មន្រ្តីជាន់ខ្ពស់ក្រសួងការពារជាតិ បានអះអាងថា«សមយុទ្ធនាគមាសឆ្នាំ២០២០» រវាងកងទ័ពកម្ពុជានិងចិន នឹងនៅតែធ្វើឡើងដូចការគ្រោងទុក។
អ្នកនាំពាក្យក្រសួងការពារជាតិ លោក ឈុំ សុជាតិ បានបញ្ជាក់បែបនេះនៅលើទំព័រហ្វេសប៊ុកផ្លូវការរបស់លោកនៅថ្ងៃនេះ។
លោកសរសេរថា៖«សមយុទ្ធនាគមាសឆ្នាំ២០២០ ដែលប្រារព្ធរួមគ្នារវាងកងយោធពលខេមរភូមិន្ទកម្ពុជា និងកងទ័ពរំដោះប្រជាជនចិន ក្រោមប្រធានបទ រួមគ្នាប្រឆាំងភេរវកម្ម និងការងារមនុស្សធម៌កម្ពុជា-ចិន នឹងធ្វើឡើងតាមការគ្រោងទុក ចាប់ពីថ្ងៃទី១៤ ខែមីនា ដល់ថ្ងៃទី០១ ខែមេសា ឆ្នាំ២០២០ នៅសាលាហ្វឹកហ្វឺនតេជោសែនជុំគិរី នៃកងពលតូចលេខ៧០ ស្រុកជុំគិរី ខេត្តកំពត។»
បើតាមលោក ឈុំ សុជាតិ សមយុទ្ធនេះអ្នកចូលរួមជាង៣ពាន់នាក់ ដែលក្នុងនោះភាគីចិនមានកងទ័ពចូលរួមសរុប២៦៥នាក់ រីឯភាគីកម្ពុជាមានកម្លាំងចូលរួម២៨៧១នាក់។ លោក បន្ថែមថាគ្រឿងយុទ្ធភណ្ឌសម្រាប់បំពាក់ក្នុងសមយុទ្ធនេះ រួមមានឧទ្ធម្ភាចក្រ កាំភ្លើងធំ រថក្រោះ រថពាសដែក កាំភ្លើងត្បាល់ អាវុធធុនស្រាល និងបរិក្ខាយោធាមួយចំនួនទៀត។
អ្នកនាំពាក្យរូបនេះថាសមយុទ្ធនាគមាសរួមចំណែកយ៉ាងសំខាន់ក្នុងការជំរុញមិត្តភាព ទំនាក់ទំនង កិច្ចសហប្រតិបត្តិការកម្ពុជា-ចិន ឱ្យកាន់តែរឹងមាំ ជាពិសេសកិច្ចសហប្រតិបត្តិការរវាងកងយោធពលខេមរភូមិន្ទ និងកងទ័ពរំដោះប្រជាជនចិន។
«សមយុទ្ធនាគមាសឆ្នាំ២០២០» នេះ ជាលើកទី៤ហើយដែលកងទ័ពកម្ពុជា-ចិន ធ្វើសមយុទ្ធនាគមាសរួមគ្នានៅក្នុងប្រទេសកម្ពុជា ដែលលើកទី១ធ្វើឡើងនៅឆ្នាំ២០១៦, លើកទី២ នៅឆ្នាំ២០១៨ និងលើកទី៣នៅឆ្នាំ២០១៩៕
កាលពីម្សិលមិញក្រសួងសុខាភិបាលកម្ពុជាបានប្រកាសពីការរកឃើញដំបូងលើបុរសខ្មែរម្នាក់នៅខេត្តសៀមរាបមានផ្ទុកវីរុសកូវីដ-១៩។ ភ្លាមៗលោកនាយករដ្ឋមន្រ្តីហ៊ុន សែន បានបញ្ជាក់តាមរយៈរដ្ឋមន្រ្តីក្រសួងសុខាភិបាលលោក ម៉ម ប៊ុនហេង ថាកម្មវិធីអង្គរសង្រ្កានត្រូវលុបចោល ហើយសាលាទូទាំងក្រុងសៀមរាបត្រូវបិទមួយរយៈ ដើម្បីទប់ស្កាត់ការរីករាលដាលនៃវីរុសកូវីដ-១៩៕
