ក្រសួងផែនការបានឱ្យដឹងថា ជំរឿនទូទៅប្រជាជនឆ្នាំ២០១៩ មានការកើនឡើងជិត២លាននាក់ បើធៀបនឹងឆ្នាំ២០០៨ ប៉ុន្តែ តួលេខនេះមិនរាប់បញ្ចូលពលករធ្វើការនៅក្រៅប្រទេសនោះឡើយ។
ក្នុងសន្និសីទសារព័ត៌មាន កាលពីម្សិលមិញ ប្រតិភូរាជរដ្ឋាភិបាល ទទួលបន្ទុកអគ្គនាយកវិទ្យាស្ថានស្ថិតិ នៃក្រសួងផែនការ លោកស្រី ហង់ លីណា បានថ្លែងថា តួលេខបណ្តោះអាសន្នក្នុងទូទាំងប្រទេសកម្ពុជា គិតត្រឹមថ្ងៃទី០៣ ខែមីនា ឆ្នាំ២០១៩ ប្រជាជនសរុបមានចំនួន ១៥ ២៨៨ ៤៨៩នាក់ ក្នុងនោះ មានប្រុស ៧ ៤១៨ ៥៧៧នាក់ និងស្រី ៧ ៨៦៩ ៩១២នាក់។ ចំនួនប្រជាជនសរុបកើនឡើង ១ ៨៩២ ៨០៧នាក់ ស្មើនឹង១៤,១ភាគរយ រយៈពេល១១ឆ្នាំ រវាងឆ្នាំ២០០៨ និងឆ្នាំ២០១៩។ តួលេខទាំងនេះ មិនរាប់បញ្ចូលពលករធ្វើការនៅក្រៅប្រទេសឡើយ។
លោកស្រីបញ្ជាក់ថា លទ្ធផលនៃការធ្វើជំរឿនទូទៅប្រជាជន ឆ្នាំ២០១៩ មានតម្លាភាព និងត្រឹមត្រូវ រហូតដល់៩៧,៥ភាគរយ ដែលអាចឱ្យស្ថាប័នពាក់ព័ន្ធយកទៅប្រើប្រាស់តាមតម្រូវការ ពិសេសសម្រាប់ការយកទៅធ្វើផែនការផ្សេងៗ ខណៈតួលេខនេះ ក៏ត្រូវបានបញ្ជូនទៅអង្គការសហប្រជាជាតិផងដែរ។
មន្ត្រីក្រសួងផែនការបានឱ្យដឹងទៀតថា លទ្ធផលផ្លូវការនៃការធ្វើជំរឿនទូទៅប្រជាជនឆ្នាំ២០១៩ នឹងត្រូវបង្ហាញជាផ្លូវការ នៅខែកក្កដា ឆ្នាំ២០២០ ក្រោយបិទបញ្ចប់ទាំងស្រុងផងដែរ៕
