ប្រជាសហគមន៍ភូមិបុស្សស្នោរ និងភូមិស្រែប្រាំង ក្នុងឃុំត្រពាំងព្រីង ស្រុកតំបែរ ខេត្តត្បូងឃ្មុំ ជាង១០០គ្រួសារ បានផ្លាស់វេនគ្នាយាមដីស្រែ និងដីចម្ការរបស់ពួកគាត់ ក្នុងទំហំជាង១០០០ហិកតា ទាំងថ្ងៃទាំងយប់ ដោយបារម្ភខ្លាចក្រុមហ៊ុនចិនមួយចុះអភិវឌ្ឍន៍តំបន់នោះឈូសឆាយយក។
ប្រជាសហគមន៍មួយរូបគឺលោក សែម ចាន់សុង បានឱ្យ VOD ដឹងថា កាលពីមុន ប្រជាសហគមន៍គ្រាន់តែបានជិះឃ្លាំមើលការឈូសឆាយដីរបស់ក្រុមហ៊ុនប៉ុណ្ណោះទេ។ ប៉ុន្តែ ចាប់ពីថ្ងៃទី១៩ ខែកុម្ភៈ ឆ្នាំ២០២០នេះ ប្រជាសហគមន៍ប្រមាណ១០០នាក់ បានដាក់វេនគ្នានៅចាំយាមដីសហគមន៍ទាំងនោះ ទាំងយប់ទាំងថ្ងៃ។
លោក សែម ចាន់សុង៖ «ដូរវេនគ្នាពេលថ្ងៃ៥០ ទៅ៦០នាក់ទៅ យប់៥០ ទៅ៦០នាក់ទៀត។ ពេលថ្ងៃ អ្នករវល់ការងារអញ្ចឹងគេមកធ្វើការសិន ដល់ពេលយប់បានគេទៅម្ដង ហើយដូរគ្នាម្នាក់ម្ដង»។
ប្រជាសហគមន៍មួយរូបទៀតគឺលោក ថា លីដា ថ្លែងថា ដីជាង១០០០ហិកតារបស់ប្រជាពលរដ្ឋ១២០គ្រួសារ នៅក្នុងភូមិបុស្សស្នោរ និងភូមិស្រែប្រាំង ត្រូវក្រុមហ៊ុនចិនមួយឈ្មោះ ហាមីនីវីង អីនវេសមេន បំពានយកគ្រឿងចក្រឈូសឆាយយកជាបន្តបន្ទាប់។
លោក ថា លីដា៖ «ខាងប្រជាពលរដ្ឋមានការព្រួយបារម្ភជាខ្លាំង ដោយសារតែឥឡូវនេះ ខាងក្រុមហ៊ុនមិនបានធ្វើកិច្ចសន្យា ឬមួយក៏លក្ខខណ្ឌអីមួយជាមួយប្រជាពលរដ្ឋ នៅពេលប្រជាពលរដ្ឋឃាត់គ្រឿងចក្ររបស់ក្រុមហ៊ុន គឺខាងក្រុមហ៊ុនមិនបានធ្វើកិច្ចសន្យាថា ឈប់ចូលនៅហ្នឹងនោះទេ ពេលដែលគេចូល ហើយប្រជាពលរដ្ឋមកឃាត់ គឺគេមានតែសុំដកគ្រឿងចក្រគេទៅវិញនោះទេ»។
ប្រជាសហគមន៍ម្នាក់ទៀត អ្នកស្រី ម៉ៅ សេងហាក់ ថ្លែងថា ពួកគាត់កំពុងជួបការលំបាកខ្លាំងផ្នែកជីវភាពដោយសារមិនមានពេលទៅធ្វើការរកលុយផ្សេង ដោយចំណាយពេលច្រើនយាមដី។
អ្នកស្រី ម៉ៅ សេងហាក់៖ «កំពុងតែជួបការលំបាកណាស់បងអើយ។ ចង់ដាច់បាយហើយ ឥឡូវនេះអ្នកខ្លះចុះរាវគ្រំមកហូប ហើយខ្លះនៅយាមដី»។
អភិបាលស្រុកតំបែរ លោក សុខ សារិទ្ធ អះអាងថា បញ្ហាដីធ្លីនៅក្នុងឃុំត្រពាំងព្រីងនេះ គឺបានដោះស្រាយរួចយូរហើយ ព្រមទាំងបានកំណត់យ៉ាងច្បាស់ថា ដីកន្លែងណាជាដីកាន់កាប់ដោយក្រុមហ៊ុន និងដីកន្លែងណាជាដីរបស់ប្រជាពលរដ្ឋ។ លោកបន្តថា ករណីគ្រឿងចក្រក្រុមហ៊ុនឈូសឆាយនេះ មិនប៉ះពាល់ដល់ដីកសិកម្មប្រជាពលរដ្ឋនោះទេ គឺឈូសតែដីផ្លូវចូលទៅក្រុមហ៊ុនប៉ុណ្ណោះ។
លោក សុខ សារិទ្ធ៖ «បើនិយាយទៅ កាលពីយើងសម្របសម្រួលហ្នឹង ខាងថ្នាក់ជាតិ និងថ្នាក់ក្រោមជាតិ គឺបានសម្របសម្រួលព្យាយាមអស់ហើយ ហើយក៏ផ្ដល់ឱកាសជូនដល់បងប្អូនតាំងពី២០១៥ តាំងពីមានទំនាស់ដំបូង គេដោះតាំងពី២០១៥ ដល់២០១៨ ហើយទុកលទ្ធភាពឱ្យគាត់បានយល់ ហើយទទួលស្គាល់នូវការដោះស្រាយដោយអាជ្ញាធរមានសមត្ថកិច្ច តែគ្រាន់តែថា មានបងប្អូនយើងមួយចំនួនគាត់អត់ព្រមទទួលយកតាមការសម្របសម្រួលហ្នឹង ហើយក៏នៅបន្តរកាំរកូស»។
ផ្ទុយពីការអះអាងរបស់អភិបាលស្រុក ប្រជាពលរដ្ឋដែលផ្លាស់វេនគ្នាយាមដីនេះ អះអាងថា គ្រឿងចក្រមិនមែនឈូសឆាយធ្វើផ្លូវទេ គឺឈូសយកដីស្រែ និងចម្ការរបស់ពួកគាត់តែម្តង ហើយមួយរយៈនេះក៏មានការប៉ះទង្គិចគ្នាខ្លះៗរវាងខាងក្រុមហ៊ុន និងប្រជាពលរដ្ឋបន្តបន្ទាប់។
មេឃុំត្រពាំងព្រីង លោក មុំ សាប៊ុន ឱ្យដឹងថា បើទោះជាមានការកំណត់ព្រំប្រទល់រវាងដីក្រុមហ៊ុន និងដីពលរដ្ឋហើយក៏ដោយ ក៏ពេលខ្លះក្រុមហ៊ុននៅតែឈូសឆាយហួសចូលដីមិនទាន់ដោះស្រាយចប់។ លោកថា លោកមិនមានលទ្ធភាពទប់ស្កាត់សកម្មភាពក្រុមហ៊ុនបានទេ។
លោក មុំ សាប៊ុន៖ «សម្រាប់ថ្នាក់ឃុំចុះបិទផ្សាយហាមឃាត់តំបន់ណាដែលមិនទាន់ដោះស្រាយទាំងក្រុមហ៊ុនចិន ទាំងពលរដ្ឋដែលពាក់ព័ន្ធ យើងត្រៀមចាំការដោះស្រាយរបស់ខាងលើ ប៉ុន្តែ កន្លែងខ្លះ គេអត់ព្រមស្តាប់តាមបទបញ្ជាផងហ្នឹង នៅតែឈូសឆាយដដែលៗ ដូចក្រុមហ៊ុនចិនថ្ងៃមុនអញ្ចឹង មកឈូសឆាយចំកន្លែងហាមឃាត់»។
រយៈពេល៣ថ្ងៃកន្លងទៅនេះ ក្រុមការងារវីអូឌី បានព្យាយាមស្វែងរកមធ្យោបាយទំនាក់ទំនងទៅក្រុមហ៊ុនចិននេះ ដើម្បីសុំការឆ្លើយតប ដោយសួរទៅប្រជាសហគមន៍ សួរទៅមេឃុំត្រពាំងព្រីង មន្ត្រីលីកាដូនៅត្បូងឃ្មុំ និង ស្វែងរកតាមអ៊ីនធឺណិត ប៉ុន្តែ មិនអាចរកទីតាំងក្រុមហ៊ុន ឬមធ្យោបាយទំនាក់ទំនងផ្សេងៗទៀតបានទេ។
មន្ត្រីរបស់អង្គការលីកាដូដែលតាមដានករណីនេះ លោក វ៉ន សេងពៅ ជំរុញឱ្យមន្ត្រីពាក់ព័ន្ធស៊ើបអង្កេតរកមូលហេតុពិតនៃជម្លោះឱ្យឃើញ ហើយដោះស្រាយឱ្យមានយុត្តិធម៌ ទើបភាគីទាំងសងខាងមានក្រុមហ៊ុន និង ប្រជាពលរដ្ឋសុខចិត្ត។
លោក វ៉ន សេងពៅ៖ «យើងចង់ឱ្យមានការដោះស្រាយបែបតម្លាភាពរវាងពលរដ្ឋ និងក្រុមហ៊ុន អញ្ចឹងទី១ក្រសួងពាក់ព័ន្ធដែលធ្វើការទៅលើវិវាទដីធ្លីហ្នឹង គួរណាស់តែធ្វើការដោះស្រាយ និងសិក្សាដល់មូលដ្ឋានតែម្ដង សិក្សាដល់មូលដ្ឋានហើយសិក្សាអំពីប្រវត្តិនៃការបង្កឱ្យមានជំលោះក្នុងរឿងហ្នឹង ថាតើអ្វីជាប្រភពនៃទំនាស់នៅក្នុងរឿងហ្នឹង។ ប្រសិនបើយើងមិនបានរកប្រភព និងមូលហេតុដែលបង្កឱ្យមានទំនាស់ទេ អ្វីជាបញ្ហានៅក្នុងរឿងហ្នឹងទេ ទោះបីយើងខំសម្រេចយ៉ាងណា ក៏ពលរដ្ឋគាត់គិតថា យើងមានការលំអៀងទៅភាគីខាងនេះភាគីខាងនោះ»។
កាលពីខែកក្កដា ឆ្នាំ២០១៩ កន្លងទៅ ក្រសួងរៀបចំដែនដី នគរូបនីយកម្ម និងសំណង់ បានបដិសេធ មិនដោះស្រាយបញ្ហាដីធ្លីនៅក្នុងឃុំត្រពាំងព្រីង ស្រុកតំបែរ ខេត្តត្បូងឃ្មុំនេះទេ ដោយលើកហេតុផលថា ទីតាំងដីក្នុងភូមិបុស្សស្នោរ និងភូមិស្រែប្រាំងនេះ គឺប្រជាពលរដ្ឋបានលក់ឱ្យក្រុមហ៊ុន ហាមីនីវីង អីនវេសមេន តាំងពីឆ្នាំ២០១១មកម្ល៉េះ ហើយក្រសួងបានចុះបញ្ចីជូនក្រុមហ៊ុនរួចរាល់ហើយដែរ៕
