លោកនាយករដ្ឋមន្ត្រី ហ៊ុន សែន ប្រាប់ឱ្យគ្រប់ស្ថាប័នរដ្ឋទាំងអស់កាត់បន្ថយការចំណាយ៥០ភាគរយ លើកលែងតែក្រសួងចំនួន៣ប៉ុណ្ណោះដែលត្រូវកាត់បន្ថយការចំណាយតែ២៥ភាគរយ។
ក្នុងពិធីបិទសន្និបាតបូកសរុបការងារឆ្នាំ២០១៩ និងលើកទិសដៅការងារឆ្នាំថ្មីឆ្នាំ២០២០របស់ក្រសួងសុខាភិបាល នៅថ្ងៃពុធនេះ លោក ហ៊ុន សែន ថ្លែងថា ស្ថាប័នចំនួន៣ ដែលត្រូវកាត់បន្ថយចំណាយតែ២៥ភាគរយនោះ គឺមានក្រសួងការបរទេស ក្រសួងពាណិជ្ជកម្ម និងទីស្តីការគណៈរដ្ឋមន្ត្រី។
លោក ហ៊ុន សែន មានប្រសាសន៍ថា៖ «លើកលែងតែក្រសួងការបរទេស ក្រសួងពាណិជ្ជកម្ម និងទីស្តីការគណៈរដ្ឋមន្ត្រីទេ ដែលនឹងត្រូវកាត់បន្ថយការចំណាយមកត្រឹម២៥ភាគរយ។ នេះជម្រាបឱ្យជម្រាបដើម្បីឱ្យឯកឧត្ដម លោកជំទាវ លោក លោកស្រី បានជម្រាប ថាសុំកុំបង្កើនការចំណាយអ្វីទាំងអស់។ មិនត្រឹមតែមិនឱ្យបង្កើនការចំណាយទេ យើងកាត់បន្ថយការចំណាយតែម្ដង មានតែចំណាយទៅលើបៀវត្សតែប៉ុណ្ណោះដែលមិនមានការកាត់បន្ថយទេ ទាក់ទងទៅនឹងចំណាយចរន្តដែលក្នុង១ខែ យើងចាយជាង៤០០លានដុល្លារ គឺអាហ្នឹង មិនអាចប៉ះពាល់បានទេ»។
លោក ហ៊ុន សែន ក៏ណែនាំឱ្យប្រតិភូដែលត្រូវចេញទៅក្រៅប្រទេស ត្រូវកាត់បន្ថយចំនួន ហើយបើមិនចាំបាច់ទេ លោកថា ត្រូវផ្ដល់ការងារទាំងនោះ ឱ្យអគ្គរដ្ឋទូតនៅប្រទេសនោះចូលរួមប្រជុំជំនួស។
បើតាមលោក ហ៊ុន សែន ការកាត់បន្ថយចំណាយនេះ គឺធ្វើឡើងដើម្បីជួយសេដ្ឋកិច្ចកម្ពុជាដែលអាចរងផលប៉ះពាល់ដោយសារវីរុសកូវីដ-១៩៕
