ក្រសួងអប់រំបានច្រានចោលព័ត៌មានដែលត្រូវបានផ្សព្វផ្សាយថា មានមិនភាពប្រក្រតីពាក់ព័ន្ធនឹងរត់ការ ដើម្បីដំឡើងតួនាទី និងឋានន្តរសក្តិ និងកាំប្រាក់ ធ្វើឱ្យប៉ះពាល់កិត្តិយសធ្ងន់ធ្ងរលើស្ថាប័នអប់រំនៅកម្ពុជា។
ក្នុងសេចក្តីប្រកាសព័ត៌មានរបស់ខ្លួននៅថ្ងៃនេះ ក្រសួងអប់រំ យុវជន និងកីឡា បានច្រានចោលព័ត៌មានកាលពីពេលថ្មីៗនេះថា មានព័ត៌មានមិនប្រក្រតីពាក់ព័ន្ធនឹងរត់ការ ដើម្បីដំឡើងតួនាទី ឋានន្តរសក្តិ និងកាំប្រាក់ជាដើម។
ក្រសួងចាត់ទុកសកម្មភាពទាំងនេះថា ធ្វើឱ្យប៉ះពាល់ដល់សេចក្តីថ្លៃថ្នូរ និងក្រមសីលធម៌វិជ្ជាជីវៈបុគ្គលិកអប់រំ ព្រមទាំងកិត្តិយសស្ថាប័នអប់រំយ៉ាងធ្ងន់ធ្ងរផងដែរ។
សេចក្តីប្រកាសព័ត៌មានដដែល ក្រសួងអប់រំបញ្ជាក់ថា ការដំឡើងឋានៈ តួនាទីសម្រាប់មន្ត្រីគ្រប់គ្រងគ្រប់លំដាប់ថ្នាក់ តាមឋានានុក្រម ការផ្លាស់ប្តូរក្របខណ្ឌមន្ត្រីរាជការស៊ីវិល អាចធ្វើតាមការប្រឡងជ្រើសរើសរបស់ក្រសួងនីមួយៗ ដែលត្រូវបានកំណត់ដោយរដ្ឋាភិបាល និងអនុវត្តតាមច្បាប់ដែលនៅជាធរមាន តាមរយៈគណៈកម្មការវាយតម្លៃការងារបុគ្គលិក និងលក្ខណៈវិនិច្ឆ័យតាមច្បាប់ជាដើម។
ដោយឡែក ការផ្លាស់ប្តូរឋានន្តរសក្តិ និងថ្នាក់មន្ត្រីរាជការស៊ីវិល ក្រសួងអះអាងថា ត្រូវធ្វើតាមវេនជ្រើសរើស និងអតីតភាព ដែលមានរយៈពេលកំណត់អប្បបរមាសម្រាប់ការដំឡើងថ្នាក់ ០២ឆ្នាំ និងមានការស្នើសុំត្រឹមត្រូវតាមច្បាប់ និងឋានានុក្រមដែលសាម៉ីជននៅក្រោមបង្គាប់៕