ព្រះមហាក្សត្របានត្រាស់បង្គាប់តែងតាំងរចនាសម្ព័ន្ធថ្នាក់ដឹកនាំសាលាឧទ្ធរណ៍តំបន់ចំនួន៣ ដោយថា ដើម្បីជួយផ្តល់សេវាយុត្តិធម៌ជូនប្រជាពលរដ្ឋឱ្យកាន់តែមានប្រសិទ្ធភាពខ្ពស់។
ព្រះរាជក្រឹត្យ២ដាច់ដោយឡែករបស់ព្រះមហាក្សត្រនរោត្តម សីហមុនី ចេញផ្សាយនៅថ្ងៃសុក្រ ទី២១ ខែកុម្ភៈនេះ បានត្រាស់បង្គាប់តែងតាំងប្រធាន អនុប្រធាន និងតំណាងអយ្យការសាលាឧទ្ធរណ៍តំបន់ ចំនួន១៧រូប ដើម្បីជួយផ្តល់សេវាយុត្តិធម៌ជូនប្រជាពលរដ្ឋឱ្យកាន់តែមានប្រសិទ្ធភាពខ្ពស់។
តាមព្រះរាជក្រឹត្យទាំងពីរនេះ ប្រធានសាលាឧទ្ធរណ៍តំបន់ប្រចាំតំបន់ត្បូងឃ្មុំ គឺឈ្មោះ ម៉ុង មុនីចរិយា និងអគ្គព្រះរាជអាជ្ញា ឈ្មោះ ហួត វុទ្ធី។ ប្រធានសាលាឧទ្ធរណ៍តំបន់បាត់ដំបង គឺលោក សម ប៊ុនថុន និងអគ្គព្រះរាជអាជ្ញា រៀម ចន្ទម្នី។ ចំណែកប្រធានសាលាឧទ្ធរណ៍ប្រចាំតំបន់ព្រះសីហនុ មិនទាន់តែងតាំងនៅឡើយ ប៉ុន្តែបានតែងតាំងតែអនុប្រធានប៉ុណ្ណោះ គឺឈ្មោះ ប៉ាក ច័ន្ទសំបូរ និងតំណាងអយ្យការ ឈ្មោះ ខៀវ ផល្លា និងឈ្មោះ ផាន់ សុភ័ក្ត្រ។
អ្នកនាំពាក្យក្រសួងយុត្តិធម៌ លោក ជិន ម៉ាលីន មានប្រសាសន៍ថា ការតែងតាំងប្រធានសាលាឧទ្ធរណ៍តំបន់ប្រចាំខេត្តព្រះសីហនុ និងចេញជាលទ្ធផលនៅពេលឆាប់ៗខាងមុខនេះ ដោយសារសាលាឧទ្ធរណ៍តំបន់នោះ នឹងបើកឱ្យដំណើរការនៅថ្ងៃទី១ ខែមេសា។
អ្នកនាំពាក្យរូបនោះ បានឱ្យដឹងទៀតថា ដើមចមដែលនាំឱ្យបង្កើតសាលាឧទ្ធរណ៍តំបន់ត្បូងឃ្មុំ បាត់ដំបង និងព្រះសីហនុ ដើម្បីងាយស្រួលផ្តល់សេវាជូនប្រជាពលរដ្ឋនៅតំបន់នោះ ឱ្យកាន់តែប្រសើរ និងចំណេញពេលវេលា។
លោកមានប្រសាសន៍ថា៖ «អត្ថប្រយោជន៍នៃការបង្កើតឧទ្ធរណ៍តំបន់ ដើម្បីបង្ខិតសេវាយុត្តិធម៌ទៅជិតប្រជាពលរដ្ឋ ដើម្បីផ្តល់ភាពងាយស្រួលសម្រាប់ប្រជាពលរដ្ឋ ដោយគាត់មិនចាំបាច់ឡើងមករាជធានីភ្នំពេញដូចមុនទេ។ នៅពេលប្តឹងឧទ្ធរណ៍ គឺគាត់អាចប្រើប្រាស់ឧទ្ធរណ៍តំបន់ ហើយកៀកនៅកន្លែងគាត់តែម្តង។ អត្ថប្រយោជន៍មួយទៀត គឺដើម្បីដោះស្រាយនូវភាពកកស្ទះនូវសំណុំរឿង អញ្ចឹងសំណុំរឿងនេះនឹងត្រូវបានដោះស្រាយកាន់តែលឿនជាងមុន»។
ប្រធានគ្រប់គ្រងផ្នែកអង្កេតនៅអង្គការលីកាដូ លោក អំ សំអាត បង្ហាញការងឿងឆ្ងល់ជុំវិញការតែងតាំងប្រធានសាលាឧទ្ធរណ៍តំបន់ ដោយថា ក្រសួងយុត្តិធម៌គួរតែស្នើទៅព្រះមហាក្សត្រតែងតាំងសរុបតែម្តងជាការប្រសើរ ដើម្បីកុំឱ្យបង្កការលំបាកច្រើនដល់ព្រះមហាក្សត្រចេញព្រះរាជក្រឹត្យត្រាស់បង្គាប់តែងតាំងម្តងជាពីរដង។
ទោះជាបែបនេះក្តី អ្នកឃ្លាំមើលសិទ្ធិមនុស្សរូបនេះ ផ្តល់ជាអនុសាសន៍ថា ថ្នាក់ដឹកនាំសាលាឧទ្ធរណ៍តំបន់ទាំងនោះ ត្រូវធ្វើការឈរលើគោលការណ៍អព្យាក្រឹត្យ ដើម្បីកុំឱ្យរងការរិះគន់ពីសាធារណជនទាក់ទងនឹងវិស័យយុត្តិធម៌នៅកម្ពុជា។
លោកមានប្រសាសន៍ថា៖ «បើសិនជាយើងមិនបានកំណែទម្រង់ឱ្យទៅជាប្រព័ន្ធតុលាការឯករាជ្យ ឱ្យមានជំនឿទុកចិត្តពីប្រជាពលរដ្ឋទេ ខ្ញុំគិតថា ការបង្កើតនៅតាមតំបន់នេះ នាំឱ្យមានការរិះគន់ គ្រាន់តែការបង្កើតដើម្បីរំលែកអំណាចបន្ថែម សំរាប់ឱ្យមានតួនាទី ហើយអាចចំណាយថវិកាជាតិច្រើន។ ប៉ុន្តែ យើងនៅតែសង្ឃឹមថា ការកំណែទម្រង់នេះ វាអាចធ្វើឱ្យមានប្រសិទ្ធភាព ហើយវាអាចធ្វើឱ្យមានជំនឿទុកចិត្តពីប្រជាពលរដ្ឋ បើមិនអញ្ចឹងទេ វាកាន់តែធ្វើឱ្យមានការរិះគន់កាន់តែធ្ងន់ធ្ងរ»។
សាលាឧទ្ធរណ៍ត្បូងឃុំ ទទួលដោះស្រាយបណ្តឹងពីសាលាដំបូងចំនួន១០ មានខេត្តត្បូងឃ្មុំ កំពង់ចាម កំពង់ធំ ព្រះវិហារ ខេត្តក្រចេះ ស្ទឹងត្រែង រតនគិរី មណ្ឌលគិរី ព្រៃវែង និងខេត្តស្វាយរៀង។
សាលាឧទ្ធរណ៍បាត់ដំបង នឹងទទួលដោះស្រាយបណ្តឹងពីសាលាដំបូងចំនួន ៧ មានខេត្តបាត់ដំបង កំពង់ឆ្នាំង ពោធិ៍សាត់ ប៉ៃលិន បន្ទាយមានជ័យ ឧត្តរមានជ័យ និងខេត្តសៀមរាប ។
សាលាឧទ្ធរណ៍តំបន់នៅខេត្តព្រះសីហនុ នឹងទទួលដោះស្រាយបណ្តឹងពីសាលាដំបូងចំនួន៥ ដែលមកពីខេត្តតាកែវ កំពត កំពង់ស្ពឺ កោះកុង និងខេត្តព្រះសីហនុ។
អង្គការគម្រោងយុត្តិធម៌ពិភពលោក (World Justice Project) កាលពីខែកុម្ភៈ បានចេញផ្សាយរបាយការណ៍ស្ដីពី «សន្ទស្សន៍នីតិរដ្ឋសម្រាប់ឆ្នាំ២០១៩» បន្តចាត់ថ្នាក់កម្ពុជា ជាប្រទេសមានប្រព័ន្ធយុត្តិធម៌ទន់ខ្សោយបំផុត ក្នុងចំណោមប្រទេស១២៦ ដែលកម្ពុជាជាប់លេខ ១២៥ លើតែប្រទេសវេណេស៊ុយអេឡាមួយប៉ុណ្ណោះ។
របាយការណ៍នេះ បានវាយតម្លៃបែបនេះដោយផ្អែកលើសូចនាករ ឬកត្តាវាស់វែងមួយចំនួន ដូចជា ការទប់អំណាចរបស់រដ្ឋាភិបាល អំពើពុករលួយ តម្លាភាពរបស់រដ្ឋាភិបាល សិទ្ធិសេរីភាពមូលដ្ឋាន ការអនុវត្តច្បាប់ យុត្តិធម៌សង្គម និងយុត្តិធម៌ផ្នែកព្រហ្មទណ្ឌ៕