អគ្គស្នងការរងនគរបាលជាតិកម្ពុជា កើនឡើងដល់១៦រូប បន្ទាប់ពីរាជរដ្ឋាភិបាលកម្ពុជាបានចេញអនុក្រឹត្យតែងតាំងនាយនគរបាលចំនួន៣រូបបន្ថែមទៀត ឱ្យកាន់តំណែងនេះកាលពីថ្ងៃទី១៤ ខែកុម្ភៈ។
អនុក្រឹត្យស្ដីពីការតែងតាំងមុខតំណែងមន្ត្រីនគរបាលជាតិកម្ពុជា ចុះហត្ថលេខាដោយលោកនាយករដ្ឋមន្ត្រី ហ៊ុន សែន កាលថ្ងៃទី១៤ ខែកុម្ភៈ សម្រេចតែងតាំងនាយនគរបាលចំនួន៧រូប ក្នុងនោះ ៣រូបជាអគ្គស្នងការរងនគរបាលជាតិ និង៤រូបជាប្រធាននាយកដ្ឋានចំនួន៤ក្រោមចំណុះក្រសួងមហាផ្ទៃ។ នាយនគរបាលទាំងបីរូបដែលត្រូវតែងតាំងជាអគ្គស្នងការរងនគរបាលជាតិថ្មី រួមមាន លោក មួង សុធា លោក អ៊ី សុខឃី និង លោក ឡោ សុខឡេង។
អគ្គស្នងការរង និងជាអ្នកនាំពាក្យនគរបាលជាតិ លោក ឆាយ គឹមឃឿន ប្រាប់ថា បច្ចុប្បន្នមាននាយនគរបាលកាន់តំណែងជាអគ្គស្នងការរងនគរបាលជាតិមានចំនួន១៦រូប នៅត្រឹមតែកុម្ភៈ ឆ្នាំ២០២០នេះ។
លោក ឆាយ គឹមឃឿន ថ្លែងប្រាប់វីអូឌីតាមសារអេឡិចត្រូនិចថា ការតែងតាំងនាយនគរបាលចំនួនបីរូបជាអគ្គស្នងការរងនគរបាលនៅខែកុម្ភៈ គឺធ្វើឡើងដើម្បីជំនួសតំណែងអគ្គស្នងការរងមុនៗដែលត្រូវរាជរដ្ឋាភិបាលដាក់ឱ្យចូលនិវត្តន៍។
លោកបញ្ជាក់៖ «ការតែងតាំងនេះ គឺពង្រឹងយន្តការគ្រប់គ្រង ដឹកនាំកម្លាំង និងការងារជំនាញ ដើម្បីរក្សាសន្តិសុខជាតិ។ កន្លងមក មានការបែងចែកភារកិច្ចទទួលខុសត្រូវតាមជំនាញច្បាស់លាស់ជូនអគ្គស្នងការរងទាំងអស់»។
ចំនួនអ្នកកាន់តំណែងជាអគ្គស្នងការរងនគរបាលជាតិកម្ពុជា គឺស្មើនឹងបីដងនៃចំនួនអគ្គស្នងការរងនគរបាលជាតិនៅប្រទេសថៃ។ គេហទំព័រប៉ូលីសជាតិថៃបង្ហាញថា នគរបាលជាតិថៃមាននាយឧត្តមសេនីយ១រូបជាមេដឹកនាំ មាននាយរងប៉ូលីសចំនួន៥រូបជាសហការី និងមានទីប្រឹក្សាជាន់ខ្ពស់៣រូបទៀតជាអ្នកផ្តល់យោបល់។
អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា មានប្រសាសន៍ថា រាជរដ្ឋាភិបាល ក្រសួងមហាផ្ទៃ ឬអគ្គស្នងការនគរបាលជាតិ មានសិទ្ធិពេញលេញក្នុងការតម្លើងឋានៈ ឬតួនាទីមន្ត្រីនគរបាលទាំងអស់ ប៉ុន្តែ ប្រពលរដ្ឋក៏មានតួនាទីតាមដាន និងឃ្លាំមើលការតែងតាំងទាំងនេះដែរ។
លោក ស៊ឹង សែនករុណ៖ «បើសិនតែងតាំងហើយធ្វើអោយមានស្ថានភាព សន្តិសុខល្អប្រសើរ នោះជារឿងគួរឱ្យកោតសរសើរ ប៉ុន្តែ បើគ្រាន់តែតាំងមកដើម្បីបានតួនាទីចែកគ្នាកាន់នៅក្នុងមុខតំណែងហើយអ្វីៗទាំងអស់ហ្នឹងសន្តិសុខ សុវត្ថិភាពពលរដ្ឋការគោរពច្បាប់ មិនមានភាពល្អប្រសើរនោះ ចៀសមិនផុតពីការរិះគន់ទេ»។
កាលពីឆ្នាំ២០១៨ អគ្គស្នងការនគរបាលជាតិ លោក នេត សាវឿន បានចេញសេចក្ដីសម្រេចផ្លូវការមួយដើម្បីបែងចែកការងារឱ្យអគ្គស្នងការរងទទួលបន្ទុក ដោយលោកបញ្ជាក់ក្នុងសេចក្តីសម្រេចនោះថា ការបែងចែកនេះធ្វើឡើងដើម្បីឱ្យការងារមានប្រសិទ្ធិភាព។ អ្នកកាន់តំណែងជាអគ្គស្នងការរងនគរបាលជាតិមានឋានន្តរសក្តិចាប់ពីឧត្តមសេនីយឯកឡើងទៅ៕
