ប្រមុខរដ្ឋាភិបាល លោក ហ៊ុន សែន កាលពីម្សិលមិញ បានទម្លាយឱ្យដឹងពីការរត់ការដណ្ដើមគ្នាកាន់តំណែងក្នុងជួររាជការនៅខេត្តកណ្ដាល ។
ក្នុងពិធីបិទសន្និបាតប្រចាំឆ្នាំក្រសួងមហាផ្ទៃ លោក ហ៊ុន សែន លើកឡើកថា បន្ទាប់ពីមានសំណើជាច្រើនពីមនុស្សជុំវិញខ្លួនលោក ដើម្បីដាក់គ្នីគ្នាឱ្យចូលកាន់តំណែងជំនួសអតីតអភិបាលខេត្តកណ្ដាល លោក ម៉ៅ ភិរុណ ដែលត្រូវចូលនិវត្តន៍។ លោកថា មន្ត្រីជាន់ខ្ពស់មួយចំនួនព្រួតគ្នាចង់បានតំណែងអភិបាលខេត្តកណ្ដាល ប៉ុន្តែ ត្រូវលោកបដិសេធ ដោយជ្រើសយកអភិបាលរងខេត្តកណ្ដាលម្នាក់ឱ្យកាន់តំណែងនេះវិញ។
លោក ហ៊ុន សែន មានប្រសាសន៍ថា៖ «គ្រាន់តែខេត្តកណ្ដាលមួយនេះ មិនដឹងជាប៉ុន្មានទេ? [សំណើតែងតាំង] តែខ្ញុំសុំសម្រេចដោយឆន្ទានុសិទ្ធិរបស់ខ្ញុំ ដំបូងខ្ញុំមើលនេះៗ? [សំណើតែងតាំង] ខ្ញុំហៅទូរសព្ទមក ខេង [ស ខេង] ថាឥលូវយកអាភ័ណ្ឌ [គង់ សុភ័ណ្ឌ] ទៅ អាហ្នឹងវាឆ្លងកាត់អភិបាលរងស្រុក អភិបាល ស្រុកមកនៅកន្លែងហ្នឹង ឱ្យវាឡើងទៅ។»
លោក គង់ សោភ័ណ្ឌ ត្រូវបានព្រះមហាក្សត្រត្រាស់បង្គាប់តែងតាំងជាអភិបាលខេត្តកណ្ដាលកាលថ្ងៃទី១៧ ខែកុម្ភៈ ឆ្នាំ២០២០។ លោក គង់ សោភ័ណ្ឌ ធ្លាប់ធ្វើជាអភិបាលស្រុកខ្សាច់កណ្តាល និងអភិបាលស្រុកល្វាឯម ខេត្តកណ្ដាល ។
លោក ហ៊ុន សែន មានប្រសាសន៍ថា បន្ទាប់ពីលោក គង់ សុភ័ណ្ឌ ឡើងពីអភិបាលរងខេត្តកណ្ដាលមកកាន់តំណែងអភិបាលខេត្ត ស្រាប់តែមានមនុស្សប្រជ្រៀតគ្នាចង់បានតំណែងអភិបាលរងខេត្ត។ លុះពេលលឺថា លោកយកអភិបាលស្រុកម្នាក់ទៅធ្វើអភិបាលរងខេត្តជំនួសលោក គង់ សុភ័ណ្ឌ ក៏មានមនុស្សជាច្រើន ចង់ជួយបក្សពួកឱ្យបានតំណែងអភិបាលស្រុកទៅទៀត ។
លោក ហ៊ុន សែន បន្តថា៖ «តំណែងអភិបាលរងមានបញ្ហាទៀត ឯងមិនទាន់តែងតាំងអភិបាលខេត្តផង ស្រាប់ធ្លាយដល់អភិបាលរងខេត្តទៀត។ ដល់ពេលលឺថាអភិបាលស្រុក ស្រាប់តែទៅដល់អភិបាលស្រុកទៀតហើយ»។
ការដាក់សំណើរត់ការតែងតាំងសែស្រឡាយ ឱ្យកាន់ការក្នុងតំណែងសំខាន់ៗនៅតាមបណ្ដាខេត្តនោះ ក៏ធ្លាប់ត្រូវបានលោក ហ៊ុន សែន ប្រកាសជាចំហរម្ដងជា២ដងរួចមកហើយដែរ។
កាលពីខែតុលា ឆ្នាំ២០១៨ លោកនាយករដ្ឋមន្ត្រី ហ៊ុន សែន ប្រកាសលុបគម្រោងបង្កើតខេត្តថ្មី ចំនួន២ ដោយសារតែកូនចៅក្រោមបង្គាប់របស់លោក ដណ្ដើមគ្នាកាន់តំណែងសំខាន់ៗក្នុងខេត្តថ្មីទាំងនេះ ។
លោកថ្លែងកាលនោះយ៉ាងដូច្នេះថា៖ «ប្រញាប់ងាប់ទៅណា? សួរថា ប្រញាប់ងាប់ទៅណា? ឯងមិនទាន់ទាំងធ្វើអ្វីផង មិនទាន់ទាំងសម្រេចបង្កើត ឬមិនបង្កើតផង វាចែកគ្នាធ្វើចៅហ្វាយខេត្ត ធ្វើអនុខេត្តទៅហើយ ខ្ញុំដាក់វិញថា ប្រញាប់ងាប់ទៅណា? ឥឡូវឈប់នៅឱ្យស្ងៀមបានហើយ មហាផ្ទៃបិទកុំព្យូទ័រចោលឱ្យអស់ថ្ងៃនេះ កុំធ្វើអ្វីបន្តទៅទៀត ខ្ញុំគ្មានពេលស៊ីញ៉េ គ្មានពេលអីទៀតទេ»។
កាលពីឆ្នាំ២០១៧ ក៏មានរឿងរ៉ាវចម្រូងចម្រាសម្ដងដែរពីរឿងតែងតាំងអគ្គនាយកទូរទស្សន៍ជាតិកម្ពុជា។កាលណោះ រដ្ឋមន្ត្រីក្រសួងព័ត៌មាន លោក ខៀវ កាញារីទ្ធ ស្នើទៅនាយករដ្ឋមន្ត្រីតែងតាំងលោក ខ្វៃ អាទិត្យា ជាអគ្គនាយកទទក ប៉ុន្តែ ត្រូវលោក ហ៊ុន សែន សម្រេចដាក់លោក ឃឹម វុឌ្ឍី ជំនួសវិញ។ លោក ខៀវ កាញារីទ្ធ កាលនោះបានបង្ហោះសារលើទំព័រហ្វេសប៊ុករបស់លោកថា ការតែងតាំងអគ្គនាយកទទក អត់មានអ្នកណាពិគ្រោះជាមួយលោកនោះទេ។ លោកនាយករដ្ឋមន្ត្រី ហ៊ុន សែន បានស្ដីបន្ទោសរដ្ឋមន្ត្រីក្រសួងព័ត៌មានខ្លាំងៗ ដោយលោកមានប្រសាសន៍ថា លោកមានសិទ្ធិគ្រប់យ៉ាងក្នុងការតែងតាំងមុខតំណែងនេះ និងបានស្តីបន្ទោសលោក ខៀវ កាញារីទ្ធ ដែលមិនលើកទូរសព្ទរបស់លោក។
លុះក្រោយមក រឿងនេះស្ងាត់ទៅវិញ ដោយលោក អាទិត្យា ត្រូវបានគណបក្សប្រជាជនកម្ពុជាសម្រេចឱ្យកាន់តំណែងជាអគ្គនាយកទូរទស្សន៍អប្សរា ដែលជាប៉ុស្តិ៍របស់បក្សកាន់អំណាច ។
អ្នកវិភាគបញ្ហាសង្គម និងនយោបាយ លោកបណ្ឌិត មាស នី មានប្រសាសន៍ថា វប្បធម៌រត់ការសុំតំណែងដូចនៅខេត្តកណ្ដាលដែលលោក ហ៊ុន សែន លើកឡើងនេះ អាចនឹងមានស្ទើរទូទាំងប្រទេសកម្ពុជាតែម្តង។ លោកថា ការរត់ការដើម្បីទទួលបានតំណែង ឬយកសាច់ញាតិកាន់តំណែងក្នុងជួររាជការ ជាការប្រព្រឹត្តិអំពើពុករលួយដែលត្រូវលុបបំបាត់។
លោកបណ្ឌិត មាស នី ៖ «ទោះបីជាមិននិយាយចំក៏ដោយ ការរត់ការហ្នឹងគឺមានពុករលួយនៅហ្នឹង យើងនិយាយត្រង់ទៅត្រង់មកហ្នឹង។ បើនៅកន្លែងមួយ ប្រាក់ខែ១លាន ឬ១លានរៀលកន្លះ ក្នុង១ខែ ខណៈអ្នកដែលត្រូវតែងតាំងបានបង់១០ម៉ឺនដុល្លារពេលបានកាន់តំណែងនោះ គេនឹងបូមយកលុយនោះមកវិញ»។
បច្ចុប្បន្ន គណបក្សប្រជាជនកម្ពុជាក្ដោបអំណាចរដ្ឋពេញដៃតាំងពីថ្នាក់ជាតិ រហូតដល់ភូមិ ចាប់តាំងពីរំលាយគណបក្សសង្គ្រោះជាតិរួចមក។ តំណែងក្រុមប្រឹក្សារាជធានី-ខេត្ត ខណ្ឌ-ស្រុក-ក្រុង ឃុំ-សង្កាត់ ដែលធ្លាប់តែមានសមាជិកក្រុមប្រឹក្សាពីបក្សប្រឆាំង ក៏ត្រូវបានបក្សកាន់អំណាចក្ដោបយកទាំងអស់ ។
ក្នុងពិធីនោះ លោក ហ៊ុន សែន ក៏បានស្នើឱ្យមន្រ្តីរបស់ខ្លួននៅថ្នាក់ជាតិ កុំដណ្តើមតំណែងជាមួយមន្រ្តីមូលដ្ឋានផងដែរ។
លោក ហ៊ុន សែន ថា៖ «យើងមកយកផ្កាយពាក់ឱ្យពេញៗស្មា ហើយបន្ទាប់ទៅចង់ទៅធ្វើអភិបាលខេត្ត អភិបាលរងខេត្ត។ មកថ្នាក់ជាតិ មកយកផ្កាយ យកតំណែងឧត្តមមន្ត្រី វរៈមន្ត្រី តែមកដណ្ដើមតំណែងនៅថ្នាក់មូលដ្ឋាន ខ្ញុំសូមអង្វរមន្ត្រីថ្នាក់ជាតិកុំដណ្ដើមតំណែងថ្នាក់មូលដ្ឋាន។»
