អតីតមេដឹកនាំគណបក្សសង្គ្រោះជាតិ លោក កឹម សុខា អំពាវនាវឱ្យខ្មែររួបរួមគ្នា ដើម្បីទប់ស្កាត់បញ្ហាឆ្លងរាលដាលមេរោគកូរ៉ូណា ចៀសវាងការបំផ្លើសករណីនេះ វាយប្រហារគ្នាក្នុងហេតុផលកេងចំណេញនយោបាយ។
លោក កឹម សុខា សរសេរនៅលើហ្វេសប៊ុករបស់លោកនៅថ្ងៃនេះថា មេរោគកូរ៉ូណា កំពុងតែធ្វើឱ្យប៉ះពាល់ដល់អាយុជីវិត ដល់សេដ្ឋកិច្ច និងជីវភាពមនុស្សជាច្រើនទាំងនៅកម្ពុជា និងអន្តរជាតិ។ លោកអំពាវនាវឱ្យខ្មែររួមគ្នាដោះស្រាយបញ្ហានេះ។
លោក កឹម សុខា៖ «ខ្ញុំយល់ឃើញថា ក្នុងកាលៈទេសៈនេះ យើងជាខ្មែរត្រូវរួបរួមគ្នា ដើម្បីទប់ស្កាត់បញ្ហាប្រឈមទាំងពីរខាងលើ (ជំងឺ និងសេដ្ឋកិច្ច) ដែលប៉ះពាល់ដល់ប្រទេសជាតិ និងប្រជាពលរដ្ឋយើង ដោយកុំប្រកាន់និន្នាការនយោបាយ កុំប្រើប្រាស់បញ្ហានេះបំផ្លើសបំភ្លៃ ដើម្បីកេងចំណេញនយោបាយ វាយប្រហារគ្នា ដោយអសីលធម៌»។
រដ្ឋាភិបាលកម្ពុជាបានប្រកាសថា ករណីឆ្លងរាលដាលមេរោគកូរ៉ូណា ប៉ះពាល់ដល់កម្មកររាប់ម៉ឺននាក់ធ្វើការនៅរោងចក្រកាត់ដេរ ប៉ះពាល់ដល់វិស័យទេសចរណ៍ រហូតដល់លោកនាយករដ្ឋមន្ត្រី ហ៊ុន សែន ប្រកាសកាត់កញ្ចប់ថវិកាចំណាយនៅតាមក្រសួងស្ថាប័នរដ្ឋ៥០ភាគរយ។
