកស្រី អ៊ិត តឹង ដែលអះអាងថា ជាតំណាងពលរដ្ឋដែរ និយាយថា កន្លងមកដែលក្រុមអ្នកភូមិឡើងមកតវ៉ាដីធ្លីដល់ភ្នំពេញនោះ គឺពុំមានអ្នកណាញុះញង់ ឬបំផុសឱ្យមកតវ៉ាឡើយ។ អ្នកស្រីថា គឺអ្នកភូមិត្រូវបានក្រុមហ៊ុន ហេង ហ៊ុយ រំលោភយកដីធ្លីរបស់ពួកគាត់ពិតមែន តាំងពីឆ្នាំ២០០៧។
តំណាងពលរដ្ឋរូបនេះបន្តថា រឿងក្រសួងរៀបចំដែនដីប្រកាសឱ្យពលរដ្ឋមានជម្លោះដីធ្លីនៅកោះកុងមកធ្វើបែបបទ ដើម្បីទាមទារដីធ្លីរយៈពេល១ខែចាប់ពីខែកញ្ញា ដល់ខែតុលា ឆ្នាំ២០១៧នោះ គឺពួកគាត់មិនបានដឹងព័ត៌មាននោះទេ ដោយថា អាជ្ញាធរមូលដ្ឋានមិនបានជូនដំណឹងដល់ពួកគាត់ឡើយ។
អ្នកស្រី លើកឡើងថា៖ «សុំឱ្យក្រសួងចុះមកស្រាវជ្រាវខ្លួនឯងមក តើមុខអ្នកណាដែលញុះញង់ឱ្យពលរដ្ឋតវ៉ា។ មិនបាច់ចេញសេចក្តីប្រកាសព័ត៌មានគំរាមពលរដ្ឋឱ្យភ័យខ្លាចទេ គឺពួកយើងមិនភ័យខ្លាចជាដាច់ខាត ព្រោះពួកយើងបាត់បង់ដីដោយសារក្រុមហ៊ុន ហេង ហ៊ុយ រំលោភយកពិតប្រាកដមែន គឺគ្មានអ្នកណាញុះញង់ឱ្យពលរដ្ឋមកតវ៉ាទេ។ ពួកគាត់តវ៉ាខ្លួនឯង»។
អភិបាលរងខេត្តកោះកុង លោក សុខ សុទ្ធី ប្រាប់វីអូឌីយ៉ាងខ្លីថា អាជ្ញាធរខេត្តនឹងអនុវត្តតាមសេចក្តីប្រកាសរបស់ក្រសួងរៀបចំដែនដី ដោយថា នឹងស្រាវជ្រាវរកមុខសញ្ញាអ្នកដែលញុះញង់ឱ្យពលរដ្ឋតវ៉ាដីធ្លីដើម្បីចាត់វិធានការផ្លូវច្បាប់។
លោក សុខ សុទ្ធី ថា៖ «យើងនឹងស្រាវជ្រាវហើយករណី ព្រោះវាជាការណែនាំរបស់ក្រសួង»។
មន្ត្រីឃ្លាំមើលការរំលោភសិទ្ធិមនុស្សនៅអង្គការលីកាដូប្រចាំខេត្តកោះកុង លោក ប៉ែន វុទ្ធា ស្នើទៅក្រសួងរៀបចំដែនដីឱ្យពិចារណា និងស្រាវជ្រាវឡើងវិញចំពោះការចេញសេចក្តីប្រកាសព័ត៌មានមិនទទួលដោះស្រាយវិវាទដីធ្លីជូនពលរដ្ឋ១៩៧គ្រួសារនោះ។
មន្ត្រីឃ្លាំមើលការរំលោភសិទ្ធិមនុស្សរូបនេះបន្តថា ពាក់ព័ន្ធការដោះស្រាយវិវាទដីធ្លីរវាងប្រជាពលរដ្ឋ និងក្រុមហ៊ុន ហេង ហ៊ុយ ពេលកន្លងមក គឺអាជ្ញាធរមូលដ្ឋានមិនបានផ្សព្វផ្សាយច្បាស់លាស់នោះទេ ដែលជាហេតុធ្វើឱ្យពលរដ្ឋមួយចំនួនមិនបានដាក់សំណើតវ៉ានោះ។
លោក ប៉ែន វុទ្ធា និយាយថា៖ «អីចឹងហើយក្រសួងគួរតែពិនិត្យឡើងវិញថា រឿងនេះវាយ៉ាងម៉េច។ ហើយដំណើរនីតិវិធីនៃការដោះស្រាយដីធ្លីកន្លងមកជាមួយឧកញ៉ា ហេង ហ៊ុយ តើមានតម្លាភាព ឬភាពអាចទទួលយកបានពីប្រជាពលរដ្ឋទេ ដោយមិនមានការបង្ខិតបង្ខំទេ ឬវាយ៉ាងម៉េច។ បើក្រសួងនៅតែបន្តបដិសេធ នឹងធ្វើឱ្យប្រជាពលរដ្ឋបន្តរងគ្រោះ និងប៉ះពាល់ដល់ជីវភាពពួកគាត់»។
តំណាងពលរដ្ឋអ្នកស្រី ដេត ហួរ ឱ្យដឹងថា នៅថ្ងៃទី២៨ ខែកុម្ភៈខាងមុខនេះ អ្នកភូមិ១៩៧គ្រួសារនឹងទៅតវ៉ាមុខសាលាខេត្តកោះកុងជាថ្មីទៀត ដើម្បីទាមទារឱ្យថ្នាក់ដឹកនាំខេត្តពន្លឿនដោះស្រាយដីធ្លី ហើយថា ប្រសិនបើមិនទទួលដំណោះស្រាយទេ ពួកគាត់នឹងឡើងមកតវ៉ាតាមស្ថាប័នរដ្ឋនៅរាជធានីភ្នំពេញបន្តទៀត។
បច្ចុប្បន្ននេះ ពលរដ្ឋ១០នាក់ក្នុងចំណោមពលរដ្ឋទាំង ១៩៧គ្រួសារនោះ ត្រូវបានតុលាការខេត្តកោះកុង កោះហៅឱ្យចូលបំភ្លឺជាបន្តបន្ទាប់ទៅតាមបណ្តឹងរបស់ប្រធានក្រុមហ៊ុន ហេង ហ៊ុយ ដោយចោទប្រកាន់ពីបទបរិហារកេរ្តិ៍ជាសាធារណៈ៕
