រដ្ឋមន្ត្រីក្រសួងមហាផ្ទៃ លោក ស ខេង អះអាងថា សាលារៀនដែលលោកចូលរួមកសាងកន្លងមកនៅតាមបណ្តាខេត្តមួយចំនួន ជាពិសេសខេត្តព្រៃវែង គឺមិនដាក់ឈ្មោះខ្លួនឯងទេ សុខចិត្តដាក់ឈ្មោះមេដឹកនាំផ្សេងជំនួសវិញ។
ក្នុងពិធីចុះពិនិត្យ និងព្យាបាលជម្ងឺ ដោយឥតគិតថ្លៃរបស់គ្រូពេទ្យស្ម័គ្រចិត្ត ស សុខា នៅថ្ងៃនេះ ក្នុងអនុវិទ្យាល័យសម្ដេចឪ ស្រុកកំចាយមារ ខេត្តព្រៃវែង លោក ស ខេង ថ្លែងថាថ្នាក់ដឹកនាំគណបក្សប្រជាជនកម្ពុជា តែងតែយកចិត្តទុកដាក់ជួយធ្វើផ្លូវ និងសាលារៀនជូនប្រជាពលរដ្ឋនៅទូទាំងប្រទេស ដោយសារដឹងគុណប្រជាពលរដ្ឋដែលបោះឆ្នោតគាំទ្រគណបក្សកាន់អំណាច។
លោក ស ខេង បញ្ជាក់ថា នៅពេលកសាងសមទ្ធិផលជូនប្រជាពលរដ្ឋ ជាពិសេសសាលារៀននៅស្រុកកំចាយមារ ខេត្តព្រៃវែង លោកមិនដាក់ឈ្មោះខ្លួនឯងទេ សុខចិត្តដាក់ឈ្មោះលោក ជា ស៊ីម លោក ហេង សំរិន និងលោកនាយករដ្ឋមន្ត្រីហ៊ុន សែន ជំនួសវិញ។
លោកមានប្រសាសន៍ថា៖ «សាលារៀនដែលខ្ញុំធ្វើកន្លងមកមានច្រើនណាស់ តែខ្ញុំមិនចង់ដាក់ឈ្មោះខ្ញុំទេ តែខ្ញុំដាក់ឈ្មោះ សម្តេច ជា ស៊ីម សម្តេច ហេង សំរិន និងសម្តេច ហ៊ុន សែន»។
នាយកប្រតិបត្តិសម្ព័ន្ធគណនេយ្យភាពសង្គមកម្ពុជា លោក សន ជ័យ មានប្រសាសន៍ថា ការលើកឡើងរបស់រដ្ឋមន្ត្រីក្រសួងមហាផ្ទៃលោក ស ខេង ជាគំនិតផ្ទាល់ខ្លួនរបស់គាត់តែប៉ុណ្ណោះ។ ប៉ុន្តែលោកសង្កេតឃើញថា សាលារៀនមួយចំនួនដែលដាក់ឈ្មោះមេដឹកនាំដដែលៗ ដោយសារអ្នករត់ការមួយចំនួនចង់បានប្រយោជន៍ផ្ទាល់ខ្លួន។ ករណីនេះធ្វើឲ្យពលរដ្ឋសព្វថ្ងៃ មានចម្ងល់ថាថវិកាដែលសង់សាលារៀនជារបស់បុគ្គលឬជារបស់រដ្ឋ។
ទោះជាបែបនេះក្តីមន្ត្រីសង្គមស៊ីវិលរូបនោះផ្តល់ជាអនុសាសន៍ថា រដ្ឋាភិបាលកសាងសាលារៀន ត្រូវដាក់ឈ្មោះតាមកេរ្តិ៍តំណែលរបស់ដូនតាទុកឲ្យដោយថាដើម្បីកុំឲ្យបាត់បង់អត្តសញ្ញាណរបស់ជាតិ ។
លោកផ្តល់ជាអនុសាសន៍ថា៖ «ខ្ញុំយល់ថា រក្សាឈ្មោះ[សាលារៀន]ពីដើមរៀងមក ឈ្មោះទីកន្លែងនៅប្រទេសកម្ពុជានេះ ជាប់ជំពាក់ជំពិនជាមួយប្រវត្ត ទីកន្លែង ភូមិសាស្ត្រ ហើយក៏វាជាតំបន់មួយដែលមានការពាក់ព័ន្ធអំពីទំនាក់ទំនងភូមិសាស្ត្រ សាវតា ទឹកដីរបស់កម្ពុជាដែរ ដូច្នេះដែលដូនតាដាក់ឲ្យគួរតែរក្សាទុកឲ្យបានថិតថេរ»។
យោងតាមស្ថិតិ និងសូចនាករអប់រំសាធារណៈឆ្នាំសិក្សា២០១៨-២០១៩ បង្ហាញថាប្រទេសកម្ពុជាមានសាលារៀនសាធារណៈរបស់រដ្ឋដែលរាប់ពីថ្នាក់មតេយ្យរហូតដល់ថ្នាក់វិទ្យាល័យមានចំនួន១៣៣០០៕