មន្ត្រីការិយាល័យរដ្ឋបាលខណ្ឌឬស្សីកែវ បានឱ្យដឹងថា យ៉ាងហោចណាស់ផ្ទះ ១៦ខ្នង និងបន្ទប់ជួលចំនួន ៧៩បន្ទប់ ត្រូវបានអគ្គិភ័យឆាបឆេះនៅព្រឹកថ្ងៃនេះ ប៉ុន្តែ មិនបណ្តាលឱ្យមានមនុស្សរងរបួស ឬស្លាប់នោះទេ។
អនុប្រធានការិយាល័យរដ្ឋបាលបុគ្គលិកខណ្ឌឬស្សីកែវ លោក អ៊ុត បូរិន ប្រាប់វីអូឌីថា បើតាមព័ត៌មានបឋម អគ្គិភ័យបានឆាប់ឆេះផ្ទះប្រជាពលរដ្ឋម្តុំផ្លូវរទេះភ្លើង ដែលជាតំបន់មិនរៀបរយ ស្ថិតនៅភូមិចុងខ្សាច់ សង្កាត់ទួលសង្កែ១ វេលាម៉ោង ៩:២០នាទីព្រឹក ហើយឡានទឹកបានពន្លត់ទាំងស្រុងនៅម៉ោង ១០:៣០នាទីព្រឹក។
អគ្គិភ័យនេះ បានឆាបឆេះផ្ទះប្រជាពលរដ្ឋចំនួន ១៦ខ្នង និងបន្ទប់ជួលចំនួន ៧៩បន្ទប់បន្ថែមទៀត រួមទាំងប៉ះពាល់ប្រជាពលរដ្ឋ ៩៥គ្រួសារ ប៉ុន្តែ លោកថា មិនមានអ្នករងរបួស ឬស្លាប់នោះទេ។
មន្ត្រីរូបនោះបញ្ជាក់ថា រហូតមកដល់រសៀលថ្ងៃដដែលនេះ មិនទាន់ដឹងពីដើមចមដែលនាំឱ្យឆាបឆេះនៅឡើយ ប៉ុន្តែ សមត្ថកិច្ចជំនាញ និងអាជ្ញាធរពាក់ព័ន្ធ កំពុងចុះស្រាវជ្រាវ និងធ្វើស្ថិតិពីចំនួនខូចខាតឱ្យបានច្បាស់លាស់ផងដែរ៕