លោកនាយករដ្ឋមន្ត្រី និងជាមេដឹកនាំបក្សកាន់អំណាចផងនោះគឺលោក ហ៊ុន សែន បានអះអាងថា បើលោកអាចកាន់អំណាចរហូត១០០ឆ្នាំទៀត ការមិនយកពន្ធលើដីកសិកម្មនៅតែបន្តអនុវត្តដដែល។
ការថ្លែងរបស់នាយករដ្ឋមន្ត្រី ហ៊ុន សែន នេះធ្វើឡើងក្នុងពិធីសម្ពោធផ្លូវជាតិមួយខ្សែនៅខេត្តបន្ទាយមានជ័យ កាលពីថ្ងៃពុធម្សិលមិញ។
លោកថា៖ «រយៈពេល៤១ឆ្នាំកន្លងផុតទៅ យើងមិនដែលយកពន្ធលើដីកសិកម្មរបស់កសិករទេ ហើយប្រសិនបើគណបក្សប្រជាជនកាន់អំណាច១០០ឆ្នាំទៀត ក៏យើងនៅតែមិនយកពន្ធលើដីធ្លីកសិកម្មបន្តទៅទៀត»។
អ្នកជំនាញកសិកម្ម លោកបណ្ឌិត យ៉ង សាំងកុមារ ហៅគោលនយោបាយមិនយកពន្ធលើដីកសិកម្ម ថាជារឿងតូចតាច បើរដ្ឋាភិបាលគ្មានគោលនយោបាយធ្វើឱ្យកសិកររកបានចំណូលខ្ពស់ពីដីដែលកសិករកំពុងដាំដុះ។
លោកថា៖ «គោលនយោបាយកសិកម្ម វាមិនមែនមានតែការមិនយកពន្ធលើដីកសិករមួយទេ [ដើម្បី] ជួយកសិករនោះ វាមានរឿងច្រើនលើសពីហ្នឹងទៀត ជាប្រព័ន្ធទាំងមូល ពាក់ព័ន្ធទៅនឹងការដោះស្រាយបញ្ហាទឹក ទុន ទីផ្សារ បច្ចេកទេស ទាក់ទងនឹងធ្វើឱ្យកសិករមានលទ្ធភាពរកប្រាក់ចំណូលបានច្រើន ដើម្បីចូលរួមចំណែកជីវភាព និងសេដ្ឋកិច្ចទាំងមូល។ អីចឹង ការមិនយកពន្ធស្អីមួយលើដីហ្នឹង វាជារឿងតូចតាចទេ»។
បើតាមលោក យ៉ង សាំងកុមារ បច្ចុប្បន្ន កសិករដែលចាប់យករបរកសិកម្មជាប់លាប់មានប្រហែល ៣០ភាគរយប៉ុណ្ណោះ ក្រៅពីនោះជាអ្នកប្រកបរបរកសិកម្មបន្ទាប់បន្សំ។
កាលពីថ្ងៃទី១៨ ខែកញ្ញា ឆ្នាំ២០១៦ កសិករជិត២០០០នាក់ នៅខេត្តបាត់ដំបង បានផ្ទុះការតវ៉ាចាក់ស្រូវលើផ្លូវជាតិលេខ៥ ផ្តុំស្រុកសង្កែ ទាមទារឱ្យរដ្ឋាភិបាលរកទីផ្សារ ដោយអះអាងថា ស្រូវពួកគាត់គ្មានទីផ្សារ ធ្វើឱ្យឈ្មួញបញ្ចុះតម្លៃតាមចិត្តក្នុងរដូវប្រមូលផល។
ប្រធានក្រុមអ្នកវិភាគវ័យក្មេង កញ្ញា លី ស្រីស្រស់ បង្ហាញការយល់ឃើញថា គោលនយោបាយមិនយកពន្ធលើដីកសិកម្ម វាបានកាត់បន្ថយបន្ទុកកសិករមួយផ្នែក។ ប៉ុន្តែថា បើប្រព័ន្ធរដ្ឋាភិបាលជ្រកក្រោមស្លាកពុករលួយ គោលនយោបាយនេះបានទៅលើក្រុមឧកញ៉ាដែលរកស៊ីដីច្រើនជាង ព្រោះគេអាចប្រើលុយបំលែងទៅជាដីកសិកម្មបាន។
កញ្ញាថា៖ «កន្លងមក ដីរាប់រយហិកតាមិនមានជាសកម្មភាពសេដ្ឋកិច្ចធំដុំទេ មានឧកញ៉ាកាន់កាប់មានដំណាំតិចតួចអីជាដើម វាជារូបភាពមួយដែលគេធ្វើឡើងក្នុងទម្រង់នៃការកាន់កាប់ទៅជាប្រភេទដីកសិកម្ម ហើយអាចរួចពន្ធទៅលើការបង់ពន្ធប្រភេទដីអីជាដើម»។
សន្ទស្សន៍នៃការយល់ឃើញពីអំពើពុករលួយឆ្នាំ២០១៩ ដែលចេញផ្សាយកាលពីថ្ងៃទី២៣ ខែមករា ដោយអង្គការតម្លាភាពអន្តរជាតិ បង្ហាញថា កម្ពុជាមានកម្រិតអំពើពុករលួយខ្ពស់ជាងគេបំផុតក្នុងចំណោមប្រទេសក្នុងតំបន់អាស៊ាន ដែលទទួលបានពិន្ទុ២០ លើពិន្ទុអតិបរមា១០០ ដែលវាយតម្លៃថាល្អបំផុត។
យ៉ាងនេះក្តី នៅឆ្នាំ២០១៩ រដ្ឋាភិបាលបានទម្លាក់លុយ៥០លានដុល្លារ ឱ្យទៅស្ថាប័នពាក់ព័ន្ធនូវអ្វីដែលរដ្ឋាភិបាលគិតថា ដើម្បីទប់ស្កាត់ការធ្លាក់ចុះតម្លៃស្រូវ ។
វិធានការនេះ បានធ្វើឡើងក្រោយពីកសិករមួយចំនួននៅខេត្តបាត់ដំបង ពោធិ៍សាត់ និងស្វាយរៀងជាដើម បានបន្តត្អូញត្អែរថា ពួកគេនៅតែបង្ខំចិត្តលក់ស្រូវក្នុងតម្លៃថោក មិនរួចថ្លៃដើមដែលបានផលិត។
ទោះជាយ៉ាងណា លោកនាយករដ្ឋមន្ត្រី ហ៊ុន សែន ថ្លែងក្នុងពិធីនោះដែរថា មានប្រទេសមិនច្រើនទេដែលហ៊ានសម្រេចមិនយកពន្ធដីកសិកម្ម ដូចការដឹកនាំរបស់លោក។
របាយការណ៍ជំរឿនកសិកម្មររបស់រដ្ឋាភិបាលនៅឆ្នាំ២០១៣ បង្ហាញថា ប្រជាជនចំនួន១លាន៩សែននាក់ប្រកបរបរកសិកម្ម ដែលមានការចិញ្ចឹមសត្វ និងដាំដំណាំលើដីដាំដុះ ៣លាន១សែនហិកតា៕
