សាលារាជធានីភ្នំពេញអំពាវនាវទៅប្រជាពលរដ្ឋកុំជ្រួលច្របល់នាំគ្នាទៅទិញទំនិញតាមពាក្យចចាមអារ៉ាម ដោយថា ពលរដ្ឋកម្ពុជាមិនមានទាន់មានអ្នកឈឺដោយសារ វីរុស Covid-19នៅឡើយ ទោះបីវីរុសនេះ កំពុងរាតត្បាតនៅទូទាំងពិភពលោកក៏ដោយ។
ក្នុងសេចក្ដីជូនដំណឹងរបស់សាលារាជធានីភ្នំពេញចុះថ្ងៃទី០៦ ខែមីនាឆ្នាំ២០២០ឱ្យដឹងថា រយៈពេលពីរកន្លងមកនេះ ប្រជាពលរដ្ឋបានសម្រុកទៅទិញទំនិញស្តុកទុក ជាពិសេសស្បៀងអាហារប្រចាំថ្ងៃ ជាហេតុធ្វើឱ្យជនឆ្លៀតឱកាសនិយមដំឡើងថ្លៃទំនិញ ទាំងដែលស្បៀងអាហារនៅរាជធានីភ្នំពេញមិនបានប្រឈមនឹងខ្វះខាត ។
សេចក្ដីជូនដំណឹងដដែលថា សាលារាជធានីឱ្យប្រជាពលរដ្ឋបន្តអនុវត្តវិធីបង្ការតាមការណែរបស់ក្រសួងសុខាភិបាល ដោយថា ក្រសួងសុខាភិបាលក៏កំពុងត្រៀមទប់ស្កាត់ការចម្លង និងការរីករាយដាលវីរុសថ្មីនេះ។
សាលារាជធានីភ្នំពេញអំពាវនាវទៅប្រជាពលរដ្ឋទាំងអស់ឱ្យរក្សាភាពស្ងៀមស្ងាត់ និង ប្រកបមុខរបរចិញ្ចឹមជីវិតដូចប្រក្រតី ដោយកុំជ្រួលច្របល់តាមពាក្យចចាមអារ៉ាម ដោយថា នៅកម្ពុជាមិនទាន់មានប្រជាពលរដ្ឋខ្មែរណាម្នាក់បានចម្លងវីរុសកូវីដ១៩នៅឡើយ។
អ្នកនាំពាក្យសាលារាជធានីភ្នំពេញ លោក ម៉េត មាសភក្ដី បន្ថែមថា អាជ្ញាធរនឹងចំណាត់វិធានការលើអ្នកផ្សព្វផ្សាយព័ត៌មានមិនពិត ដែលធ្វើឱ្យប្រជាពលរដ្ឋជ្រួលច្របល់។
លោកថា៖«សាលារាជធានីភ្នំពេញនឹងចាត់វិធានការអ្នកផ្សព្វផ្សាយ ប៉ុន្តែវិធានការយ៉ាងណាខ្ញុំសុំមិននិយាយទេ ទុកឱ្យមន្ត្រីជំនាញអ្នកធ្វើការ»។
នាយកប្រតិបត្តិសម្ព័ន្ធគណនេយ្យភាពសង្គមកម្ពុជា លោក សន ជ័យ មានប្រសានស៍ថា មូលហេតុដែលនាំឱ្យប្រជាពលរដ្ឋជ្រួលច្របល់ទិញទំនិញស្តុកទុក ដោយសារ ពួកគេមិនជឿជាក់លើប្រព័ន្ធសុខាភិបាលកម្ពុជា បន្ទាប់ពីបុរសជនជាតិជប៉ុនម្នាក់ ត្រូវបានរកឃើញថា ផ្ទុកជំងឺកូរ៉ូណានៅប្រទេសកម្ពុជា។
លោកថា៖«ការគិតគួរឬក៏ការប្រុងប្រយ័ត្នរបស់ប្រជាពលរដ្ឋទំនងពួកគេមិនទាន់ស្ងប់ចិត្តជាមួយហ្នឹងវិធានការទាំងឡាយរបស់ក្រសួងសុខាភិបាល សូម្បីជនជាតិជប៉ុនឆ្លងកាត់ព្រលានយន្តហោះ សៀមរាបហ្នឹង មិនមានការចាប់អារម្មណ៍ផង។ អ៊ីចឹងថាតើពួកគេមានការជឿជាក់ប៉ុណ្ណា ខណៈដែលមានការអះអាងថានៅតាមព្រលានយន្តហោះ មានដាក់កាំមេរ៉ា និងឧបករណ៍វាស់កម្ដៅដែរ ហេតុអីចេញពីស្រុកខ្មែរទៅវាស់មិនឃើញ»។
លោក សន ជ័យ ស្នើទៅអាជ្ញាធរអន្តរាគមន៍ទៅម្ចាស់ទំនិញទាំងអស់កុំឱ្យដំឡើងថ្លៃជាជាង ប្រកាសចាត់វិធានការទៅលើអ្នកផ្សព្វផ្សាយព័ត៌មាន ដោយលោកហៅការប្រុងប្រយ័ត្នរបស់ប្រជាពលរដ្ឋទិញទំនិញទុកថា ជារឿងល្អ។
បើតាមលិខិតរបស់ឯកអគ្គរាជទូតកម្ពុជាប្រចាំប្រទេសជប៉ុន លោក អ៊ឹង រចនា ផ្ញើមក រដ្ឋមន្ត្រីក្រសួងការបរទេសថ្ងៃទី៥ ខែមីនា ឱ្យដឹងថា បុរសជនជាតិជប៉ុនអាយុជាង៤០ឆ្នាំ បានធ្វើដំណើរចេញចូលកម្ពុជាចំនួន២លើក គឺលើកទីមួយនៅថ្ងៃទី១៦ ខែកុម្ភៈ និងលើកទីពីរនៅថ្ងៃទី២៨ ខែកុម្ភៈ។
លិខិតបញ្ជាក់ថា បុរសជនជាតិជប៉ុនរូបនេះ បានចេញរោគសញ្ញាដំបូងនៅប្រទេសភីលីពីន នាថ្ងៃទី២១ និងរោគសញ្ញាលើកទីពីរ នៅកម្ពុជានាថ្ងៃ៣ ខែមីនា មុនពេលចាកចេញពីប្រទេស។
កាលពីថ្ងៃ៥ ខែមីនា ក្រសួងសុខាភិបាលកម្ពុជាបានដាក់មនុស្ស៤នាក់ស្ថិតនៅក្នុងការតាមដាន បន្ទាប់ពីរកឃើញថាមានទំនាក់ទំនងជិតស្និទ្ធជាមួយជនជាតិជប៉ុនម្នាក់ដែលរកឃើញថា មានCOVID-19។ ដោយឡែក មនុស្សប្រមាណ ៤០នាក់ប៉ះពាល់ប្រយោល ក៏ត្រូវដាក់ឱ្យនៅដាច់ដោយឡែកចំនួន ១៤ថ្ងៃ និងតាមដានសុខភាព បើមានចេញរោគសញ្ញាត្រូវយកវត្ថុវិភាគជាបន្ទាន់។
