ប្រធានវិទ្យុសំបុកឃ្មុំ បានឱ្យដឹងថា ក្រសួងព័ត៌មានបានអនុញ្ញាតឱ្យស្ថានីយ៍នេះជួលម៉ោងផ្សាយកម្មវិធីរបស់វិទ្យុសម្លេងសហរដ្ឋអាមេរិក (វីអូអេ) ឡើងវិញ ប៉ុន្តែ ត្រូវមានការស្នើសុំជាលាយលក្ខណ៍អក្សរស្របតាមលក្ខខណ្ឌច្បាប់។
ប្រធានវិទ្យុសំបុកឃ្មុំ លោក ម៉ម សូណង់ដូ បានប្រាប់វីអូឌីនៅថ្ងៃនេះថា រដ្ឋមន្ត្រីក្រសួងព័ត៌មាន លោក ខៀវ កាញារីទ្ធ បានប្រាប់លោកថា ឱ្យធ្វើលិខិតជាលាយលក្ខណ៍អក្សរ រួចផ្ញើទៅក្រសួង ដើម្បីស្នើសុំជួលម៉ោងផ្សាយកម្មវិធីរបស់វិទ្យុវីអូអេ នៅក្នុងវិទ្យុសំបុកឃ្មុំឡើងវិញ។
លោកមានប្រសាសន៍ថា៖ «ខ្ញុំមិនទាន់ឱ្យដំណឹងទៅវិទ្យុវីអូអេផង ហើយខ្ញុំនឹងផ្តល់ដំណឹងទៅឱ្យគេ [អ្នកគ្រប់គ្រងវិទ្យុវីអូអេ] ហើយទុកឱ្យគេដោះស្រាយទៅ ប៉ុន្តែ ជារឿងរបស់គេ។ ឥឡូវ ពីម្សិលមិញ ខ្ញុំបានភ្លើងខៀវហើយ ដូច្នេះខ្ញុំនឹងផ្សព្វផ្សាយ ពេលណាដែលវិទ្យុវីអូអេចង់ផ្សាយតាមរលកធាតុអាកាសវិទ្យុសំបុកឃ្មុំ»។
នាយកប្រតិបត្តិសម្ព័ន្ធអ្នកសារព័ត៌មានកម្ពុជា (ខេមបូចា) លោក ម៉ៃ ទិត្យថារ៉ា មានប្រសាសន៍ថា ការបើកភ្លើងខៀវរបស់ក្រសួងព័ត៌មាន អនុញ្ញាតឱ្យវិទ្យុ VOA ជួលម៉ោងផ្សាយនៅតាមវិទ្យុសំបុកឃ្មុំនោះ ជាសញ្ញាវិជ្ជមានមួយក្នុងការបើកលំហសេរីភាពសារព័ត៌មាន។ ប៉ុន្តែ លោកបញ្ជាក់ថា លំហសេរីភាពនេះស្ថិតនៅក្រោមលក្ខខណ្ឌរឹតត្បិតសេរីភាពដដែល។
លោកផ្តល់ជាអនុសាសន៍ថា ដើម្បីកុំឱ្យរងការរិះគន់រដ្ឋាភិបាលជុំវិញការរឹតត្បិតសេរីភាពសារព័ត៌មាន ក្រសួងត្រូវអនុញ្ញាតឱ្យវិទ្យុ និងកាសែតឯករាជ្យមួយចំនួនបានដំណើរការឡើងវិញ ដោយមិនដាក់ឱ្យស្ថិតនៅក្រោមលក្ខខណ្ឌអ្វីទាំងអស់។
លោកមានប្រសាសន៍ថា៖ «គួរតែមានការផ្តល់នូវលំហូរនៃសេរីភាពសារព័ត៌មានឡើងវិញ ដោយពុំបាច់ដាក់លក្ខខណ្ឌ ហើយមិនបាច់មានការរើសអើង គឺវិទ្យុដែលធ្លាប់ដំណើរការពីមុន អាចដំណើរការឡើងវិញទៅ។ ហើយស្ថាប័នព័ត៌មានមួយចំនួនដែលបានបិទទ្វារកន្លងមក អាចដំណើរការឡើងវិញទៅ ខ្ញុំគិតថា វាបង្ហាញថា រដ្ឋាភិបាលមានបំណងបើកលំហូរនៃសេរីភាពសារព័ត៌មាននៅប្រទេសកម្ពុជាយើងឡើងវិញ»។
ស្ថានីយ៍វិទ្យុក្នុងស្រុកជាច្រើន និងទូរទស្សន៍ជាង៣០ស្ថានីយ៍ ក្នុងនោះមានទូរទស្សន៍ជាតិកម្ពុជា (TVK) វិទ្យុស្ត្រីកម្ពុជា និងវិទ្យុសំបុកឃ្មុំជាដើម បានជួលម៉ោងផ្សាយ និងទទួលផ្សាយកម្មវិធីព័ត៌មានផលិតឡើងដោយវិទ្យុអាស៊ីសេរី និងវិទ្យុវីអូអេ នៅមុនការបង្ក្រាបរបស់រដ្ឋាភិបាលទៅលើប្រព័ន្ធផ្សព្វផ្សាយកាលពីខែវិច្ឆិកា ឆ្នាំ២០១៧កន្លងមក។
វិទ្យុអាស៊ីសេរី និងវិទ្យុសំឡេងសហរដ្ឋអាមេរិក បានសម្រេចបិទការិយាល័យរបស់ខ្លួននៅកម្ពុជា នៅឆ្នាំ២០១៧។ កាលណោះ ក្រសួងពាក់ព័ន្ធព្រមានចាត់វិធានការតាមផ្លូវច្បាប់ ក្រោយរកឃើញថា វិទ្យុទាំងពីរនេះបានបើកការិយាល័យរបស់ខ្លួនដោយគ្មានច្បាប់អនុញ្ញាត និងមិនបានបង់ពន្ធជូនរដ្ឋ។
ក្រោយពីវិទ្យុទាំងនោះប្រកាសបិទទ្វារបានប្រហែលជា១សប្តាហ៍ កាសែតឌឹ ខេមបូឌា ដេលី (The Cambodia Daily) ដែលចេញផ្សាយប្រចាំថ្ងៃជាភាសាអង់គ្លេសនោះ បានសម្រេចបញ្ឈប់ការចេញផ្សាយរបស់ខ្លួនផងដែរជុំវិញបញ្ហាពន្ធ ៦.៣លានដុល្លារ ដែលរដ្ឋាភិបាលកម្ពុជាអះអាងថា កាសែតមួយនេះមិនបានបង់ពន្ធក្នុងរយៈពេល ១០ឆ្នាំចុងក្រោយ។
ទោះយ៉ាងណាក៏ដោយ កាលពីថ្ងៃទី៥ ខែមិថុនា ឆ្នាំ២០១៩ ក្រសួងព័ត៌មាន បានចេញសេចក្តីប្រកាសព័ត៌មាន មួយដោយអនុញ្ញាតឱ្យវិទ្យុសំឡេងសហរដ្ឋអាមេរិក បានដំណើរការឡើងវិញ ប៉ុន្តែ បានដាក់លក្ខខណ្ឌឱ្យគោរពតាមរដ្ឋធម្មនុញ្ញ ច្បាប់ស្តីពីរបបសារព័ត៌មាន ក្រមសីលធម៌អ្នកសារព័ត៌មាន បទបញ្ជា កិច្ចសន្យា និងសេចក្តីណែនាំពាក់ព័ន្ធវិស័យព័ត៌មាន និងសោតទស្សន៍នៃព្រះរាជាណាចក្រកម្ពុជា។ ករណីប្រព្រឹត្តបទល្មើស ត្រូវទទួលខុសត្រូវចំពោះមុខច្បាប់ជាធរមាន៕
